១០. បដាចារាថេរីអបទានំ

៤៦៨. ‘‘បទុមុត្តរោ នាម ជិនោ, សព្ពធម្មាន បារគូ;

ឥតោ សតសហស្សម្ហិ, កប្បេ ឧប្បជ្ជិ នាយកោ.

៤៦៩. ‘‘តទាហំ ហំសវតិយំ, ជាតា សេដ្ឋិកុលេ អហុំ;

នានារតនបជ្ជោតេ, មហាសុខសមប្បិតា.

៤៧០. ‘‘ឧបេត្វា តំ មហាវីរំ, អស្សោសិំ ធម្មទេសនំ;

តតោ ជាតបសាទាហំ, ឧបេសិំ សរណំ ជិនំ.

៤៧១. ‘‘តតោ វិនយធារីនំ, អគ្គំ វណ្ណេសិ នាយកោ;

ភិក្ខុនិំ លជ្ជិនិំ តាទិំ, កប្បាកប្បវិសារទំ.

៤៧២. ‘‘តទា មុទិតចិត្តាហំ, តំ ឋានមភិកង្ខិនី;

និមន្តេត្វា ទសពលំ, សសង្ឃំ លោកនាយកំ.

៤៧៣. ‘‘ភោជយិត្វាន សត្តាហំ, ទទិត្វាវ តិចីវរំ [ទទិត្វា បត្តចីវរំ (ស្យា.)];

និបច្ច សិរសា បាទេ, ឥទំ វចនមព្រវិំ.

៤៧៤. ‘‘‘យា តយា វណ្ណិតា វីរ, ឥតោ អដ្ឋមកេ មុនិ;

តាទិសាហំ ភវិស្សាមិ, យទិ សិជ្ឈតិ នាយក’.

៤៧៥. ‘‘តទា អវោច មំ សត្ថា, ‘ភទ្ទេ មា ភាយិ អស្សស;

អនាគតម្ហិ អទ្ធានេ, លច្ឆសេ តំ មនោរថំ.

៤៧៦. ‘‘‘សតសហស្សិតោ កប្បេ, ឱក្កាកកុលសម្ភវោ;

គោតមោ នាម គោត្តេន, សត្ថា លោកេ ភវិស្សតិ.

៤៧៧. ‘‘‘តស្ស ធម្មេសុ ទាយាទា, ឱរសា ធម្មនិម្មិតា;

បដាចារាតិ នាមេន, ហេស្សតិ សត្ថុ សាវិកា’.

៤៧៨. ‘‘តទាហំ មុទិតា [បមុទី (ក.)] ហុត្វា, យាវជីវំ តទា ជិនំ;

មេត្តចិត្តា បរិចរិំ, សសង្ឃំ លោកនាយកំ.

៤៧៩. ‘‘តេន កម្មេន សុកតេន, ចេតនាបណិធីហិ ច;

ជហិត្វា មានុសំ ទេហំ, តាវតិំសមគច្ឆហំ.

៤៨០. ‘‘ឥមម្ហិ ភទ្ទកេ កប្បេ, ព្រហ្មពន្ធុ មហាយសោ;

កស្សបោ នាម គោត្តេន, ឧប្បជ្ជិ វទតំ វរោ.

៤៨១. ‘‘ឧបដ្ឋាកោ មហេសិស្ស, តទា អាសិ នរិស្សរោ;

កាសិរាជា កិកី នាម, ពារាណសិបុរុត្តមេ.

៤៨២. ‘‘តស្សាសិំ តតិយា ធីតា, ភិក្ខុនី ឥតិ វិស្សុតា;

ធម្មំ សុត្វា ជិនគ្គស្ស, បព្ពជ្ជំ សមរោចយិំ.

៤៨៣. ‘‘អនុជានិ ន នោ តាតោ, អគារេវ តទា មយំ;

វីសវស្សសហស្សានិ, វិចរិម្ហ អតន្ទិតា.

៤៨៤. ‘‘កោមារិព្រហ្មចរិយំ, រាជកញ្ញា សុខេធិតា;

ពុទ្ធោបដ្ឋាននិរតា, មុទិតា សត្តធីតរោ.

៤៨៥. ‘‘សមណី សមណគុត្តា ច, ភិក្ខុនី ភិក្ខុទាយិកា;

ធម្មា ចេវ សុធម្មា ច, សត្តមី សង្ឃទាយិកា.

៤៨៦. ‘‘អហំ ឧប្បលវណ្ណា ច, ខេមា ភទ្ទា ច ភិក្ខុនី;

កិសាគោតមី ធម្មទិន្នា, វិសាខា ហោតិ សត្តមី.

៤៨៧. ‘‘តេហិ កម្មេហិ សុកតេហិ, ចេតនាបណិធីហិ ច;

ជហិត្វា មានុសំ ទេហំ, តាវតិំសមគច្ឆហំ.

៤៨៨. ‘‘បច្ឆិមេ ច ភវេ ទានិ, ជាតា សេដ្ឋិកុលេ អហំ;

សាវត្ថិយំ បុរវរេ, ឥទ្ធេ ផីតេ មហទ្ធនេ.

៤៨៩. ‘‘យទា ច យោព្ពនូបេតា, វិតក្កវសគា អហំ;

នរំ ជារបតិំ ទិស្វា, តេន សទ្ធិំ អគច្ឆហំ.

