៨. អង្គុលិមាលត្ថេរគាថា

៨៦៦. ‘‘គច្ឆំ វទេសិ សមណ ‘ដ្ឋិតោម្ហិ’, មមញ្ច ព្រូសិ ឋិតមដ្ឋិតោតិ;

បុច្ឆាមិ តំ សមណ ឯតមត្ថំ, ‘កថំ ឋិតោ ត្វំ អហមដ្ឋិតោម្ហិ’’’.

៨៦៧. ‘‘ឋិតោ អហំ អង្គុលិមាល សព្ពទា, សព្ពេសុ ភូតេសុ និធាយ ទណ្ឌំ;

តុវញ្ច បាណេសុ អសញ្ញតោសិ, តស្មា ឋិតោហំ តុវមដ្ឋិតោសិ’’.

៨៦៨. ‘‘ចិរស្សំ វត មេ មហិតោ មហេសី, មហាវនំ សមណោ បច្ចបាទិ [បច្ចុបាទិ (សព្ពត្ថ)];

សោហំ ចជិស្សាមិ សហស្សបាបំ, សុត្វាន គាថំ តវ ធម្មយុត្តំ’’.

៨៦៩. ឥច្ចេវ ចោរោ អសិមាវុធញ្ច, សោព្ភេ បបាតេ នរកេ អន្វកាសិ [អកិរិ (ម. និ. ២.៣៤៩)];

អវន្ទិ ចោរោ សុគតស្ស បាទេ, តត្ថេវ បព្ពជ្ជមយាចិ ពុទ្ធំ.

៨៧០. ពុទ្ធោ ច ខោ ការុណិកោ មហេសិ, យោ សត្ថា លោកស្ស សទេវកស្ស;

‘តមេហិ ភិក្ខូ’តិ តទា អវោច, ឯសេវ តស្ស អហុ ភិក្ខុភាវោ.

៨៧១. ‘‘យោ ច បុព្ពេ បមជ្ជិត្វា, បច្ឆា សោ នប្បមជ្ជតិ;

សោមំ លោកំ បភាសេតិ, អព្ភា មុត្តោវ ចន្ទិមា.

៨៧២. ‘‘យស្ស បាបំ កតំ កម្មំ, កុសលេន បិធីយតិ [បិថីយតិ (សី. ស្យា.)];

សោមំ លោកំ បភាសេតិ, អព្ភា មុត្តោវ ចន្ទិមា.

៨៧៣. ‘‘យោ ហវេ ទហរោ ភិក្ខុ, យុញ្ជតិ ពុទ្ធសាសនេ;

សោមំ លោកំ បភាសេតិ, អព្ភា មុត្តោវ ចន្ទិមា.

៨៧៤. [ទិសា ហិ (ស្យា. ក., ម. និ. ២.៣៥២)] ‘‘ទិសាបិ មេ ធម្មកថំ សុណន្តុ, ទិសាបិ មេ យុញ្ជន្តុ ពុទ្ធសាសនេ;

ទិសាបិ មេ តេ មនុជេ ភជន្តុ, យេ ធម្មមេវាទបយន្តិ សន្តោ.

៨៧៥. ‘‘ទិសា ហិ មេ ខន្តិវាទានំ, អវិរោធប្បសំសិនំ;

សុណន្តុ ធម្មំ កាលេន, តញ្ច អនុវិធីយន្តុ.

៨៧៦. ‘‘ន ហិ ជាតុ សោ មមំ ហិំសេ, អញ្ញំ វា បន កិញ្ចនំ [កញ្ចិនំ (សី. ស្យា.), កញ្ចនំ (?)];

បប្បុយ្យ បរមំ សន្តិំ, រក្ខេយ្យ តសថាវរេ.

