២. ឯកូបោសថិកវគ្គោ

១. ឯកូបោសថិកាថេរីអបទានំ

១. ‘‘នគរេ ពន្ធុមតិយា, ពន្ធុមា នាម ខត្តិយោ;

ទិវសេ បុណ្ណមាយ សោ, ឧបវសិ ឧបោសថំ.

២. ‘‘អហំ តេន សមយេន, កុម្ភទាសី អហំ តហិំ;

ទិស្វា សរាជកំ សេនំ, ឯវាហំ ចិន្តយិំ តទា.

៣. ‘រាជាបិ រជ្ជំ ឆឌ្ឌេត្វា, ឧបវសិ ឧបោសថំ;

សផលំ នូន តំ កម្មំ, ជនកាយោ បមោទិតោ’.

៤. ‘‘យោនិសោ បច្ចវេក្ខិត្វា, ទុគ្គច្ចញ្ច [ទុគ្គតិញ្ច (ស្យា.)] ទលិទ្ទតំ [ទឡិទ្ទតំ (សី.)];

មានសំ សម្បហំសិត្វា, ឧបវសិំ ឧបោសថំ.

៥. ‘‘អហំ ឧបោសថំ កត្វា, សម្មាសម្ពុទ្ធសាសនេ;

តេន កម្មេន សុកតេន, តាវតិំសមគច្ឆហំ.

៦. ‘‘តត្ថ មេ សុកតំ ព្យម្ហំ, ឧព្ភយោជនមុគ្គតំ [ឧទ្ធំ យោជនមុគ្គតំ (សី. ស្យា. បី.)];

កូដាគារវរូបេតំ, មហាសនសុភូសិតំ.

៧. ‘‘អច្ឆរា សតសហស្សា, ឧបតិដ្ឋន្តិ មំ សទា;

អញ្ញេ ទេវេ អតិក្កម្ម, អតិរោចាមិ សព្ពទា.

៨. ‘‘ចតុសដ្ឋិ ទេវរាជូនំ, មហេសិត្តមការយិំ;

តេសដ្ឋិ ចក្កវត្តីនំ, មហេសិត្តមការយិំ.

៩. ‘‘សុវណ្ណវណ្ណា ហុត្វាន, ភវេសុ សំសរាមហំ;

សព្ពត្ថ បវរា ហោមិ, ឧបោសថស្សិទំ ផលំ.

១០. ‘‘ហត្ថិយានំ អស្សយានំ, រថយានញ្ច សីវិកំ [កេវលំ (សី. ស្យា. បី.)];

លភាមិ សព្ពមេវេតំ, ឧបោសថស្សិទំ ផលំ.

១១. ‘‘សោណ្ណមយំ រូបិមយំ, អថោបិ ផលិកាមយំ;

លោហិតង្គមយញ្ចេវ, សព្ពំ បដិលភាមហំ.

១២. ‘‘កោសេយ្យកម្ពលិយានិ, ខោមកប្បាសិកានិ ច;

មហគ្ឃានិ ច វត្ថានិ, សព្ពំ បដិលភាមហំ.

១៣. ‘‘អន្នំ បានំ ខាទនីយំ, វត្ថសេនាសនានិ ច;

សព្ពមេតំ បដិលភេ, ឧបោសថស្សិទំ ផលំ.

១៤. ‘‘វរគន្ធញ្ច មាលញ្ច, ចុណ្ណកញ្ច វិលេបនំ;

សព្ពមេតំ បដិលភេ, ឧបោសថស្សិទំ ផលំ.

១៥. ‘‘កូដាគារញ្ច បាសាទំ, មណ្ឌបំ ហម្មិយំ គុហំ;

សព្ពមេតំ បដិលភេ, ឧបោសថស្សិទំ ផលំ.

១៦. ‘‘ជាតិយា សត្តវស្សាហំ, បព្ពជិំ អនគារិយំ;

អឌ្ឍមាសេ អសម្បត្តេ, អរហត្តមបាបុណិំ.

១៧. ‘‘កិលេសា ឈាបិតា មយ្ហំ, ភវា សព្ពេ សមូហតា;

សព្ពាសវបរិក្ខីណា, នត្ថិ ទានិ បុនព្ភវោ.

១៨. ‘‘ឯកនវុតិតោ កប្បេ, យំ កម្មមករិំ តទា;

ទុគ្គតិំ នាភិជានាមិ, ឧបោសថស្សិទំ ផលំ.

១៩. ‘‘កិលេសា ឈាបិតា មយ្ហំ…បេ… វិហរាមិ អនាសវា.

