៧. មហាបជាបតិគោតមីថេរីអបទានំ

៩៧. ‘‘ឯកទា លោកបជ្ជោតោ, វេសាលិយំ មហាវនេ;

កូដាគារេ សុសាលាយំ, វសតេ នរសារថិ.

៩៨. ‘‘តទា ជិនស្ស មាតុច្ឆា, មហាគោតមិ ភិក្ខុនី;

តហិំ កតេ [តហិំយេវ (ស្យា.)] បុរេ រម្មេ, វសី ភិក្ខុនុបស្សយេ.

៩៩. ‘‘ភិក្ខុនីហិ វិមុត្តាហិ, សតេហិ សហ បញ្ចហិ;

រហោគតាយ តស្សេវំ, ចិតស្សាសិ [ចិត្តស្សាបិ (ស្យា.)] វិតក្កិតំ.

១០០. ‘‘ពុទ្ធស្ស បរិនិព្ពានំ, សាវកគ្គយុគស្ស វា;

រាហុលានន្ទនន្ទានំ, នាហំ លច្ឆាមិ បស្សិតុំ.

១០១. ‘‘ពុទ្ធស្ស បរិនិព្ពានា, សាវកគ្គយុគស្ស វា;

មហាកស្សបនន្ទានំ, អានន្ទរាហុលាន ច.

១០២. ‘‘បដិកច្ចាយុសង្ខារំ [បដិគច្ចាយុសង្ខារេ (សី.)], ឱសជ្ជិត្វាន និព្ពុតិំ;

គច្ឆេយ្យំ លោកនាថេន, អនុញ្ញាតា មហេសិនា.

១០៣. ‘‘តថា បញ្ចសតានម្បិ, ភិក្ខុនីនំ វិតក្កិតំ;

អាសិ ខេមាទិកានម្បិ, ឯតទេវ វិតក្កិតំ.

១០៤. ‘‘ភូមិចាលោ តទា អាសិ, នាទិតា ទេវទុន្ទុភី;

ឧបស្សយាធិវត្ថាយោ, ទេវតា សោកបីឡិតា.

១០៥. ‘‘វិលបន្តា សុករុណំ [សករុណំ (សី. ស្យា. បី.)], តត្ថស្សូនិ បវត្តយុំ;

មិត្តា [សព្ពា (ស្យា. បី.)] ភិក្ខុនិយោ តាហិ, ឧបគន្ត្វាន គោតមិំ.

១០៦. ‘‘និបច្ច សិរសា បាទេ, ឥទំ វចនមព្រវុំ;

‘តត្ថ តោយលវាសិត្តា, មយមយ្យេ រហោគតា.

១០៧. ‘‘‘សា ចលា ចលិតា ភូមិ, នាទិតា ទេវទុន្ទុភី;

បរិទេវា ច សុយ្យន្តេ, កិមត្ថំ នូន គោតមី’.

១០៨. ‘‘តទា អវោច សា សព្ពំ, យថាបរិវិតក្កិតំ;

តាយោបិ សព្ពា អាហំសុ, យថាបរិវិតក្កិតំ.

១០៩. ‘‘‘យទិ តេ រុចិតំ អយ្យេ, និព្ពានំ បរមំ សិវំ;

និព្ពាយិស្សាម សព្ពាបិ, ពុទ្ធានុញ្ញាយ សុព្ពតេ.

១១០. ‘‘‘មយំ សហាវ និក្ខន្តា, ឃរាបិ ច ភវាបិ ច;

សហាយេវ គមិស្សាម, និព្ពានំ បទមុត្តមំ’.

១១១. ‘‘‘និព្ពានាយ វជន្តីនំ, កិំ វក្ខាមី’តិ សា វទំ;

សហ សព្ពាហិ និគ្គញ្ឆិ, ភិក្ខុនីនិលយា តទា.

