១១. ឯកាទសមវគ្គោ

១០១. ‘‘ហិត្វា គិហិត្តំ អនវោសិតត្តោ, មុខនង្គលី ឱទរិកោ កុសីតោ;

មហាវរាហោវ និវាបបុដ្ឋោ, បុនប្បុនំ គព្ភមុបេតិ មន្ទោ’’តិ.

… ពេលដ្ឋានិកោ ថេរោ….

១០២. ‘‘មានេន វញ្ចិតាសេ, សង្ខារេសុ សំកិលិស្សមានាសេ;

លាភាលាភេន មថិតា, សមាធិំ នាធិគច្ឆន្តី’’តិ.

… សេតុច្ឆោ ថេរោ….

១០៣. ‘‘នាហំ ឯតេន អត្ថិកោ, សុខិតោ ធម្មរសេន តប្បិតោ;

បិត្វា [បីត្វាន (សី. ស្យា.)] រសគ្គមុត្តមំ, ន ច កាហាមិ វិសេន សន្ថវ’’ន្តិ.

… ពន្ធុរោ [ពន្ធនោ (ក.)] ថេរោ….

១០៤. ‘‘លហុកោ វត មេ កាយោ, ផុដ្ឋោ ច បីតិសុខេន វិបុលេន;

តូលមិវ ឯរិតំ មាលុតេន, បិលវតីវ មេ កាយោ’’តិ.

… ខិតកោ ថេរោ….

១០៥. ‘‘ឧក្កណ្ឋិតោបិ ន វសេ, រមមានោបិ បក្កមេ;

ន ត្វេវានត្ថសំហិតំ, វសេ វាសំ វិចក្ខណោ’’តិ.

… មលិតវម្ភោ ថេរោ….

១០៦. ‘‘សតលិង្គស្ស អត្ថស្ស, សតលក្ខណធារិនោ;

ឯកង្គទស្សី ទុម្មេធោ, សតទស្សី ច បណ្ឌិតោ’’តិ.

… សុហេមន្តោ ថេរោ….

១០៧. ‘‘បព្ពជិំ តុលយិត្វាន, អគារស្មានគារិយំ;

តិស្សោ វិជ្ជា អនុប្បត្តា, កតំ ពុទ្ធស្ស សាសន’’ន្តិ.

… ធម្មសវោ ថេរោ….

១០៨. ‘‘ស វីសវស្សសតិកោ, បព្ពជិំ អនគារិយំ;

តិស្សោ វិជ្ជា អនុប្បត្តា, កតំ ពុទ្ធស្ស សាសន’’ន្តិ.

… ធម្មសវបិតុ ថេរោ….

១០៩. ‘‘ន នូនាយំ បរមហិតានុកម្បិនោ, រហោគតោ អនុវិគណេតិ សាសនំ;

តថាហយំ វិហរតិ បាកតិន្ទ្រិយោ, មិគី យថា តរុណជាតិកា វនេ’’តិ.

… សង្ឃរក្ខិតោ ថេរោ….

១១០. ‘‘នគា នគគ្គេសុ សុសំវិរូឡ្ហា, ឧទគ្គមេឃេន នវេន សិត្តា;

វិវេកកាមស្ស អរញ្ញសញ្ញិនោ, ជនេតិ ភិយ្យោ ឧសភស្ស កល្យត’’ន្តិ.

… ឧសភោ ថេរោ….

វគ្គោ ឯកាទសមោ និដ្ឋិតោ.

តស្សុទ្ទានំ –

ពេលដ្ឋានិកោ សេតុច្ឆោ, ពន្ធុរោ ខិតកោ ឥសិ;

មលិតវម្ភោ សុហេមន្តោ, ធម្មសវោ ធម្មសវបិតា;

សង្ឃរក្ខិតត្ថេរោ ច, ឧសភោ ច មហាមុនីតិ.