៦. ឆដ្ឋវគ្គោ

៥១. ‘‘វស្សតិ ទេវោ យថា សុគីតំ, ឆន្នា មេ កុដិកា សុខា និវាតា;

ចិត្តំ សុសមាហិតញ្ច មយ្ហំ, អថ ចេ បត្ថយសិ បវស្ស ទេវា’’តិ.

… គោធិកោ ថេរោ….

៥២. ‘‘វស្សតិ ទេវោ យថា សុគីតំ, ឆន្នា មេ កុដិកា សុខា និវាតា;

ចិត្តំ សុសមាហិតញ្ច កាយេ, អថ ចេ បត្ថយសិ បវស្ស ទេវា’’តិ.

… សុពាហុត្ថេរោ….

៥៣. ‘‘វស្សតិ ទេវោ យថា សុគីតំ, ឆន្នា មេ កុដិកា សុខា និវាតា;

តស្សំ វិហរាមិ អប្បមត្តោ, អថ ចេ បត្ថយសិ បវស្ស ទេវា’’តិ.

… វល្លិយោ ថេរោ….

៥៤. ‘‘វស្សតិ ទេវោ យថា សុគីតំ, ឆន្នា មេ កុដិកា សុខា និវាតា;

តស្សំ វិហរាមិ អទុតិយោ, អថ ចេ បត្ថយសិ បវស្ស ទេវា’’តិ.

… ឧត្តិយោ ថេរោ….

៥៥. ‘‘អាសន្ទិំ កុដិកំ កត្វា, ឱគយ្ហ អញ្ជនំ វនំ;

តិស្សោ វិជ្ជា អនុប្បត្តា, កតំ ពុទ្ធស្ស សាសន’’ន្តិ.

… អញ្ជនវនិយោ ថេរោ….

៥៦. ‘‘កោ កុដិកាយំ ភិក្ខុ កុដិកាយំ, វីតរាគោ សុសមាហិតចិត្តោ;

ឯវំ ជានាហិ អាវុសោ, អមោឃា តេ កុដិកា កតា’’តិ.

… កុដិវិហារិត្ថេរោ….

៥៧. ‘‘អយមាហុ បុរាណិយា កុដិ, អញ្ញំ បត្ថយសេ នវំ កុដិំ;

អាសំ កុដិយា វិរាជយ, ទុក្ខា ភិក្ខុ បុន នវា កុដី’’តិ.

… ទុតិយកុដិវិហារិត្ថេរោ….

៥៨. ‘‘រមណីយា មេ កុដិកា, សទ្ធាទេយ្យា មនោរមា;

ន មេ អត្ថោ កុមារីហិ, យេសំ អត្ថោ តហិំ គច្ឆថ នារិយោ’’តិ.

… រមណីយកុដិកោ ថេរោ….

៥៩. ‘‘សទ្ធាយាហំ បព្ពជិតោ, អរញ្ញេ មេ កុដិកា កតា;

អប្បមត្តោ ច អាតាបី, សម្បជានោ បតិស្សតោ’’តិ [បដិស្សតោតិ (ក.)].

… កោសលវិហារិត្ថេរោ….

៦០. ‘‘តេ មេ ឥជ្ឈិំសុ សង្កប្បា, យទត្ថោ បាវិសិំ កុដិំ;

វិជ្ជាវិមុត្តិំ បច្ចេសំ, មានានុសយមុជ្ជហ’’ន្តិ.

… សីវលិត្ថេរោ….

វគ្គោ ឆដ្ឋោ និដ្ឋិតោ.

តស្សុទ្ទានំ –

គោធិកោ ច សុពាហុ ច, វល្លិយោ ឧត្តិយោ ឥសិ;

អញ្ជនវនិយោ ថេរោ, ទុវេ កុដិវិហារិនោ;

រមណីយកុដិកោ ច, កោសលវ្ហយសីវលីតិ.