១១២. ‘‘ឧបស្សយេ យាធិវត្ថា, ទេវតា តា ខមន្តុ មេ;

ភិក្ខុនីនិលយស្សេទំ, បច្ឆិមំ ទស្សនំ មម.

១១៣. ‘‘ន ជរា មច្ចុ វា យត្ថ, អប្បិយេហិ សមាគមោ;

បិយេហិ ន វិយោគោត្ថិ, តំ វជិស្សំ [តំ វជ្ជិយំ (ស្យា.)] អសង្ខតំ.

១១៤. ‘‘អវីតរាគា តំ សុត្វា, វចនំ សុគតោរសា;

សោកដ្ដា បរិទេវិំសុ, អហោ នោ អប្បបុញ្ញតា.

១១៥. ‘‘ភិក្ខុនីនិលយោ សុញ្ញោ, ភូតោ តាហិ វិនា អយំ;

បភាតេ វិយ តារាយោ, ន ទិស្សន្តិ ជិនោរសា.

១១៦. ‘‘និព្ពានំ គោតមី យាតិ, សតេហិ សហ បញ្ចហិ;

នទីសតេហិវ សហ, គង្គា បញ្ចហិ សាគរំ.

១១៧. ‘‘រថិយាយ វជន្តិយោ [វជន្តិំ តំ (សី.), វជន្តិ តំ (ស្យា.), វជន្តានំ (បី.)], ទិស្វា សទ្ធា ឧបាសិកា;

ឃរា និក្ខម្ម បាទេសុ, និបច្ច ឥទមព្រវុំ.

១១៨. ‘‘‘បសីទស្សុ មហាភោគេ, អនាថាយោ វិហាយ នោ;

តយា ន យុត្តា [យុត្តំ (សី. ស្យា. បី.)] និព្ពាតុំ, ឥច្ឆដ្ដា វិលបិំសុ តា’.

១១៩. ‘‘តាសំ សោកបហានត្ថំ, អវោច មធុរំ គិរំ;

‘រុទិតេន អលំ បុត្តា, ហាសកាលោយមជ្ជ វោ.

១២០. ‘‘‘បរិញ្ញាតំ មយា ទុក្ខំ, ទុក្ខហេតុ វិវជ្ជិតោ;

និរោធោ មេ សច្ឆិកតោ, មគ្គោ ចាបិ សុភាវិតោ.

បឋមំ ភាណវារំ.

១២១. ‘‘‘បរិចិណ្ណោ មយា សត្ថា, កតំ ពុទ្ធស្ស សាសនំ;

ឱហិតោ គរុកោ ភារោ, ភវនេត្តិ សមូហតា.

១២២. ‘‘‘យស្សត្ថាយ បព្ពជិតា, អគារស្មានគារិយំ;

សោ មេ អត្ថោ អនុប្បត្តោ, សព្ពសំយោជនក្ខយោ.

១២៣. ‘‘‘ពុទ្ធោ តស្ស ច សទ្ធម្មោ, អនូនោ យាវ តិដ្ឋតិ;

និព្ពាតុំ តាវ កាលោ មេ, មា មំ សោចថ បុត្តិកា.

១២៤. ‘‘‘កោណ្ឌញ្ញានន្ទនន្ទាទី, តិដ្ឋន្តិ រាហុលោ ជិនោ;

សុខិតោ សហិតោ សង្ឃោ, ហតទព្ពា ច តិត្ថិយា.

១២៥. ‘‘‘ឱក្កាកវំសស្ស យសោ, ឧស្សិតោ មារមទ្ទនោ;

ននុ សម្បតិ កាលោ មេ, និព្ពានត្ថាយ បុត្តិកា.

១២៦. ‘‘‘ចិរប្បភុតិ យំ មយ្ហំ, បត្ថិតំ អជ្ជ សិជ្ឈតេ;

អានន្ទភេរិកាលោយំ, កិំ វោ អស្សូហិ បុត្តិកា.

