១៣. ឧទយមាណវបុច្ឆា

១១១១. ‘‘ឈាយិំ វិរជមាសីនំ, (ឥច្ចាយស្មា ឧទយោ) កតកិច្ចំ អនាសវំ;

បារគុំ សព្ពធម្មានំ, អត្ថិ បញ្ហេន អាគមំ;

អញ្ញាវិមោក្ខំ បព្រូហិ, អវិជ្ជាយ បភេទនំ’’.

១១១២. ‘‘បហានំ កាមច្ឆន្ទានំ, (ឧទយាតិ ភគវា) ទោមនស្សាន ចូភយំ;

ថិនស្ស ច បនូទនំ, កុក្កុច្ចានំ និវារណំ.

១១១៣. ‘‘ឧបេក្ខាសតិសំសុទ្ធំ, ធម្មតក្កបុរេជវំ;

អញ្ញាវិមោក្ខំ បព្រូមិ, អវិជ្ជាយ បភេទនំ’’.

១១១៤. ‘‘កិំសុ សំយោជនោ លោកោ, កិំសុ តស្ស វិចារណំ;

កិស្សស្ស វិប្បហានេន, និព្ពានំ ឥតិ វុច្ចតិ’’.

១១១៥. ‘‘នន្ទិសំយោជនោ លោកោ, វិតក្កស្ស វិចារណំ;

តណ្ហាយ វិប្បហានេន, និព្ពានំ ឥតិ វុច្ចតិ’’.

១១១៦. ‘‘កថំ សតស្ស ចរតោ, វិញ្ញាណំ ឧបរុជ្ឈតិ;

ភគវន្តំ បុដ្ឋុមាគម្ម, តំ សុណោម វចោ តវ’’.

១១១៧. ‘‘អជ្ឈត្តញ្ច ពហិទ្ធា ច, វេទនំ នាភិនន្ទតោ;

ឯវំ សតស្ស ចរតោ, វិញ្ញាណំ ឧបរុជ្ឈតី’’តិ.

ឧទយមាណវបុច្ឆា តេរសមា និដ្ឋិតា.