១. បឋមវគ្គោ

១. ‘‘ឆន្នា មេ កុដិកា សុខា និវាតា, វស្ស ទេវ យថាសុខំ;

ចិត្តំ មេ សុសមាហិតំ វិមុត្តំ, អាតាបី វិហរាមិ វស្ស ទេវា’’តិ.

ឥត្ថំ សុទំ [ឥត្ថំ សុមំ (ក. អដ្ឋ.)] អាយស្មា សុភូតិត្ថេរោ គាថំ អភាសិត្ថាតិ.

២. ‘‘ឧបសន្តោ ឧបរតោ, មន្តភាណី អនុទ្ធតោ;

ធុនាតិ បាបកេ ធម្មេ, ទុមបត្តំវ មាលុតោ’’តិ.

ឥត្ថំ សុទំ អាយស្មា មហាកោដ្ឋិកោ [មហាកោដ្ឋិតោ (សី. ស្យា.)] ថេរោ គាថំ អភាសិត្ថាតិ.

៣. ‘‘បញ្ញំ ឥមំ បស្ស តថាគតានំ, អគ្គិ យថា បជ្ជលិតោ និសីថេ;

អាលោកទា ចក្ខុទទា ភវន្តិ, យេ អាគតានំ វិនយន្តិ កង្ខ’’ន្តិ.

ឥត្ថំ សុទំ អាយស្មា កង្ខារេវតោ ថេរោ គាថំ អភាសិត្ថាតិ.

៤. ‘‘សម្ភិរេវ សមាសេថ, បណ្ឌិតេហត្ថទស្សិភិ;

អត្ថំ មហន្តំ គម្ភីរំ, ទុទ្ទសំ និបុណំ អណុំ;

ធីរា សមធិគច្ឆន្តិ, អប្បមត្តា វិចក្ខណា’’តិ.

ឥត្ថំ សុទំ អាយស្មា បុណ្ណោ មន្តាណិបុត្តោ [មន្តានិបុត្តោ (ស្យា. ក.)] ថេរោ គាថំ អភាសិត្ថាតិ.

៥. ‘‘យោ ទុទ្ទមិយោ ទមេន ទន្តោ, ទព្ពោ សន្តុសិតោ វិតិណ្ណកង្ខោ;

វិជិតាវី អបេតភេរវោ ហិ, ទព្ពោ សោ បរិនិព្ពុតោ ឋិតត្តោ’’តិ.

ឥត្ថំ សុទំ អាយស្មា ទព្ពោ ថេរោ គាថំ អភាសិត្ថាតិ.

៦. ‘‘យោ សីតវនំ ឧបគា ភិក្ខុ, ឯកោ សន្តុសិតោ សមាហិតត្តោ;

វិជិតាវី អបេតលោមហំសោ, រក្ខំ កាយគតាសតិំ ធិតិមា’’តិ.

ឥត្ថំ សុទំ អាយស្មា សីតវនិយោ ថេរោ គាថំ អភាសិត្ថាតិ.

៧. ‘‘យោបានុទី មច្ចុរាជស្ស សេនំ, នឡសេតុំវ សុទុព្ពលំ មហោឃោ;

វិជិតាវី អបេតភេរវោ ហិ, ទន្តោ សោ បរិនិព្ពុតោ ឋិតត្តោ’’តិ.

ឥត្ថំ សុទំ អាយស្មា ភល្លិយោ ថេរោ គាថំ អភាសិត្ថាតិ.

៨. ‘‘យោ ទុទ្ទមិយោ ទមេន ទន្តោ, វីរោ សន្តុសិតោ វិតិណ្ណកង្ខោ;

វិជិតាវី អបេតលោមហំសោ, វីរោ សោ បរិនិព្ពុតោ ឋិតត្តោ’’តិ.

ឥត្ថំ សុទំ អាយស្មា វីរោ ថេរោ គាថំ អភាសិត្ថាតិ.

៩. ‘‘ស្វាគតំ ន ទុរាគតំ [នាបគតំ (សី. ស្យា.)], នយិទំ ទុមន្តិតំ មម;

សំវិភត្តេសុ ធម្មេសុ, យំ សេដ្ឋំ តទុបាគមិ’’ន្តិ.

ឥត្ថំ សុទំ អាយស្មា បិលិន្ទវច្ឆោ [បិលិន្ទិវច្ឆោ (សី.)] ថេរោ គាថំ អភាសិត្ថាតិ.

១០. ‘‘វិហរិ អបេក្ខំ ឥធ វា ហុរំ វា, យោ វេទគូ សមិតោ យតត្តោ;

សព្ពេសុ ធម្មេសុ អនូបលិត្តោ, លោកស្ស ជញ្ញា ឧទយព្ពយញ្ចា’’តិ.

ឥត្ថំ សុទំ អាយស្មា បុណ្ណមាសោ ថេរោ គាថំ អភាសិត្ថាតិ.

វគ្គោ បឋមោ និដ្ឋិតោ.

តស្សុទ្ទានំ –

សុភូតិ កោដ្ឋិកោ ថេរោ, កង្ខារេវតសម្មតោ;

មន្តាណិបុត្តោ ទព្ពោ ច, សីតវនិយោ ច ភល្លិយោ;

វីរោ បិលិន្ទវច្ឆោ ច, បុណ្ណមាសោ តមោនុទោតិ.