៥. មាលុក្យបុត្តត្ថេរគាថា

៣៩៩. ‘‘មនុជស្ស បមត្តចារិនោ, តណ្ហា វឌ្ឍតិ មាលុវា វិយ;

សោ ប្លវតី [ប្លវតិ (សី. បី. ក.), បរិប្លវតិ (ស្យា.)] ហុរា ហុរំ, ផលមិច្ឆំវ វនស្មិ វានរោ.

៤០០. ‘‘យំ ឯសា សហតេ [សហតិ (បី. ក.)] ជម្មី, តណ្ហា លោកេ វិសត្តិកា;

សោកា តស្ស បវឌ្ឍន្តិ, អភិវដ្ឋំវ [អភិវុដ្ឋំវ (ស្យា.), អភិវឌ្ឍំវ (ក.)] ពីរណំ.

៤០១. ‘‘យោ ចេតំ សហតេ [សហតិ (បី. ក.)] ជម្មិំ, តណ្ហំ លោកេ ទុរច្ចយំ;

សោកា តម្ហា បបតន្តិ, ឧទពិន្ទូវ បោក្ខរា.

៤០២. ‘‘តំ វោ វទាមិ ភទ្ទំ វោ, យាវន្តេត្ថ សមាគតា;

តណ្ហាយ មូលំ ខណថ, ឧសីរត្ថោវ ពីរណំ;

មា វោ នឡំវ សោតោវ, មារោ ភញ្ជិ បុនប្បុនំ.

៤០៣. ‘‘ករោថ ពុទ្ធវចនំ, ខណោ វោ មា ឧបច្ចគា;

ខណាតីតា ហិ សោចន្តិ, និរយម្ហិ សមប្បិតា.

៤០៤. ‘‘បមាទោ រជោ បមាទោ [សព្ពទា (សី. ក.), សុត្តនិបាតដ្ឋកថាយំ ឧដ្ឋានសុត្តវណ្ណនា ឱលោកេតព្ពា], បមាទានុបតិតោ រជោ;

អប្បមាទេន វិជ្ជាយ, អព្ពហេ សល្លមត្តនោ’’តិ.

… មាលុក្យបុត្តោ [មាលុង្ក្យបុត្តោ (សី. ស្យា. បី.)] ថេរោ….