៥. បញ្ចមវគ្គោ

៤១. ‘‘វិវរមនុបតន្តិ វិជ្ជុតា, វេភារស្ស ច បណ្ឌវស្ស ច;

នគវិវរគតោ ច ឈាយតិ, បុត្តោ អប្បដិមស្ស តាទិនោ’’តិ.

… សិរិវឌ្ឍោ ថេរោ….

៤២. ‘‘ចាលេ ឧបចាលេ សីសូបចាលេ ( ) [(ចាលា ឧបចាលា, សីសូបចាលា) (ក.)] បតិស្សតា [បដិស្សតិកា (ស្យា. ក.)] នុ ខោ វិហរថ;

អាគតោ វោ វាលំ វិយ វេធី’’តិ.

… ខទិរវនិយោ ថេរោ….

៤៣. ‘‘សុមុត្តិកោ សុមុត្តិកោ សាហុ, សុមុត្តិកោម្ហិ តីហិ ខុជ្ជកេហិ;

អសិតាសុ មយា នង្គលាសុ, មយា ខុទ្ទកុទ្ទាលាសុ មយា.

យទិបិ ឥធមេវ ឥធមេវ, អថ វាបិ អលមេវ អលមេវ;

ឈាយ សុមង្គល ឈាយ សុមង្គល, អប្បមត្តោ វិហរ សុមង្គលា’’តិ.

… សុមង្គលោ ថេរោ….

៤៤. [សំ. និ. ១.២៣៩] ‘‘មតំ វា អម្ម រោទន្តិ, យោ វា ជីវំ ន ទិស្សតិ;

ជីវន្តំ មំ អម្ម បស្សន្តី, កស្មា មំ អម្ម រោទសី’’តិ.

… សានុត្ថេរោ….

៤៥. ‘‘យថាបិ ភទ្ទោ អាជញ្ញោ, ខលិត្វា បតិតិដ្ឋតិ;

ឯវំ ទស្សនសម្បន្នំ, សម្មាសម្ពុទ្ធសាវក’’ន្តិ.

… រមណីយវិហារិត្ថេរោ….

៤៦. ‘‘សទ្ធាយាហំ បព្ពជិតោ, អគារស្មានគារិយំ;

សតិ បញ្ញា ច មេ វុឌ្ឍា, ចិត្តញ្ច សុសមាហិតំ;

កាមំ ករស្សុ រូបានិ, នេវ មំ ព្យាធយិស្សសី’’តិ [ពាធយិស្សសីតិ (សី.), ព្យាថយិស្សសីតិ (?)].

… សមិទ្ធិត្ថេរោ….

៤៧. ‘‘នមោ តេ ពុទ្ធ វីរត្ថុ, វិប្បមុត្តោសិ សព្ពធិ;

តុយ្ហាបទានេ វិហរំ, វិហរាមិ អនាសវោ’’តិ.

… ឧជ្ជយោ ថេរោ….

៤៨. ‘‘យតោ អហំ បព្ពជិតោ, អគារស្មានគារិយំ;

នាភិជានាមិ សង្កប្បំ, អនរិយំ ទោសសំហិត’’ន្តិ.

… សញ្ជយោ ថេរោ….

៤៩. ‘‘ចិហចិហាភិនទិតេ [វិហវិហាភិនទិតេ (សី. ស្យា.)], សិប្បិកាភិរុតេហិ ច;

ន មេ តំ ផន្ទតិ ចិត្តំ, ឯកត្តនិរតំ ហិ មេ’’តិ.

… រាមណេយ្យកោ ថេរោ….

៥០. ‘‘ធរណី ច សិញ្ចតិ វាតិ, មាលុតោ វិជ្ជុតា ចរតិ នភេ;

ឧបសមន្តិ វិតក្កា, ចិត្តំ សុសមាហិតំ មមា’’តិ.

… វិមលោ ថេរោ….

វគ្គោ បញ្ចមោ និដ្ឋិតោ.

តស្សុទ្ទានំ –

សិរីវឌ្ឍោ រេវតោ ថេរោ, សុមង្គលោ សានុសវ្ហយោ;

រមណីយវិហារី ច, សមិទ្ធិឧជ្ជយសញ្ជយា;

រាមណេយ្យោ ច សោ ថេរោ, វិមលោ ច រណញ្ជហោតិ.