៨៧៧. [ថេរគា. ១៩] ‘‘ឧទកញ្ហិ នយន្តិ នេត្តិកា, ឧសុការា នមយន្តិ [ទមយន្តិ (ក.)] តេជនំ;

ទារុំ នមយន្តិ [ទមយន្តិ (ក.)] តច្ឆកា, អត្តានំ ទមយន្តិ បណ្ឌិតា.

៨៧៨. ‘‘ទណ្ឌេនេកេ ទមយន្តិ, អង្កុសេភិ កសាហិ ច;

អទណ្ឌេន អសត្ថេន, អហំ ទន្តោម្ហិ តាទិនា.

៨៧៩. ‘‘‘អហិំសកោ’តិ មេ នាមំ, ហិំសកស្ស បុរេ សតោ;

អជ្ជាហំ សច្ចនាមោម្ហិ, ន នំ ហិំសាមិ កិញ្ចនំ [កញ្ចិនំ (សី. ស្យា.), កញ្ចនំ (?)].

៨៨០. ‘‘ចោរោ អហំ បុរេ អាសិំ, អង្គុលិមាលោតិ វិស្សុតោ;

វុយ្ហមានោ មហោឃេន, ពុទ្ធំ សរណមាគមំ.

៨៨១. ‘‘លោហិតបាណិ បុរេ អាសិំ, អង្គុលិមាលោតិ វិស្សុតោ;

សរណគមនំ បស្ស, ភវនេត្តិ សមូហតា.

៨៨២. ‘‘តាទិសំ កម្មំ កត្វាន, ពហុំ ទុគ្គតិគាមិនំ;

ផុដ្ឋោ កម្មវិបាកេន, អនណោ ភុញ្ជាមិ ភោជនំ.

៨៨៣. ‘‘បមាទមនុយុញ្ជន្តិ, ពាលា ទុម្មេធិនោ ជនា;

អប្បមាទញ្ច មេធាវី, ធនំ សេដ្ឋំវ រក្ខតិ.

៨៨៤. ‘‘មា បមាទមនុយុញ្ជេថ, មា កាមរតិសន្ថវំ [សន្ធវំ (ក.)];

អប្បមត្តោ ហិ ឈាយន្តោ, បប្បោតិ បរមំ សុខំ.

៨៨៥. ‘‘ស្វាគតំ នាបគតំ, នេតំ ទុម្មន្តិតំ មម;

សវិភត្តេសុ ធម្មេសុ, យំ សេដ្ឋំ តទុបាគមំ.

៨៨៦. ‘‘ស្វាគតំ នាបគតំ, នេតំ ទុម្មន្តិតំ មម;

តិស្សោ វិជ្ជា អនុប្បត្តា, កតំ ពុទ្ធស្ស សាសនំ.

៨៨៧. ‘‘អរញ្ញេ រុក្ខមូលេ វា, បព្ពតេសុ គុហាសុ វា;

តត្ថ តត្ថេវ អដ្ឋាសិំ, ឧព្ពិគ្គមនសោ តទា.

៨៨៨. ‘‘សុខំ សយាមិ ឋាយាមិ, សុខំ កប្បេមិ ជីវិតំ;

អហត្ថបាសោ មារស្ស, អហោ សត្ថានុកម្បិតោ.

៨៨៩. ‘‘ព្រហ្មជច្ចោ បុរេ អាសិំ, ឧទិច្ចោ ឧភតោ អហុ;

សោជ្ជ បុត្តោ សុគតស្ស, ធម្មរាជស្ស សត្ថុនោ.

៨៩០. ‘‘វីតតណ្ហោ អនាទានោ, គុត្តទ្វារោ សុសំវុតោ;

អឃមូលំ វធិត្វាន, បត្តោ មេ អាសវក្ខយោ.

៨៩១. ‘‘បរិចិណ្ណោ មយា សត្ថា, កតំ ពុទ្ធស្ស សាសនំ;

ឱហិតោ គរុកោ ភារោ, ភវនេត្តិ សមូហតា’’តិ.

… អង្គុលិមាលោ ថេរោ….