៧. សត្តមវគ្គោ

៦១. ‘‘បស្សតិ បស្សោ បស្សន្តំ, អបស្សន្តញ្ច បស្សតិ;

អបស្សន្តោ អបស្សន្តំ, បស្សន្តញ្ច ន បស្សតី’’តិ.

… វប្បោ ថេរោ….

៦២. ‘‘ឯកកា មយំ អរញ្ញេ វិហរាម, អបវិទ្ធំវ វនស្មិំ ទារុកំ;

តស្ស មេ ពហុកា បិហយន្តិ, នេរយិកា វិយ សគ្គគាមិន’’ន្តិ.

… វជ្ជិបុត្តោ ថេរោ….

៦៣. ‘‘ចុតា បតន្តិ បតិតា, គិទ្ធា ច បុនរាគតា;

កតំ កិច្ចំ រតំ រម្មំ, សុខេនន្វាគតំ សុខ’’ន្តិ.

… បក្ខោ ថេរោ….

៦៤. ‘‘ទុមវ្ហយាយ ឧប្បន្នោ, ជាតោ បណ្ឌរកេតុនា;

កេតុហា កេតុនាយេវ, មហាកេតុំ បធំសយី’’តិ.

… វិមលកោណ្ឌញ្ញោ ថេរោ….

៦៥. ‘‘ឧក្ខេបកតវច្ឆស្ស, សង្កលិតំ ពហូហិ វស្សេហិ;

តំ ភាសតិ គហដ្ឋានំ, សុនិសិន្នោ ឧឡារបាមោជ្ជោ’’តិ.

… ឧក្ខេបកតវច្ឆោ ថេរោ….

៦៦. ‘‘អនុសាសិ មហាវីរោ, សព្ពធម្មាន បារគូ;

តស្សាហំ ធម្មំ សុត្វាន, វិហាសិំ សន្តិកេ សតោ;

តិស្សោ វិជ្ជា អនុប្បត្តា, កតំ ពុទ្ធស្ស សាសន’’ន្តិ.

… មេឃិយោ ថេរោ….

៦៧. ‘‘កិលេសា ឈាបិតា មយ្ហំ, ភវា សព្ពេ សមូហតា;

វិក្ខីណោ ជាតិសំសារោ, នត្ថិ ទានិ បុនព្ភវោ’’តិ.

… ឯកធម្មសវនីយោ ថេរោ….

៦៨. [ឧទា. ៣៧; បាចិ. ១៥៣] ‘‘អធិចេតសោ អប្បមជ្ជតោ, មុនិនោ មោនបថេសុ សិក្ខតោ;

សោកា ន ភវន្តិ តាទិនោ, ឧបសន្តស្ស សទា សតីមតោ’’តិ.

… ឯកុទានិយោ ថេរោ….

៦៩. ‘‘សុត្វាន ធម្មំ មហតោ មហារសំ, សព្ពញ្ញុតញ្ញាណវរេន ទេសិតំ;

មគ្គំ បបជ្ជិំ [បបជ្ជំ (ក.)] អមតស្ស បត្តិយា, សោ យោគក្ខេមស្ស បថស្ស កោវិទោ’’តិ.

… ឆន្នោ ថេរោ….

៧០. ‘‘សីលមេវ ឥធ អគ្គំ, បញ្ញវា បន ឧត្តមោ;

មនុស្សេសុ ច ទេវេសុ, សីលបញ្ញាណតោ ជយ’’ន្តិ.

… បុណ្ណោ ថេរោ….

វគ្គោ សត្តមោ និដ្ឋិតោ.

តស្សុទ្ទានំ –

វប្បោ ច វជ្ជិបុត្តោ ច, បក្ខោ វិមលកោណ្ឌញ្ញោ;

ឧក្ខេបកតវច្ឆោ ច, មេឃិយោ ឯកធម្មិកោ;

ឯកុទានិយឆន្នា ច, បុណ្ណត្ថេរោ មហព្ពលោតិ.