២០. ‘‘ស្វាគតំ វត មេ អាសិ…បេ… កតំ ពុទ្ធស្ស សាសនំ.

២១. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ ឯកូបោសថិកា ភិក្ខុនី ឥមា គាថាយោ អភាសិត្ថាតិ.

ឯកូបោសថិកាថេរិយាបទានំ បឋមំ.

២. សឡលបុប្ផិកាថេរីអបទានំ

២២. ‘‘ចន្ទភាគានទីតីរេ, អហោសិំ កិន្នរី តទា;

អទ្ទសាហំ ទេវទេវំ, ចង្កមន្តំ នរាសភំ.

២៣. ‘‘ឱចិនិត្វាន សឡលំ, ពុទ្ធសេដ្ឋស្សទាសហំ;

ឧបសិង្ឃិ មហាវីរោ, សឡលំ ទេវគន្ធិកំ.

២៤. ‘‘បដិគ្គហេត្វា សម្ពុទ្ធោ, វិបស្សី លោកនាយកោ;

ឧបសិង្ឃិ មហាវីរោ, បេក្ខមានាយ មេ តទា.

២៥. ‘‘អញ្ជលិំ បគ្គហេត្វាន, វន្ទិត្វា ទ្វិបទុត្តមំ [ទិបទុត្តមំ (សី. ស្យា. បី.)];

សកំ ចិត្តំ បសាទេត្វា, តតោ បព្ពតមារុហិំ.

២៦. ‘‘ឯកនវុតិតោ កប្បេ, យំ បុប្ផមទទិំ តទា;

ទុគ្គតិំ នាភិជានាមិ, ពុទ្ធបូជាយិទំ ផលំ.

២៧. ‘‘កិលេសា ឈាបិតា មយ្ហំ…បេ… វិហរាមិ អនាសវា.

២៨. ‘‘ស្វាគតំ វត មេ អាសិ…បេ… កតំ ពុទ្ធស្ស សាសនំ.

២៩. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ សឡលបុប្ផិកា ភិក្ខុនី ឥមា គាថាយោ អភាសិត្ថាតិ.

សឡលបុប្ផិកាថេរិយាបទានំ ទុតិយំ.

៣. មោទកទាយិកាថេរីអបទានំ

៣០. ‘‘នគរេ ពន្ធុមតិយា, កុម្ភទាសី អហោសហំ;

មម ភាគំ គហេត្វាន, គច្ឆំ ឧទកហារិកា [ឧទកហារិកំ (សី.), ឧទកហារិកេ (ស្យា.)].

៣១. ‘‘បន្ថម្ហិ សមណំ ទិស្វា, សន្តចិត្តំ សមាហតំ;

បសន្នចិត្តា សុមនា, មោទកេ តីណិទាសហំ.

៣២. ‘‘តេន កម្មេន សុកតេន, ចេតនាបណិធីហិ ច;

ឯកនវុតិកប្បានិ [ឯកូនតិំសកប្បានិ (ស្យា.)], វិនិបាតំ នគច្ឆហំ.

៣៣. ‘‘សម្បត្តិ តំ [សម្បត្តិញ្ច (ស្យា.), សម្បត្តិកំ (ក.)] ករិត្វាន, សព្ពំ អនុភវិំ អហំ;

មោទកេ តីណិ ទត្វាន, បត្តាហំ អចលំ បទំ.

៣៤. ‘‘កិលេសា ឈាបិតា មយ្ហំ…បេ… វិហរាមិ អនាសវា.

៣៥. ‘‘ស្វាគតំ វត មេ អាសិ…បេ… កតំ ពុទ្ធស្ស សាសនំ.

៣៦. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ មោទកទាយិកា ភិក្ខុនី ឥមា គាថាយោ អភាសិត្ថាតិ.

មោទកទាយិកាថេរិយាបទានំ តតិយំ.

៤. ឯកាសនទាយិកាថេរីអបទានំ

៣៧. ‘‘នគរេ ហំសវតិយា, អហោសិំ ពាលិកា [មាលិកា (ស្យា. បី.)] តទា;

មាតា ច មេ បិតា ចេវ, កម្មន្តំ អគមំសុ តេ.

៣៨. ‘‘មជ្ឈន្ហិកម្ហិ សូរិយេ, អទ្ទសំ សមណំ អហំ;

វីថិយា អនុគច្ឆន្តំ, អាសនំ បញ្ញបេសហំ.

៣៩. ‘‘គោនកាវិកតិកាហិ [គោនកចិត្តកាទីហិ (សី.)], បញ្ញបេត្វា មមាសនំ;

បសន្នចិត្តា សុមនា, ឥទំ វចនមព្រវិំ.