១២៧. ‘‘‘សចេ មយិ ទយា អត្ថិ, យទិ ចត្ថិ កតញ្ញុតា;

សទ្ធម្មដ្ឋិតិយា សព្ពា, ករោថ វីរិយំ ទឡ្ហំ.

១២៨. ‘‘‘ថីនំ អទាសិ បព្ពជ្ជំ, សម្ពុទ្ធោ យាចិតោ មយា;

តស្មា យថាហំ នន្ទិស្សំ, តថា តមនុតិដ្ឋថ’.

១២៩. ‘‘តា ឯវមនុសាសិត្វា, ភិក្ខុនីហិ បុរក្ខតា;

ឧបេច្ច ពុទ្ធំ វន្ទិត្វា, ឥទំ វចនមព្រវិ.

១៣០. ‘‘‘អហំ សុគត តេ មាតា, ត្វញ្ច វីរ បិតា មម;

សទ្ធម្មសុខទ [សទ្ធម្មសុខទោ (សី. ស្យា. បី.)] នាថ, តយា ជាតាម្ហិ គោតម.

១៣១. ‘‘‘សំវទ្ធិតោយំ សុគត, រូបកាយោ មយា តវ;

អនិន្ទិតោ [អានន្ទិយោ (ស្យា.), អនិន្ទិយោ (បី.)] ធម្មកាយោ [ធម្មតនុ (សី. បី. ក.)], មម សំវទ្ធិតោ តយា.

១៣២. ‘‘‘មុហុត្តំ តណ្ហាសមណំ, ខីរំ ត្វំ បាយិតោ មយា;

តយាហំ សន្តមច្ចន្តំ, ធម្មខីរញ្ហិ [ធម្មខីរម្បិ (ស្យា., ក.)] បាយិតា.

១៣៣. ‘‘‘ពន្ធនារក្ខនេ មយ្ហំ, អណណោ [អនណោ (សី. ស្យា. បី.)] ត្វំ មហាមុនេ;

បុត្តកាមា ថិយោ យាចំ, លភន្តិ តាទិសំ សុតំ.

១៣៤. ‘‘‘មន្ធាតាទិនរិន្ទានំ, យា មាតា សា ភវណ្ណវេ;

និមុគ្គាហំ តយា បុត្ត, តារិតា ភវសាគរា.

១៣៥. ‘‘‘រញ្ញោ មាតា មហេសីតិ, សុលភំ នាមមិត្ថិនំ;

ពុទ្ធមាតាតិ យំ នាមំ, ឯតំ បរមទុល្លភំ.

១៣៦. ‘‘‘តញ្ច លទ្ធំ មហាវីរ, បណិធានំ មមំ តយា;

អណុកំ វា មហន្តំ វា, តំ សព្ពំ បូរិតំ មយា.

១៣៧. ‘‘‘បរិនិព្ពាតុមិច្ឆាមិ, វិហាយេមំ កឡេវរំ;

អនុជានាហិ មេ វីរ, ទុក្ខន្តករ នាយក.

១៣៨. ‘‘‘ចក្កង្កុសធជាកិណ្ណេ, បាទេ កមលកោមលេ;

បសារេហិ បណាមំ តេ, ករិស្សំ បុត្តឧត្តមេ [បុត្តបេមសា (សី. បី.), បុត្តបេមហំ (ស្យា.)].

១៣៩. ‘‘‘សុវណ្ណរាសិសង្កាសំ, សរីរំ កុរុ បាកដំ;

កត្វា ទេហំ សុទិដ្ឋំ តេ, សន្តិំ គច្ឆាមិ នាយក’.

១៤០. ‘‘ទ្វត្តិំសលក្ខណូបេតំ, សុប្បភាលង្កតំ តនុំ;

សញ្ឈាឃនាវ ពាលក្កំ, មាតុច្ឆំ ទស្សយី ជិនោ.

១៤១. ‘‘ផុល្លារវិន្ទសំកាសេ, តរុណាទិច្ចសប្បភេ;

ចក្កង្កិតេ បាទតលេ, តតោ សា សិរសា បតិ.

