២. ទុតិយវគ្គោ

១១. ‘‘បាមោជ្ជពហុលោ ភិក្ខុ, ធម្មេ ពុទ្ធប្បវេទិតេ;

អធិគច្ឆេ បទំ សន្តំ, សង្ខារូបសមំ សុខ’’ន្តិ.

… ចូឡវច្ឆោ [ចូលគវច្ឆោ (សី.)] ថេរោ….

១២. ‘‘បញ្ញាពលី សីលវតូបបន្នោ, សមាហិតោ ឈានរតោ សតីមា;

យទត្ថិយំ ភោជនំ ភុញ្ជមានោ, កង្ខេថ កាលំ ឥធ វីតរាគោ’’តិ.

… មហាវច្ឆោ [មហាគវច្ឆោ (សី.)] ថេរោ….

១៣. ‘‘នីលព្ភវណ្ណា រុចិរា, សីតវារី សុចិន្ធរា;

ឥន្ទគោបកសញ្ឆន្នា, តេ សេលា រមយន្តិ ម’’ន្តិ.

… វនវច្ឆោ ថេរោ….

១៤. ‘‘ឧបជ្ឈាយោ មំ អវច, ឥតោ គច្ឆាម សីវក;

គាមេ មេ វសតិ កាយោ, អរញ្ញំ មេ គតោ មនោ;

សេមានកោបិ គច្ឆាមិ, នត្ថិ សង្គោ វិជានត’’ន្តិ.

… សិវកោ សាមណេរោ….

១៥. ‘‘បញ្ច ឆិន្ទេ បញ្ច ជហេ, បញ្ច ចុត្តរិ ភាវយេ;

បញ្ចសង្គាតិគោ ភិក្ខុ, ឱឃតិណ្ណោតិ វុច្ចតី’’តិ.

… កុណ្ឌធានោ ថេរោ….

១៦. ‘‘យថាបិ ភទ្ទោ អាជញ្ញោ, នង្គលាវត្តនី សិខី;

គច្ឆតិ អប្បកសិរេន, ឯវំ រត្តិន្ទិវា មម;

គច្ឆន្តិ អប្បកសិរេន, សុខេ លទ្ធេ និរាមិសេ’’តិ.

… ពេលដ្ឋសីសោ ថេរោ….

១៧. ‘‘មិទ្ធី យទា ហោតិ មហគ្ឃសោ ច, និទ្ទាយិតា សម្បរិវត្តសាយី;

មហាវរាហោវ និវាបបុដ្ឋោ, បុនប្បុនំ គព្ភមុបេតិ មន្ទោ’’តិ.

… ទាសកោ ថេរោ….

១៨. ‘‘អហុ ពុទ្ធស្ស ទាយាទោ, ភិក្ខុ ភេសកឡាវនេ;

កេវលំ អដ្ឋិសញ្ញាយ, អផរី បថវិំ [បឋវិំ (សី. ស្យា.)] ឥមំ;

មញ្ញេហំ កាមរាគំ សោ, ខិប្បមេវ បហិស្សតី’’តិ [បហីយភិ (សព្ពត្ថ បាឡិយំ)].

… សិង្គាលបិតា [សីគាលបិតា (សី.)] ថេរោ….

១៩. [ធ. ប. ៨០, ១៤៥ ធម្មបទេបិ] ‘‘ឧទកំ ហិ នយន្តិ នេត្តិកា, ឧសុការា នមយន្តិ [ទមយន្តិ (ក.)] តេជនំ;

ទារុំ នមយន្តិ តច្ឆកា, អត្តានំ ទមយន្តិ សុព្ពតា’’តិ.

… កុលោ [កុណ្ឌលោ (សី.), កុឡោ (ស្យា. ក.)] ថេរោ….

២០. ‘‘មរណេ មេ ភយំ នត្ថិ, និកន្តិ នត្ថិ ជីវិតេ;

សន្ទេហំ និក្ខិបិស្សាមិ, សម្បជានោ បដិស្សតោ’’តិ [បតិស្សតោតិ (សី. ស្យា.)].

… អជិតោ ថេរោ ….

វគ្គោ ទុតិយោ និដ្ឋិតោ.

តស្សុទ្ទានំ –

ចូឡវច្ឆោ មហាវច្ឆោ, វនវច្ឆោ ច សីវកោ;

កុណ្ឌធានោ ច ពេលដ្ឋិ, ទាសកោ ច តតោបរិ;

សិង្គាលបិតិកោ ថេរោ, កុលោ ច អជិតោ ទសាតិ.