៣. តតិយវគ្គោ

១. និគ្រោធត្ថេរគាថា

២១. ‘‘នាហំ ភយស្ស ភាយាមិ, សត្ថា នោ អមតស្ស កោវិទោ;

យត្ថ ភយំ នាវតិដ្ឋតិ, តេន មគ្គេន វជន្តិ ភិក្ខវោ’’តិ.

… និគ្រោធោ ថេរោ….

២. ចិត្តកត្ថេរគាថា

២២. ‘‘នីលា សុគីវា សិខិនោ, មោរា ការម្ភិយំ [ការំវិយំ (សី.), ការវិយំ (ស្យា.)] អភិនទន្តិ;

តេ សីតវាតកីឡិតា [សីតវាតកទ្ទិតកលិតា (សី.), សីតវាតកលិតា (ស្យា.)], សុត្តំ ឈាយំ [ឈានំ (ស្យា.), ឈាយិំ (?)] និពោធេន្តី’’តិ.

… ចិត្តកោ ថេរោ….

៣. គោសាលត្ថេរគាថា

២៣. ‘‘អហំ ខោ វេឡុគុម្ពស្មិំ, ភុត្វាន មធុបាយសំ;

បទក្ខិណំ សម្មសន្តោ, ខន្ធានំ ឧទយព្ពយំ;

សានុំ បដិគមិស្សាមិ, វិវេកមនុព្រូហយ’’ន្តិ.

… គោសាលោ ថេរោ….

៤. សុគន្ធត្ថេរគាថា

២៤. ‘‘អនុវស្សិកោ បព្ពជិតោ, បស្ស ធម្មសុធម្មតំ;

តិស្សោ វិជ្ជា អនុប្បត្តា, កតំ ពុទ្ធស្ស សាសន’’ន្តិ.

… សុគន្ធោ ថេរោ….

៥. នន្ទិយត្ថេរគាថា

២៥. ‘‘ឱភាសជាតំ ផលគំ, ចិត្តំ យស្ស អភិណ្ហសោ;

តាទិសំ ភិក្ខុមាសជ្ជ, កណ្ហ ទុក្ខំ និគច្ឆសី’’តិ.

… នន្ទិយោ ថេរោ….

៦. អភយត្ថេរគាថា

២៦. ‘‘សុត្វា សុភាសិតំ វាចំ, ពុទ្ធស្សាទិច្ចពន្ធុនោ;

បច្ចព្យធិំ ហិ និបុណំ, វាលគ្គំ ឧសុនា យថា’’តិ.

… អភយោ ថេរោ….

៧. លោមសកង្គិយត្ថេរគាថា

២៧. ‘‘ទព្ពំ កុសំ បោដកិលំ, ឧសីរំ មុញ្ជបព្ពជំ;

ឧរសា បនុទិស្សាមិ, វិវេកមនុព្រូហយ’’ន្តិ.

… លោមសកង្គិយោ ថេរោ….

៨. ជម្ពុគាមិកបុត្តត្ថេរគាថា

២៨. ‘‘កច្ចិ នោ វត្ថបសុតោ, កច្ចិ នោ ភូសនារតោ;

កច្ចិ សីលមយំ គន្ធំ, កិំ ត្វំ វាយសិ [កច្ចិ សីលមយំ គន្ធំ, ត្វំ វាសិ (ស្យា.)] នេតរា បជា’’តិ.

… ជម្ពុគាមិកបុត្តោ ថេរោ….

៩. ហារិតត្ថេរគាថា

២៩. ‘‘សមុន្នមយមត្តានំ, ឧសុការោវ តេជនំ;

ចិត្តំ ឧជុំ ករិត្វាន, អវិជ្ជំ ភិន្ទ ហារិតា’’តិ.

… ហារិតោ ថេរោ….

១០. ឧត្តិយត្ថេរគាថា

៣០. ‘‘អាពាធេ មេ សមុប្បន្នេ, សតិ មេ ឧទបជ្ជថ;

អាពាធោ មេ សមុប្បន្នោ, កាលោ មេ នប្បមជ្ជិតុ’’ន្តិ.

… ឧត្តិយោ ថេរោ….

វគ្គោ តតិយោ និដ្ឋិតោ.

តស្សុទ្ទានំ –

និគ្រោធោ ចិត្តកោ ថេរោ, គោសាលថេរោ សុគន្ធោ;

នន្ទិយោ អភយោ ថេរោ, ថេរោ លោមសកង្គិយោ;

ជម្ពុគាមិកបុត្តោ ច, ហារិតោ ឧត្តិយោ ឥសីតិ.