៦. នទីកស្សបត្ថេរគាថា

៣៤០. ‘‘អត្ថាយ វត មេ ពុទ្ធោ, នទិំ នេរញ្ជរំ អគា;

យស្សាហំ ធម្មំ សុត្វាន, មិច្ឆាទិដ្ឋិំ វិវជ្ជយិំ.

៣៤១. ‘‘យជិំ ឧច្ចាវចេ យញ្ញេ, អគ្គិហុត្តំ ជុហិំ អហំ;

‘ឯសា សុទ្ធី’តិ មញ្ញន្តោ, អន្ធភូតោ [អន្ធីភូតោ (ក.)] បុថុជ្ជនោ.

៣៤២. ‘‘ទិដ្ឋិគហនបក្ខន្ទោ [បក្ខន្តោ (សី.), បក្ខន្នោ (ស្យា. បី.)], បរាមាសេន មោហិតោ;

អសុទ្ធិំ មញ្ញិសំ សុទ្ធិំ, អន្ធភូតោ អវិទ្ទសុ.

៣៤៣. ‘‘មិច្ឆាទិដ្ឋិ បហីនា មេ, ភវា សព្ពេ បទាលិតា [វិទាលិតា (ក.)];

ជុហាមិ ទក្ខិណេយ្យគ្គិំ, នមស្សាមិ តថាគតំ.

៣៤៤. ‘‘មោហា សព្ពេ បហីនា មេ, ភវតណ្ហា បទាលិតា;

វិក្ខីណោ ជាតិសំសារោ, នត្ថិ ទានិ បុនព្ភវោ’’តិ.

… នទីកស្សបោ ថេរោ….