៩. នវមវគ្គោ

៨១. ‘‘យំ មយា បកតំ បាបំ, បុព្ពេ អញ្ញាសុ ជាតិសុ;

ឥធេវ តំ វេទនីយំ, វត្ថុ អញ្ញំ ន វិជ្ជតី’’តិ.

… សមិតិគុត្តោ ថេរោ….

៨២. ‘‘យេន យេន សុភិក្ខានិ, សិវានិ អភយានិ ច;

តេន បុត្តក គច្ឆស្សុ, មា សោកាបហតោ ភវា’’តិ.

… កស្សបោ ថេរោ….

៨៣. ‘‘សីហប្បមត្តោ វិហរ, រត្តិន្ទិវមតន្ទិតោ;

ភាវេហិ កុសលំ ធម្មំ, ជហ សីឃំ សមុស្សយ’’ន្តិ.

… សីហោ ថេរោ….

៨៤. ‘‘សព្ពរត្តិំ សុបិត្វាន, ទិវា សង្គណិកេ រតោ;

កុទាស្សុ នាម ទុម្មេធោ, ទុក្ខស្សន្តំ ករិស្សតី’’តិ.

… នីតោ ថេរោ….

៨៥. ‘‘ចិត្តនិមិត្តស្ស កោវិទោ, បវិវេករសំ វិជានិយ;

ឈាយំ និបកោ បតិស្សតោ, អធិគច្ឆេយ្យ សុខំ និរាមិស’’ន្តិ.

… សុនាគោ ថេរោ….

៨៦. ‘‘ឥតោ ពហិទ្ធា បុថុ អញ្ញវាទិនំ, មគ្គោ ន និព្ពានគមោ យថា អយំ;

ឥតិស្សុ សង្ឃំ ភគវានុសាសតិ, សត្ថា សយំ បាណិតលេវ ទស្សយ’’ន្តិ.

… នាគិតោ ថេរោ….

៨៧. ‘‘ខន្ធា ទិដ្ឋា យថាភូតំ, ភវា សព្ពេ បទាលិតា;

វិក្ខីណោ ជាតិសំសារោ, នត្ថិ ទានិ បុនព្ភវោ’’តិ.

… បវិដ្ឋោ ថេរោ….

៨៨. ‘‘អសក្ខិំ វត អត្តានំ, ឧទ្ធាតុំ ឧទកា ថលំ;

វុយ្ហមានោ មហោឃេវ, សច្ចានិ បដិវិជ្ឈហ’’ន្តិ.

… អជ្ជុនោ ថេរោ….

៨៩. ‘‘ឧត្តិណ្ណា បង្កបលិបា, បាតាលា បរិវជ្ជិតា;

មុត្តោ ឱឃា ច គន្ថា ច, សព្ពេ មានា វិសំហតា’’តិ.

… ទេវសភោ ថេរោ….

៩០. ‘‘បញ្ចក្ខន្ធា បរិញ្ញាតា, តិដ្ឋន្តិ ឆិន្នមូលកា;

វិក្ខីណោ ជាតិសំសារោ, នត្ថិ ទានិ បុនព្ភវោ’’តិ.

… សាមិទត្តោ ថេរោ….

វគ្គោ នវមោ និដ្ឋិតោ.

តស្សុទ្ទានំ –

ថេរោ សមិតិគុត្តោ ច, កស្សបោ សីហសវ្ហយោ;

នីតោ សុនាគោ នាគិតោ, បវិដ្ឋោ អជ្ជុនោ ឥសិ;

ទេវសភោ ច យោ ថេរោ, សាមិទត្តោ មហព្ពលោតិ.