៤០. ‘‘‘សន្តត្តា កុថិតា ភូមិ, សូរោ មជ្ឈន្ហិកេ ឋិតោ;

មាលុតា ច ន វាយន្តិ, កាលោ ចេវេត្ថ មេហិតិ [ចេត្ថ ឧបដ្ឋិតោ (សី.), ចេវត្ថំ ឯតិ តំ (បី.)].

៤១. ‘‘‘បញ្ញត្តមាសនមិទំ, តវត្ថាយ មហាមុនិ;

អនុកម្បំ ឧបាទាយ, និសីទ មម អាសនេ’.

៤២. ‘‘និសីទិ តត្ថ សមណោ, សុទន្តោ សុទ្ធមានសោ;

តស្ស បត្តំ គហេត្វាន, យថារន្ធំ អទាសហំ.

៤៣. ‘‘តេន កម្មេន សុកតេន, ចេតនាបណិធីហិ ច;

ជហិត្វា មានុសំ ទេហំ, តាវតិំសមគច្ឆហំ.

៤៤. ‘‘តត្ថ មេ សុកតំ ព្យម្ហំ, អាសនេន សុនិម្មិតំ;

សដ្ឋិយោជនមុព្ពេធំ, តិំសយោជនវិត្ថតំ.

៤៥. ‘‘សោណ្ណមយា មណិមយា, អថោបិ ផលិកាមយា;

លោហិតង្គមយា ចេវ, បល្លង្កា វិវិធា មម.

៤៦. ‘‘តូលិកា វិកតិកាហិ, កដ្ដិស្សចិត្តកាហិ ច;

ឧទ្ទឯកន្តលោមី ច, បល្លង្កា មេ សុសណ្ឋិតា [សុសន្ថតា (សី.)].

៤៧. ‘‘យទា ឥច្ឆាមិ គមនំ, ហាសខិឌ្ឌសមប្បិតា;

សហ បល្លង្កសេដ្ឋេន, គច្ឆាមិ មម បត្ថិតំ.

៤៨. ‘‘អសីតិ ទេវរាជូនំ, មហេសិត្តមការយិំ;

សត្តតិ ចក្កវត្តីនំ, មហេសិត្តមការយិំ.

៤៩. ‘‘ភវាភវេ សំសរន្តី, មហាភោគំ លភាមហំ;

ភោគេ មេ ឩនតា នត្ថិ, ឯកាសនស្សិទំ ផលំ [ឯកាសនផលំ ឥទំ (សព្ពត្ថ) ឯវមុបរិបិ].

៥០. ‘‘ទុវេ ភវេ សំសរាមិ, ទេវត្តេ អថ មានុសេ;

អញ្ញេ ភវេ ន ជានាមិ, ឯកាសនស្សិទំ ផលំ.

៥១. ‘‘ទុវេ កុលេ បជាយាមិ, ខត្តិយេ ចាបិ ព្រាហ្មណេ;

ឧច្ចាកុលីនា [ឧច្ចាកុលិកា (ស្យា. បី. ក.)] សព្ពត្ថ, ឯកាសនស្សិទំ ផលំ.

៥២. ‘‘ទោមនស្សំ ន ជានាមិ, ចិត្តសន្តាបនំ មម;

វេវណ្ណិយំ ន ជានាមិ, ឯកាសនស្សិទំ ផលំ.

៥៣. ‘‘ធាតិយោ មំ ឧបដ្ឋន្តិ, ខុជ្ជា ចេលាបិកា [ខេលាបិកា (សី.), ចេលាវិកា (បី.)] ពហូ;

អង្កេន អង្កំ គច្ឆាមិ, ឯកាសនស្សិទំ ផលំ.

៥៤. ‘‘អញ្ញា ន្ហាបេន្តិ ភោជេន្តិ, អញ្ញា រមេន្តិ មំ សទា;

អញ្ញា គន្ធំ វិលិម្បន្តិ, ឯកាសនស្សិទំ ផលំ [អញ្ញា មមេវ ន្ហាបេន្តិ, អញ្ញា ភោជេន្តិ ភោជនំ; អញ្ញា មំ អលង្ករោន្តិ, អញ្ញា រមេន្តិ មំ សទ្ធា; (ស្យា.)].

៥៥. ‘‘មណ្ឌបេ រុក្ខមូលេ វា, សុញ្ញាគារេ វសន្តិយា;

មម សង្កប្បមញ្ញាយ, បល្លង្កោ ឧបតិដ្ឋតិ.

