៥. ធោតកមាណវបុច្ឆា

១០៦៧. ‘‘បុច្ឆាមិ តំ ភគវា ព្រូហិ មេ តំ, (ឥច្ចាយស្មា ធោតកោ)

វាចាភិកង្ខាមិ មហេសិ តុយ្ហំ;

តវ សុត្វាន និគ្ឃោសំ, សិក្ខេ និព្ពានមត្តនោ’’.

១០៦៨. ‘‘តេនហាតប្បំ ករោហិ, (ធោតកាតិ ភគវា) ឥធេវ និបកោ សតោ;

ឥតោ សុត្វាន និគ្ឃោសំ, សិក្ខេ និព្ពានមត្តនោ’’.

១០៦៩. ‘‘បស្សាមហំ ទេវមនុស្សលោកេ, អកិញ្ចនំ ព្រាហ្មណមិរិយមានំ;

តំ តំ នមស្សាមិ សមន្តចក្ខុ, បមុញ្ច មំ សក្ក កថំកថាហិ’’.

១០៧០. ‘‘នាហំ សហិស្សាមិ [សមិស្សាមិ (ស្យា.), គមិស្សាមិ (សី.), សមីហាមិ (បី.)] បមោចនាយ, កថំកថិំ ធោតក កញ្ចិ លោកេ;

ធម្មញ្ច សេដ្ឋំ អភិជានមានោ [អាជានមានោ (សី. ស្យា. បី.)], ឯវំ តុវំ ឱឃមិមំ តរេសិ’’.

១០៧១. ‘‘អនុសាស ព្រហ្មេ ករុណាយមានោ, វិវេកធម្មំ យមហំ វិជញ្ញំ;

យថាហំ អាកាសោវ អព្យាបជ្ជមានោ, ឥធេវ សន្តោ អសិតោ ចរេយ្យំ’’.

១០៧២. ‘‘កិត្តយិស្សាមិ តេ សន្តិំ, (ធោតកាតិ ភគវា) ទិដ្ឋេ ធម្មេ អនីតិហំ;

យំ វិទិត្វា សតោ ចរំ, តរេ លោកេ វិសត្តិកំ’’.

១០៧៣. ‘‘តញ្ចាហំ អភិនន្ទាមិ, មហេសិ សន្តិមុត្តមំ;

យំ វិទិត្វា សតោ ចរំ, តរេ លោកេ វិសត្តិកំ’’.

១០៧៤. ‘‘យំ កិញ្ចិ សម្បជានាសិ, (ធោតកាតិ ភគវា)

ឧទ្ធំ អធោ តិរិយញ្ចាបិ មជ្ឈេ;

ឯតំ វិទិត្វា សង្គោតិ លោកេ, ភវាភវាយ មាកាសិ តណ្ហ’’ន្តិ.

ធោតកមាណវបុច្ឆា បញ្ចមី និដ្ឋិតា.