៤៩០. ‘‘ឯកបុត្តបសូតាហំ, ទុតិយោ កុច្ឆិយា មមំ;

តទាហំ មាតាបិតរោ, ឱក្ខាមីតិ [ឥក្ខាមីតិ (ស្យា.), ទក្ខាមីតិ (សី.)] សុនិច្ឆិតា.

៤៩១. ‘‘នារោចេសិំ បតិំ មយ្ហំ, តទា តម្ហិ បវាសិតេ;

ឯកិកា និគ្គតា គេហា, គន្តុំ សាវត្ថិមុត្តមំ.

៤៩២. ‘‘តតោ មេ សាមិ អាគន្ត្វា, សម្ភាវេសិ បថេ មមំ;

តទា មេ កម្មជា វាតា, ឧប្បន្នា អតិទារុណា.

៤៩៣. ‘‘ឧដ្ឋិតោ ច មហាមេឃោ, បសូតិសមយេ មម;

ទព្ពត្ថាយ តទា គន្ត្វា, សាមិ សប្បេន មារិតោ.

៤៩៤. ‘‘តទា វិជាតទុក្ខេន, អនាថា កបណា អហំ;

កុន្នទិំ បូរិតំ ទិស្វា, គច្ឆន្តី សកុលាលយំ.

៤៩៥. ‘‘ពាលំ អាទាយ អតរិំ, បារកូលេ ច ឯកកំ;

សាយេត្វា [បាយេត្វា (ស្យា.), បាតេត្វា (ក.)] ពាលកំ បុត្តំ, ឥតរំ តរណាយហំ.

៤៩៦. ‘‘និវត្តា ឧក្កុសោ ហាសិ, តរុណំ វិលបន្តកំ;

ឥតរញ្ច វហី សោតោ, សាហំ សោកសមប្បិតា.

៤៩៧. ‘‘សាវត្ថិនគរំ គន្ត្វា, អស្សោសិំ សជនេ មតេ;

តទា អវោចំ សោកដ្ដា, មហាសោកសមប្បិតា.

៤៩៨. ‘‘ឧភោ បុត្តា កាលង្កតា, បន្ថេ មយ្ហំ បតី មតោ;

មាតា បិតា ច ភាតា ច, ឯកចិតម្ហិ ឌយ្ហរេ.

៤៩៩. ‘‘តទា កិសា ច បណ្ឌុ ច, អនាថា ទីនមានសា;

ឥតោ តតោ ភមន្តីហំ [គច្ឆន្តីហំ (ស្យា.), គមេន្តីហំ (ក.)], អទ្ទសំ នរសារថិំ.

៥០០. ‘‘តតោ អវោច មំ សត្ថា, ‘បុត្តេ មា សោចិ អស្សស;

អត្តានំ តេ គវេសស្សុ, កិំ និរត្ថំ វិហញ្ញសិ.

៥០១. ‘‘‘ន សន្តិ បុត្តា តាណាយ, ន ញាតី នបិ ពន្ធវា;

អន្តកេនាធិបន្នស្ស, នត្ថិ ញាតីសុ តាណតា’.

៥០២. ‘‘តំ សុត្វា មុនិនោ វាក្យំ, បឋមំ ផលមជ្ឈគំ;

បព្ពជិត្វាន នចិរំ, អរហត្តមបាបុណិំ.

៥០៣. ‘‘ឥទ្ធីសុ ច វសី ហោមិ, ទិព្ពាយ សោតធាតុយា;

បរចិត្តានិ ជានាមិ, សត្ថុសាសនការិកា.

៥០៤. ‘‘បុព្ពេនិវាសំ ជានាមិ, ទិព្ពចក្ខុ វិសោធិតំ;

ខេបេត្វា អាសវេ សព្ពេ, វិសុទ្ធាសិំ សុនិម្មលា.

៥០៥. ‘‘តតោហំ វិនយំ សព្ពំ, សន្តិកេ សព្ពទស្សិនោ;

ឧគ្គហិំ សព្ពវិត្ថារំ, ព្យាហរិញ្ច យថាតថំ.

៥០៦. ‘‘ជិនោ តស្មិំ គុណេ តុដ្ឋោ, ឯតទគ្គេ ឋបេសិ មំ;

អគ្គា វិនយធារីនំ, បដាចារាវ ឯកិកា.

៥០៧. ‘‘បរិចិណ្ណោ មយា សត្ថា, កតំ ពុទ្ធស្ស សាសនំ;

ឱហិតោ គរុកោ ភារោ, ភវនេត្តិ សមូហតា.

៥០៨. ‘‘យស្សត្ថាយ បព្ពជិតា, អគារស្មានគារិយំ;

សោ មេ អត្ថោ អនុប្បត្តោ, សព្ពសំយោជនក្ខយោ.

៥០៩. ‘‘កិលេសា ឈាបិតា មយ្ហំ…បេ… វិហរាមិ អនាសវា.

៥១០. ‘‘ស្វាគតំ វត មេ អាសិ…បេ… កតំ ពុទ្ធស្ស សាសនំ.

៥១១. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ បដាចារា ភិក្ខុនី ឥមា គាថាយោ អភាសិត្ថាតិ.

បដាចារាថេរិយាបទានំ ទសមំ.

ឯកូបោសថិកវគ្គោ ទុតិយោ.