៧. សម្ភូតត្ថេរគាថា

២៩១. ‘‘យោ ទន្ធកាលេ តរតិ, តរណីយេ ច ទន្ធយេ;

អយោនិ [អយោនិសោ (ស្យា.)] សំវិធានេន, ពាលោ ទុក្ខំ និគច្ឆតិ.

២៩២. ‘‘តស្សត្ថា បរិហាយន្តិ, កាឡបក្ខេវ ចន្ទិមា;

អាយសក្យញ្ច [អាយសស្យញ្ច (សី.)] បប្បោតិ, មិត្តេហិ ច វិរុជ្ឈតិ.

២៩៣. ‘‘យោ ទន្ធកាលេ ទន្ធេតិ, តរណីយេ ច តារយេ;

យោនិសោ សំវិធានេន, សុខំ បប្បោតិ បណ្ឌិតោ.

២៩៤. ‘‘តស្សត្ថា បរិបូរេន្តិ, សុក្កបក្ខេវ ចន្ទិមា;

យសោ កិត្តិញ្ច បប្បោតិ, មិត្តេហិ ន វិរុជ្ឈតី’’តិ.

… សម្ភូតោ ថេរោ….