១០. ទសមវគ្គោ

១. បរិបុណ្ណកត្ថេរគាថា

៩១. ‘‘ន តថា មតំ សតរសំ, សុធន្នំ យំ មយជ្ជ បរិភុត្តំ;

អបរិមិតទស្សិនា គោតមេន, ពុទ្ធេន ទេសិតោ ធម្មោ’’តិ.

… បរិបុណ្ណកោ ថេរោ….

២. វិជយត្ថេរគាថា

៩២. ‘‘យស្សាសវា បរិក្ខីណា, អាហារេ ច អនិស្សិតោ;

សុញ្ញតា អនិមិត្តោ ច, វិមោក្ខោ យស្ស គោចរោ;

អាកាសេវ សកុន្តានំ, បទំ តស្ស ទុរន្នយ’’ន្តិ.

… វិជយោ ថេរោ….

៣. ឯរកត្ថេរគាថា

៩៣. ‘‘ទុក្ខា កាមា ឯរក, ន សុខា កាមា ឯរក;

យោ កាមេ កាមយតិ, ទុក្ខំ សោ កាមយតិ ឯរក;

យោ កាមេ ន កាមយតិ, ទុក្ខំ សោ ន កាមយតិ ឯរកា’’តិ.

… ឯរកោ ថេរោ….

៤. មេត្តជិត្ថេរគាថា

៩៤. ‘‘នមោ ហិ តស្ស ភគវតោ, សក្យបុត្តស្ស សិរីមតោ;

តេនាយំ អគ្គប្បត្តេន, អគ្គធម្មោ [អគ្គោ ធម្មោ (សី.)] សុទេសិតោ’’តិ.

… មេត្តជិ ថេរោ….

៥. ចក្ខុបាលត្ថេរគាថា

៩៥. ‘‘អន្ធោហំ ហតនេត្តោស្មិ, កន្តារទ្ធានបក្ខន្ទោ [បក្ខន្នោ (សី.), បក្កន្តោ (ស្យា. សី. អដ្ឋ.)];

សយមានោបិ គច្ឆិស្សំ, ន សហាយេន បាបេនា’’តិ.

… ចក្ខុបាលោ ថេរោ….

៦. ខណ្ឌសុមនត្ថេរគាថា

៩៦. ‘‘ឯកបុប្ផំ ចជិត្វាន, អសីតិ [អសីតិំ (សី.)] វស្សកោដិយោ;

សគ្គេសុ បរិចារេត្វា, សេសកេនម្ហិ និព្ពុតោ’’តិ.

… ខណ្ឌសុមនោ ថេរោ….

៧. តិស្សត្ថេរគាថា

៩៧. ‘‘ហិត្វា សតបលំ កំសំ, សោវណ្ណំ សតរាជិកំ;

អគ្គហិំ មត្តិកាបត្តំ, ឥទំ ទុតិយាភិសេចន’’ន្តិ.

… តិស្សោ ថេរោ….

៨. អភយត្ថេរគាថា

៩៨. ‘‘រូបំ ទិស្វា សតិ មុដ្ឋា, បិយំ និមិត្តំ មនសិករោតោ;

សារត្តចិត្តោ វេទេតិ, តញ្ច អជ្ឈោស តិដ្ឋតិ;

តស្ស វឌ្ឍន្តិ អាសវា, ភវមូលោបគាមិនោ’’តិ [ភវមូលា ភវគាមិនោតិ (សី. ក.)].

… អភយោ ថេរោ….

៩. ឧត្តិយត្ថេរគាថា

៩៩. ‘‘សទ្ទំ សុត្វា សតិ មុដ្ឋា, បិយំ និមិត្តំ មនសិករោតោ;

សារត្តចិត្តោ វេទេតិ, តញ្ច អជ្ឈោស តិដ្ឋតិ;

តស្ស វឌ្ឍន្តិ អាសវា, សំសារំ ឧបគាមិនោ’’តិ.

… ឧត្តិយោ ថេរោ….

១០. (ទុតិយ)-ទេវសភត្ថេរគាថា

១០០. ‘‘សម្មប្បធានសម្បន្នោ, សតិបដ្ឋានគោចរោ;

វិមុត្តិកុសុមសញ្ឆន្នោ, បរិនិព្ពិស្សត្យនាសវោ’’តិ.

… ទេវសភោ ថេរោ….

វគ្គោ ទសមោ និដ្ឋិតោ.

តស្សុទ្ទានំ –

បរិបុណ្ណកោ ច វិជយោ, ឯរកោ មេត្តជី មុនិ;

ចក្ខុបាលោ ខណ្ឌសុមនោ, តិស្សោ ច អភយោ តថា;

ឧត្តិយោ ច មហាបញ្ញោ, ថេរោ ទេវសភោបិ ចាតិ.