៣. បុណ្ណកមាណវបុច្ឆា

១០៤៩. ‘‘អនេជំ មូលទស្សាវិំ, (ឥច្ចាយស្មា បុណ្ណកោ)

អត្ថិ [អត្ថី (ស្យា.)] បញ្ហេន អាគមំ;

កិំ និស្សិតា ឥសយោ មនុជា, ខត្តិយា ព្រាហ្មណា ទេវតានំ;

យញ្ញមកប្បយិំសុ បុថូធ លោកេ, បុច្ឆាមិ តំ ភគវា ព្រូហិ មេ តំ’’.

១០៥០. ‘‘យេ កេចិមេ ឥសយោ មនុជា, (បុណ្ណកាតិ ភគវា)

ខត្តិយា ព្រាហ្មណា ទេវតានំ;

យញ្ញមកប្បយិំសុ បុថូធ លោកេ, អាសីសមានា បុណ្ណក ឥត្ថត្តំ [ឥត្ថភាវំ (សី. ស្យា.)];

ជរំ សិតា យញ្ញមកប្បយិំសុ’’.

១០៥១. ‘‘យេ កេចិមេ ឥសយោ មនុជា, (ឥច្ចាយស្មា បុណ្ណកោ)

ខត្តិយា ព្រាហ្មណា ទេវតានំ;

យញ្ញមកប្បយិំសុ បុថូធ លោកេ, កច្ចិស្សុ តេ ភគវា យញ្ញបថេ អប្បមត្តា;

អតារុំ ជាតិញ្ច ជរញ្ច មារិស, បុច្ឆាមិ តំ ភគវា ព្រូហិ មេ តំ’’.

១០៥២. ‘‘អាសីសន្តិ ថោមយន្តិ, អភិជប្បន្តិ ជុហន្តិ; (បុណ្ណកាតិ ភគវា)

កាមាភិជប្បន្តិ បដិច្ច លាភំ, តេ យាជយោគា ភវរាគរត្តា;

នាតរិំសុ ជាតិជរន្តិ ព្រូមិ’’.

១០៥៣. ‘‘តេ ចេ នាតរិំសុ យាជយោគា, (ឥច្ចាយស្មា បុណ្ណកោ)

យញ្ញេហិ ជាតិញ្ច ជរញ្ច មារិស;

អថ កោ ចរហិ ទេវមនុស្សលោកេ, អតារិ ជាតិញ្ច ជរញ្ច មារិស;

បុច្ឆាមិ តំ ភគវា ព្រូហិ មេ តំ’’.

១០៥៤. ‘‘សង្ខាយ លោកស្មិ បរោបរានិ [បរោវរានិ (សី. ស្យា.)], (បុណ្ណកាតិ ភគវា)

យស្សិញ្ជិតំ នត្ថិ កុហិញ្ចិ លោកេ;

សន្តោ វិធូមោ អនីឃោ និរាសោ, អតារិ សោ ជាតិជរន្តិ ព្រូមី’’តិ.

បុណ្ណកមាណវបុច្ឆា តតិយា និដ្ឋិតា.