១៤២. ‘‘‘បណមាមិ នរាទិច្ច, អាទិច្ចកុលកេតុកំ;

បច្ឆិមេ មរណេ មយ្ហំ [សរណំ មយ្ហំ (ស្យា.)], ន តំ ឥក្ខាមហំ បុនោ.

១៤៣. ‘‘‘ឥត្ថិយោ នាម លោកគ្គ, សព្ពទោសាករា មតា;

យទិ កោ ចត្ថិ ទោសោ មេ, ខមស្សុ ករុណាករ.

១៤៤. ‘‘‘ឥត្ថិកានញ្ច បព្ពជ្ជំ, ហំ តំ យាចិំ បុនប្បុនំ;

តត្ថ ចេ អត្ថិ ទោសោ មេ, តំ ខមស្សុ នរាសភ.

១៤៥. ‘‘‘មយា ភិក្ខុនិយោ វីរ, តវានុញ្ញាយ សាសិតា;

តត្រ ចេ អត្ថិ ទុន្នីតំ, តំ ខមស្សុ ខមាធិប [ខមាធិតិ (ស្យា.), ខមាបិតោ (ក.)].

១៤៦. ‘‘‘អក្ខន្តេ នាម ខន្តព្ពំ, កិំ ភវេ គុណភូសនេ;

កិមុត្តរំ តេ វក្ខាមិ, និព្ពានាយ វជន្តិយា.

១៤៧. ‘‘‘សុទ្ធេ អនូនេ មម ភិក្ខុសង្ឃេ, លោកា ឥតោ និស្សរិតុំ ខមន្តេ;

បភាតកាលេ ព្យសនង្គតានំ, ទិស្វាន និយ្យាតិវ ចន្ទលេខា’.

១៤៨. ‘‘‘តទេតរា ភិក្ខុនិយោ ជិនគ្គំ, តារាវ ចន្ទានុគតា សុមេរុំ;

បទក្ខិណំ កច្ច និបច្ច បាទេ, ឋិតា មុខន្តំ សមុទិក្ខមានា.

១៤៩. ‘‘‘ន តិត្តិបុព្ពំ តវ ទស្សនេន, ចក្ខុំ ន សោតំ តវ ភាសិតេន;

ចិត្តំ មមំ កេវលមេកមេវ, បប្បុយ្យ តំ ធម្មរសេន តិត្តិ.

១៥០. ‘‘‘នទតោ បរិសាយំ តេ, វាទិតព្ពបហារិនោ;

យេ តេ ទក្ខន្តិ វទនំ, ធញ្ញា តេ នរបុង្គវ.

១៥១. ‘‘‘ទីឃង្គុលី តម្ពនខេ, សុភេ អាយតបណ្ហិកេ;

យេ បាទេ បណមិស្សន្តិ [បណមាយន្តិ (ស្យា.)], តេបិ ធញ្ញា គុណន្ធរ.

១៥២. ‘‘‘មធុរានិ បហដ្ឋានិ, ទោសគ្ឃានិ ហិតានិ ច;

យេ តេ វាក្យានិ សុយ្យន្តិ, តេបិ ធញ្ញា នរុត្តម.

១៥៣. ‘‘‘ធញ្ញាហំ តេ មហាវីរ, បាទបូជនតប្បរា [មានបូជនតប្បរា (ក.)];

តិណ្ណសំសារកន្តារា, សុវាក្យេន សិរីមតោ’.

១៥៤. ‘‘តតោ សា អនុសាវេត្វា [អនុមានេ ត្វា (ក.)], ភិក្ខុសង្ឃម្បិ សុព្ពតា;

រាហុលានន្ទនន្ទេ ច, វន្ទិត្វា ឥទមព្រវិ.

១៥៥. ‘‘‘អាសីវិសាលយសមេ, រោគាវាសេ កឡេវរេ;

និព្ពិន្ទា ទុក្ខសង្ឃាដេ, ជរាមរណគោចរេ.

