៩. វិជិតសេនត្ថេរគាថា

៣៥៥. ‘‘ឱលគ្គេស្សាមិ តេ ចិត្ត, អាណិទ្វារេវ ហត្ថិនំ;

ន តំ បាបេ និយោជេស្សំ, កាមជាល [កាមជាលំ (ស្យា.)] សរីរជ [សរីរជំ (ស្យា. ក.)].

៣៥៦. ‘‘ត្វំ ឱលគ្គោ ន គច្ឆសិ [ន គញ្ឆិសិ (បី)], ទ្វារវិវរំ គជោវ អលភន្តោ;

ន ច ចិត្តកលិ បុនប្បុនំ, បសក្ក [បសហំ (សី. ស្យា. បី.)] បាបរតោ ចរិស្សសិ.

៣៥៧. ‘‘យថា កុញ្ជរំ អទន្តំ, នវគ្គហមង្កុសគ្គហោ;

ពលវា អាវត្តេតិ អកាមំ, ឯវំ អាវត្តយិស្សំ តំ.

៣៥៨. ‘‘យថា វរហយទមកុសលោ, សារថិ បវរោ ទមេតិ អាជញ្ញំ;

ឯវំ ទមយិស្សំ តំ, បតិដ្ឋិតោ បញ្ចសុ ពលេសុ.

៣៥៩. ‘‘សតិយា តំ និពន្ធិស្សំ, បយុត្តោ តេ ទមេស្សាមិ [បយតត្តោ វោទបេស្សាមិ (សី.)];

វីរិយធុរនិគ្គហិតោ, ន យិតោ ទូរំ គមិស្សសេ ចិត្តា’’តិ.

… វិជិតសេនោ ថេរោ….