៤. ចតុត្ថវគ្គោ

១. គហ្វរតីរិយត្ថេរគាថា

៣១. ‘‘ផុដ្ឋោ ឌំសេហិ មកសេហិ, អរញ្ញស្មិំ ព្រហាវនេ;

នាគោ សំគាមសីសេវ, សតោ តត្រាធិវាសយេ’’តិ.

… គហ្វរតីរិយោ ថេរោ….

២. សុប្បិយត្ថេរគាថា

៣២. ‘‘អជរំ ជីរមានេន, តប្បមានេន និព្ពុតិំ;

និមិយំ [និម្មិស្សំ (សី.), និរាមិសំ (ស្យា.), និមិនេយ្យំ (?)] បរមំ សន្តិំ, យោគក្ខេមំ អនុត្តរ’’ន្តិ.

… សុប្បិយោ ថេរោ….

៣. សោបាកត្ថេរគាថា

៣៣. ‘‘យថាបិ ឯកបុត្តស្មិំ, បិយស្មិំ កុសលី សិយា;

ឯវំ សព្ពេសុ បាណេសុ, សព្ពត្ថ កុសលោ សិយា’’តិ.

… សោបាកោ ថេរោ….

៤. បោសិយត្ថេរគាថា

៣៤. ‘‘អនាសន្នវរា ឯតា, និច្ចមេវ វិជានតា;

គាមា អរញ្ញមាគម្ម, តតោ គេហំ ឧបាវិសិ [ឧបាវិសិំ (សី.)];

តតោ ឧដ្ឋាយ បក្កាមិ, អនាមន្តេត្វា [អនាមន្តិយ (សី.)] បោសិយោ’’តិ.

… បោសិយោ ថេរោ….

៥. សាមញ្ញកានិត្ថេរគាថា

៣៥. ‘‘សុខំ សុខត្ថោ លភតេ តទាចរំ, កិត្តិញ្ច បប្បោតិ យសស្ស វឌ្ឍតិ;

យោ អរិយមដ្ឋង្គិកមញ្ជសំ ឧជុំ, ភាវេតិ មគ្គំ អមតស្ស បត្តិយា’’តិ.

… សាមញ្ញកានិត្ថេរោ….

៦. កុមាបុត្តត្ថេរគាថា

៣៦. ‘‘សាធុ សុតំ សាធុ ចរិតកំ, សាធុ សទា អនិកេតវិហារោ;

អត្ថបុច្ឆនំ បទក្ខិណកម្មំ, ឯតំ សាមញ្ញមកិញ្ចនស្សា’’តិ.

… កុមាបុត្តោ ថេរោ….

៧. កុមាបុត្តសហាយកត្ថេរគាថា

៣៧. ‘‘នានាជនបទំ យន្តិ, វិចរន្តា អសញ្ញតា;

សមាធិញ្ច វិរាធេន្តិ, កិំសុ រដ្ឋចរិយា ករិស្សតិ;

តស្មា វិនេយ្យ សារម្ភំ, ឈាយេយ្យ អបុរក្ខតោ’’តិ.

… កុមាបុត្តត្ថេរស្ស សហាយកោ ថេរោ….

៨. គវម្បតិត្ថេរគាថា

៣៨. ‘‘យោ ឥទ្ធិយា សរភុំ អដ្ឋបេសិ, សោ គវម្បតិ អសិតោ អនេជោ;

តំ សព្ពសង្គាតិគតំ មហាមុនិំ, ទេវា នមស្សន្តិ ភវស្ស បារគុ’’ន្តិ.

… គវម្បតិត្ថេរោ….

៩. តិស្សត្ថេរគាថា

៣៩. [សំ. និ. ១.២១, ៩៧]‘‘សត្តិយា វិយ ឱមដ្ឋោ, ឌយ្ហមានោវ [ឌយ្ហមានេវ (សព្ពត្ថ)] មត្ថកេ;

កាមរាគប្បហានាយ, សតោ ភិក្ខុ បរិព្ពជេ’’តិ.

… តិស្សោ ថេរោ….

១០. វឌ្ឍមានត្ថេរគាថា

៤០. ‘‘សត្តិយា វិយ ឱមដ្ឋោ, ឌយ្ហមានោវ មត្ថកេ;

ភវរាគប្បហានាយ, សតោ ភិក្ខុ បរិព្ពជេ’’តិ.

… វឌ្ឍមានោ ថេរោ….

វគ្គោ ចតុត្ថោ និដ្ឋិតោ.

តស្សុទ្ទានំ –

គហ្វរតីរិយោ សុប្បិយោ, សោបាកោ ចេវ បោសិយោ;

សាមញ្ញកានិ កុមាបុត្តោ, កុមាបុត្តសហាយកោ;

គវម្បតិ តិស្សត្ថេរោ, វឌ្ឍមានោ មហាយសោតិ.