៥៦. ‘‘អយំ បច្ឆិមកោ មយ្ហំ, ចរិមោ វត្តតេ ភវោ;

អជ្ជាបិ រជ្ជំ ឆឌ្ឌេត្វា, បព្ពជិំ អនគារិយំ.

៥៧. ‘‘សតសហស្សិតោ កប្បេ, យំ ទានមទទិំ តទា;

ទុគ្គតិំ នាភិជានាមិ, ឯកាសនស្សិទំ ផលំ.

៥៨. ‘‘កិលេសា ឈាបិតា មយ្ហំ…បេ… វិហរាមិ អនាសវា.

៥៩. ‘‘ស្វាគតំ វត មេ អាសិ…បេ… កតំ ពុទ្ធស្ស សាសនំ.

៦០. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ ឯកាសនទាយិកា ភិក្ខុនី ឥមា គាថាយោ អភាសិត្ថាតិ.

ឯកាសនទាយិកាថេរិយាបទានំ ចតុត្ថំ.

៥. បញ្ចទីបទាយិកាថេរីអបទានំ

៦១. ‘‘នគរេ ហំសវតិយា, ចារិកី [ចារិកា (សី. ស្យា.)] អាសហំ តទា;

អារាមេន ច អារាមំ [អារាមេន វិហារេន (ស្យា. បី.)], ចរាមិ កុសលត្ថិកា.

៦២. ‘‘កាឡបក្ខម្ហិ ទិវសេ, អទ្ទសំ ពោធិមុត្តមំ;

តត្ថ ចិត្តំ បសាទេត្វា, ពោធិមូលេ និសីទហំ.

៦៣. ‘‘គរុចិត្តំ ឧបដ្ឋេត្វា, សិរេ កត្វាន អញ្ជលិំ;

សោមនស្សំ បវេទេត្វា, ឯវំ ចិន្តេសិ តាវទេ.

៦៤. ‘‘‘យទិ ពុទ្ធោ អមិតគុណោ, អសមប្បដិបុគ្គលោ;

ទស្សេតុ បាដិហីរំ មេ, ពោធិ ឱភាសតុ អយំ’.

៦៥. ‘‘សហ អាវជ្ជិតេ មយ្ហំ, ពោធិ បជ្ជលិ តាវទេ;

សព្ពសោណ្ណមយា អាសិ, ទិសា សព្ពា វិរោចតិ.

៦៦. ‘‘សត្តរត្តិន្ទិវំ តត្ថ, ពោធិមូលេ និសីទហំ;

សត្តមេ ទិវសេ បត្តេ, ទីបបូជំ អកាសហំ.

៦៧. ‘‘អាសនំ បរិវារេត្វា, បញ្ច ទីបានិ បជ្ជលុំ;

យាវ ឧទេតិ សូរិយោ, ទីបា មេ បជ្ជលុំ តទា.

៦៨. ‘‘តេន កម្មេន សុកតេន, ចេតនាបណិធីហិ ច;

ជហិត្វា មានុសំ ទេហំ, តាវតិំសមគច្ឆហំ.

៦៩. ‘‘តត្ថ មេ សុកតំ ព្យម្ហំ, បញ្ចទីបាតិ វុច្ចតិ;

សដ្ឋិយោជនមុព្ពេធំ, តិំសយោជនវិត្ថតំ.

៧០. ‘‘អសង្ខិយានិ ទីបានិ, បរិវារេ ជលិំសុ មេ;

យាវតា ទេវភវនំ, ទីបាលោកេន ជោតតិ.

៧១. ‘‘បរម្មុខា [បុព្ពមុខា (ស្យា.)] និសីទិត្វា, យទិ ឥច្ឆាមិ បស្សិតុំ;

ឧទ្ធំ អធោ ច តិរិយំ, សព្ពំ បស្សាមិ ចក្ខុនា.

៧២. ‘‘យាវតា អភិកង្ខាមិ, ទដ្ឋុំ សុគតទុគ្គតេ [សុកតទុក្កដេ (បី.)];

តត្ថ អាវរណំ នត្ថិ, រុក្ខេសុ បព្ពតេសុ វា.

៧៣. ‘‘អសីតិ ទេវរាជូនំ, មហេសិត្តមការយិំ;

សតានំ ចក្កវត្តីនំ, មហេសិត្តមការយិំ.

៧៤. ‘‘យំ យំ យោនុបបជ្ជាមិ, ទេវត្តំ អថ មានុសំ;

ទីបសតសហស្សានិ, បរិវារេ ជលន្តិ មេ.