៦. សេលត្ថេរគាថា

៨១៨. ‘‘បរិបុណ្ណកាយោ សុរុចិ, សុជាតោ ចារុទស្សនោ;

សុវណ្ណវណ្ណោសិ ភគវា, សុសុក្កទាឋោសិ វីរិយវា [សុសុក្កទាឋោ វិរីយវា (សី.)].

៨១៩. ‘‘នរស្ស ហិ សុជាតស្ស, យេ ភវន្តិ វិយញ្ជនា;

សព្ពេ តេ តវ កាយស្មិំ, មហាបុរិសលក្ខណា.

៨២០. ‘‘បសន្ននេត្តោ សុមុខោ, ព្រហា ឧជុ បតាបវា;

មជ្ឈេ សមណសង្ឃស្ស, អាទិច្ចោវ វិរោចសិ.

៨២១. ‘‘កល្យាណទស្សនោ ភិក្ខុ, កញ្ចនសន្និភត្តចោ;

កិំ តេ សមណភាវេន, ឯវំ ឧត្តមវណ្ណិនោ.

៨២២. ‘‘រាជា អរហសិ ភវិតុំ, ចក្កវត្តី រថេសភោ;

ចាតុរន្តោ វិជិតាវី, ជម្ពុសណ្ឌស្ស [ជម្ពុមណ្ឌស្ស (ក.)] ឥស្សរោ.

៨២៣. ‘‘ខត្តិយា ភោគី រាជានោ [ភោគា រាជានោ (សី. ក.), ភោជរាជានោ (ស្យា.)], អនុយន្តា ភវន្តិ តេ;

រាជាភិរាជា [រាជាធិរាជា (សី. ក.)] មនុជិន្ទោ, រជ្ជំ ការេហិ គោតម’’.

៨២៤. ‘‘រាជាហមស្មិ សេល, (សេលាតិ ភគវា) ធម្មរាជា អនុត្តរោ;

ធម្មេន ចក្កំ វត្តេមិ, ចក្កំ អប្បដិវត្តិយំ’’.

៨២៥. ‘‘សម្ពុទ្ធោ បដិជានាសិ, (ឥតិ សេលោ ព្រាហ្មណោ) ធម្មរាជា អនុត្តរោ;

‘ធម្មេន ចក្កំ វត្តេមិ’, ឥតិ ភាសថ គោតម.

៨២៦. ‘‘កោ នុ សេនាបតិ ភោតោ, សាវកោ សត្ថុរន្វយោ [អន្វយោ (សី.)];

កោ តេតមនុវត្តេតិ, ធម្មចក្កំ បវត្តិតំ’’.

៨២៧. ‘‘មយា បវត្តិតំ ចក្កំ, (សេលាតិ ភគវា) ធម្មចក្កំ អនុត្តរំ;

សារិបុត្តោ អនុវត្តេតិ, អនុជាតោ តថាគតំ.

៨២៨. ‘‘អភិញ្ញេយ្យំ អភិញ្ញាតំ, ភាវេតព្ពញ្ច ភាវិតំ;

បហាតព្ពំ បហីនំ មេ, តស្មា ពុទ្ធោស្មិ ព្រាហ្មណ.

៨២៩. ‘‘វិនយស្សុ មយិ កង្ខំ, អធិមុញ្ចស្សុ ព្រាហ្មណ;

ទុល្លភំ ទស្សនំ ហោតិ, សម្ពុទ្ធានំ អភិណ្ហសោ.

៨៣០. ‘‘យេសំ វេ ទុល្លភោ លោកេ, បាតុភាវោ អភិណ្ហសោ;

សោហំ ព្រាហ្មណ ពុទ្ធោស្មិ, សល្លកត្តោ [សល្លកន្តោ (សី.)] អនុត្តរោ.

៨៣១. ‘‘ព្រហ្មភូតោ អតិតុលោ, មារសេនប្បមទ្ទនោ;

សព្ពាមិត្តេ វសេ [វសី (ស្យា. ក., ម. និ. ២.៣៩៩; សុ. និ. ៩៦៦)] កត្វា, មោទាមិ អកុតោភយោ’’.

៨៣២. ‘‘ឥទំ ភោន្តោ និសាមេថ, យថា ភាសតិ ចក្ខុមា;

សល្លកត្តោ មហាវីរោ, សីហោវ នទតី វនេ.

៨៣៣. ‘‘ព្រហ្មភូតំ អតិតុលំ, មារសេនប្បមទ្ទនំ;

កោ ទិស្វា នប្បសីទេយ្យ, អបិ កណ្ហាភិជាតិកោ.

៨៣៤. ‘‘យោ មំ ឥច្ឆតិ អន្វេតុ, យោ វា និច្ឆតិ គច្ឆតុ;

ឥធាហំ បព្ពជិស្សាមិ, វរបញ្ញស្ស សន្តិកេ’’.

៨៣៥. ‘‘ឯតំ ចេ រុច្ចតិ ភោតោ, សម្មាសម្ពុទ្ធសាសនំ;

មយម្បិ បព្ពជិស្សាម, វរបញ្ញស្ស សន្តិកេ.

៨៣៦. ‘‘ព្រាហ្មណា តិសតា ឥមេ, យាចន្តិ បញ្ជលីកតា;

‘ព្រហ្មចរិយំ ចរិស្សាម, ភគវា តវ សន្តិកេ’’’.

៨៣៧. ‘‘ស្វាខាតំ ព្រហ្មចរិយំ, (សេលាតិ ភគវា) សន្ទិដ្ឋិកមកាលិកំ;

យត្ថ អមោឃា បព្ពជ្ជា, អប្បមត្តស្ស សិក្ខតោ’’.

៨៣៨. ‘‘យំ តំ សរណមាគម្ហ [សរណមាគម្ម (សព្ពត្ថ)], ឥតោ អដ្ឋមេ [អដ្ឋមិ (ស្យា. ក.)] ចក្ខុម;

សត្តរត្តេន ភគវា, ទន្តាម្ហ តវ សាសនេ.

៨៣៩. ‘‘តុវំ ពុទ្ធោ តុវំ សត្ថា, តុវំ មារាភិភូ មុនិ;

តុវំ អនុសយេ ឆេត្វា, តិណ្ណោ តារេសិមំ បជំ.

៨៤០. ‘‘ឧបធី តេ សមតិក្កន្តា, អាសវា តេ បទាលិតា;

សីហោវ អនុបាទានោ, បហីនភយភេរវោ.

៨៤១. ‘‘ភិក្ខវោ តិសតា ឥមេ, តិដ្ឋន្តិ បញ្ជលីកតា;

បាទេ វីរ បសារេហិ, នាគា វន្ទន្តុ សត្ថុនោ’’តិ.

… សេលោ ថេរោ….