១២. ទ្វាទសមវគ្គោ

១. ជេន្តត្ថេរគាថា

១១១. ‘‘ទុប្បព្ពជ្ជំ វេ ទុរធិវាសា គេហា, ធម្មោ គម្ភីរោ ទុរធិគមា ភោគា;

កិច្ឆា វុត្តិ នោ ឥតរីតរេនេវ, យុត្តំ ចិន្តេតុំ សតតមនិច្ចត’’ន្តិ.

… ជេន្តោ ថេរោ….

២. វច្ឆគោត្តត្ថេរគាថា

១១២. ‘‘តេវិជ្ជោហំ មហាឈាយី, ចេតោសមថកោវិទោ;

សទត្ថោ មេ អនុប្បត្តោ, កតំ ពុទ្ធស្ស សាសន’’ន្តិ.

… វច្ឆគោត្តោ ថេរោ….

៣. វនវច្ឆត្ថេរគាថា

១១៣. ‘‘អច្ឆោទិកា បុថុសិលា,គោនង្គុលមិគាយុតា;

អម្ពុសេវាលសញ្ឆន្នា, តេ សេលា រមយន្តិ ម’’ន្តិ.

… វនវច្ឆោ ថេរោ….

៤. អធិមុត្តត្ថេរគាថា

១១៤. ‘‘កាយទុដ្ឋុល្លគរុនោ, ហិយ្យមានម្ហិ [ហីយមានម្ហិ (សី.)] ជីវិតេ;

សរីរសុខគិទ្ធស្ស, កុតោ សមណសាធុតា’’តិ.

… អធិមុត្តោ ថេរោ….

៥. មហានាមត្ថេរគាថា

១១៥. ‘‘ឯសាវហិយ្យសេ បព្ពតេន, ពហុកុដជសល្លកិកេន [សល្លកិតេន (សី.), សល្លរិកេន (ស្យា.)];

នេសាទកេន គិរិនា, យសស្សិនា បរិច្ឆទេនា’’តិ.

… មហានាមោ ថេរោ….

៦. បារាបរិយត្ថេរគាថា

១១៦. ‘‘ឆផស្សាយតនេ ហិត្វា, គុត្តទ្វារោ សុសំវុតោ;

អឃមូលំ វមិត្វាន, បត្តោ មេ អាសវក្ខយោ’’តិ.

… បារាបរិយោ [បារាសរិយោ (សី.), បារំបរិយោ (ក.)] ថេរោ ….

៧. យសត្ថេរគាថា

១១៧. ‘‘សុវិលិត្តោ សុវសនោ,សព្ពាភរណភូសិតោ;

តិស្សោ វិជ្ជា អជ្ឈគមិំ, កតំ ពុទ្ធស្ស សាសន’’ន្តិ.

… យសោ ថេរោ….

៨. កិមិលត្ថេរគាថា

១១៨. ‘‘អភិសត្តោវ និបតតិ, វយោ រូបំ អញ្ញមិវ តថេវ សន្តំ;

តស្សេវ សតោ អវិប្បវសតោ, អញ្ញស្សេវ សរាមិ អត្តាន’’ន្តិ.

… កិមិលោ [កិម្ពិលោ (សី. ស្យា.)] ថេរោ….

៩. វជ្ជិបុត្តត្ថេរគាថា

១១៩. ‘‘រុក្ខមូលគហនំ បសក្កិយ, និព្ពានំ ហទយស្មិំ ឱបិយ;

ឈាយ គោតម មា ច បមាទោ, កិំ តេ ពិឡិពិឡិកា ករិស្សតី’’តិ.

… វជ្ជិបុត្តោ ថេរោ….

១០. ឥសិទត្តត្ថេរគាថា

១២០. ‘‘បញ្ចក្ខន្ធា បរិញ្ញាតា, តិដ្ឋន្តិ ឆិន្នមូលកា;

ទុក្ខក្ខយោ អនុប្បត្តោ,បត្តោ មេ អាសវក្ខយោ’’តិ.

… ឥសិទត្តោ ថេរោ….

វគ្គោ ទ្វាទសមោ និដ្ឋិតោ.

តស្សុទ្ទានំ –

ជេន្តោ ច វច្ឆគោត្តោ ច, វច្ឆោ ច វនសវ្ហយោ;

អធិមុត្តោ មហានាមោ, បារាបរិយោ យសោបិ ច;

កិមិលោ វជ្ជិបុត្តោ ច, ឥសិទត្តោ មហាយសោតិ.

ឯកកនិបាតោ និដ្ឋិតោ.