២. សុភូតត្ថេរគាថា

៣២០. ‘‘អយោគេ យុញ្ជមត្តានំ, បុរិសោ កិច្ចមិច្ឆកោ [កិច្ចមិច្ឆតោ (សី.), កិច្ចមិច្ឆយំ (កត្ថចិ)];

ចរំ ចេ នាធិគច្ឆេយ្យ, ‘តំ មេ ទុព្ភគលក្ខណំ’.

៣២១. ‘‘អព្ពូឡ្ហំ អឃគតំ វិជិតំ, ឯកញ្ចេ ឱស្សជេយ្យ កលីវ សិយា;

សព្ពានិបិ ចេ ឱស្សជេយ្យ អន្ធោវ សិយា, សមវិសមស្ស អទស្សនតោ.

៣២២. ‘‘យញ្ហិ កយិរា តញ្ហិ វទេ, យំ ន កយិរា ន តំ វទេ;

អករោន្តំ ភាសមានំ, បរិជានន្តិ បណ្ឌិតា.

៣២៣. [ធ. ប. ៥១ ធម្មបទេបិ] ‘‘យថាបិ រុចិរំ បុប្ផំ, វណ្ណវន្តំ អគន្ធកំ;

ឯវំ សុភាសិតា វាចា, អផលា ហោតិ អកុព្ពតោ.

៣២៤. [ធ. ប. ៥២] ‘‘យថាបិ រុចិរំ បុប្ផំ, វណ្ណវន្តំ សុគន្ធកំ [សគន្ធកំ (សី. ស្យា. បី.)];

ឯវំ សុភាសិតា វាចា, សផលា ហោតិ កុព្ពតោ’’តិ [សកុព្ពតោ (សី. បី.), សុកុព្ពតោ (ស្យា.)].

… សុភូតោ ថេរោ….