១៥៦. ‘‘‘នានាកលិមលាកិណ្ណេ [នានាកុណបមលាកិណ្ណេ (ស្យា.), នានាកាឡមលាកិណ្ណេ (ក.)], បរាយត្តេ និរីហកេ;

តេន និព្ពាតុមិច្ឆាមិ, អនុមញ្ញថ បុត្តកា’.

១៥៧. ‘‘នន្ទោ រាហុលភទ្ទោ ច, វីតសោកា និរាសវា;

ឋិតាចលដ្ឋិតិ ថិរា, ធម្មតមនុចិន្តយុំ.

១៥៨. ‘‘‘ធិរត្ថុ សង្ខតំ លោលំ, អសារំ កទលូបមំ;

មាយាមរីចិសទិសំ, ឥតរំ អនវដ្ឋិតំ.

១៥៩. ‘‘‘យត្ថ នាម ជិនស្សាយំ, មាតុច្ឆា ពុទ្ធបោសិកា;

គោតមី និធនំ យាតិ, អនិច្ចំ សព្ពសង្ខតំ’.

១៦០. ‘‘អានន្ទោ ច តទា សេខោ, សោកដ្ដោ [កនិដ្ឋោ (ស្យា.)] ជិនវច្ឆលោ;

តត្ថស្សូនិ ករោន្តោ សោ, ករុណំ បរិទេវតិ.

១៦១. ‘‘ហា សន្តិំ [ភាសន្តី (ស្យា.)] គោតមី យាតិ, នូន ពុទ្ធោបិ និព្ពុតិំ;

គច្ឆតិ ន ចិរេនេវ, អគ្គិរិវ និរិន្ធនោ.

១៦២. ‘‘ឯវំ វិលាបមានំ តំ, អានន្ទំ អាហ គោតមី;

សុតសាគរគម្ភីរ, ពុទ្ធោបដ្ឋានតប្បរ.

១៦៣. ‘‘‘ន យុត្តំ សោចិតុំ បុត្ត, ហាសកាលេ ឧបដ្ឋិតេ;

តយា មេ សរណំ បុត្ត, និព្ពានំ តមុបាគតំ.

១៦៤. ‘‘‘តយា តាត សមជ្ឈិដ្ឋោ, បព្ពជ្ជំ អនុជានិ នោ;

មា បុត្ត វិមនោ ហោហិ, សផលោ តេ បរិស្សមោ.

១៦៥. ‘‘‘យំ ន ទិដ្ឋំ បុរាណេហិ, តិត្ថិកាចរិយេហិបិ;

តំ បទំ សុកុមារីហិ, សត្តវស្សាហិ វេទិតំ.

១៦៦. ‘‘‘ពុទ្ធសាសនបាលេត, បច្ឆិមំ ទស្សនំ តវ;

តត្ថ គច្ឆាមហំ បុត្ត, គតោ យត្ថ ន ទិស្សតេ.

១៦៧. ‘‘‘កទាចិ ធម្មំ ទេសេន្តោ, ខិបី លោកគ្គនាយកោ;

តទាហំ អាសីសវាចំ, អវោចំ អនុកម្បិកា.

១៦៨. ‘‘‘ចិរំ ជីវ មហាវីរ, កប្បំ តិដ្ឋ មហាមុនេ;

សព្ពលោកស្ស អត្ថាយ, ភវស្សុ អជរាមរោ.

១៦៩. ‘‘‘តំ តថាវាទិនិំ ពុទ្ធោ, មមំ សោ ឯតទព្រវិ;

‘ន ហេវំ វន្ទិយា ពុទ្ធា, យថា វន្ទសិ គោតមី.

១៧០. ‘‘‘កថំ ចរហិ សព្ពញ្ញូ, វន្ទិតព្ពា តថាគតា;

កថំ អវន្ទិយា ពុទ្ធា, តំ មេ អក្ខាហិ បុច្ឆិតោ.