៨. អដ្ឋមវគ្គោ

១. វច្ឆបាលត្ថេរគាថា

៧១. ‘‘សុសុខុមនិបុណត្ថទស្សិនា, មតិកុសលេន និវាតវុត្តិនា;

សំសេវិតវុទ្ធសីលិនា [សំសេវិតពុទ្ធសីលិនា (ក.)], និព្ពានំ ន ហិ តេន ទុល្លភ’’ន្តិ.

… វច្ឆបាលោ ថេរោ….

២. អាតុមត្ថេរគាថា

៧២. ‘‘យថា កឡីរោ សុសុ វឌ្ឍិតគ្គោ, ទុន្និក្ខមោ ហោតិ បសាខជាតោ;

ឯវំ អហំ ភរិយាយានិតាយ, អនុមញ្ញំ មំ បព្ពជិតោម្ហិ ទានី’’តិ.

… អាតុមោ ថេរោ….

៣. មាណវត្ថេរគាថា

៧៣. ‘‘ជិណ្ណញ្ច ទិស្វា ទុខិតញ្ច ព្យាធិតំ, មតញ្ច ទិស្វា គតមាយុសង្ខយំ;

តតោ អហំ និក្ខមិតូន បព្ពជិំ, បហាយ កាមានិ មនោរមានី’’តិ.

… មាណវោ ថេរោ….

៤. សុយាមនត្ថេរគាថា

៧៤. ‘‘កាមច្ឆន្ទោ ច ព្យាបាទោ, ថិនមិទ្ធញ្ច [ថីនមិទ្ធញ្ច (សី. ស្យា.)] ភិក្ខុនោ;

ឧទ្ធច្ចំ វិចិកិច្ឆា ច, សព្ពសោវ ន វិជ្ជតី’’តិ.

… សុយាមនោ ថេរោ….

៥. សុសារទត្ថេរគាថា

៧៥. ‘‘សាធុ សុវិហិតាន ទស្សនំ, កង្ខា ឆិជ្ជតិ ពុទ្ធិ វឌ្ឍតិ;

ពាលម្បិ ករោន្តិ បណ្ឌិតំ, តស្មា សាធុ សតំ សមាគមោ’’តិ.

… សុសារទោ ថេរោ….

៦. បិយញ្ជហត្ថេរគាថា

៧៦. ‘‘ឧប្បតន្តេសុ និបតេ, និបតន្តេសុ ឧប្បតេ;

វសេ អវសមានេសុ, រមមានេសុ នោ រមេ’’តិ.

… បិយញ្ជហោ ថេរោ….

៧. ហត្ថារោហបុត្តត្ថេរគាថា

៧៧. ‘‘ឥទំ បុរេ ចិត្តមចារិ ចារិកំ, យេនិច្ឆកំ យត្ថកាមំ យថាសុខំ;

តទជ្ជហំ និគ្គហេស្សាមិ យោនិសោ, ហត្ថិប្បភិន្នំ វិយ អង្កុសគ្គហោ’’តិ.

… ហត្ថារោហបុត្តោ ថេរោ….

៨. មេណ្ឌសិរត្ថេរគាថា

៧៨. ‘‘អនេកជាតិសំសារំ, សន្ធាវិស្សំ អនិព្ពិសំ;

តស្ស មេ ទុក្ខជាតស្ស, ទុក្ខក្ខន្ធោ អបរទ្ធោ’’តិ.

… មេណ្ឌសិរោ ថេរោ….

៩. រក្ខិតត្ថេរគាថា

៧៩. ‘‘សព្ពោ រាគោ បហីនោ មេ, សព្ពោ ទោសោ សមូហតោ;

សព្ពោ មេ វិគតោ មោហោ, សីតិភូតោស្មិ និព្ពុតោ’’តិ.

… រក្ខិតោ ថេរោ….

១០. ឧគ្គត្ថេរគាថា

៨០. ‘‘យំ មយា បកតំ កម្មំ, អប្បំ វា យទិ វា ពហុំ;

សព្ពមេតំ បរិក្ខីណំ, នត្ថិ ទានិ បុនព្ភវោ’’តិ.

… ឧគ្គោ ថេរោ….

វគ្គោ អដ្ឋមោ និដ្ឋិតោ.

តស្សុទ្ទានំ –

វច្ឆបាលោ ច យោ ថេរោ, អាតុមោ មាណវោ ឥសិ;

សុយាមនោ សុសារទោ, ថេរោ យោ ច បិយញ្ជហោ;

អារោហបុត្តោ មេណ្ឌសិរោ, រក្ខិតោ ឧគ្គសវ្ហយោតិ.