១០. កប្បមាណវបុច្ឆា

១០៩៨. ‘‘មជ្ឈេ សរស្មិំ តិដ្ឋតំ, (ឥច្ចាយស្មា កប្បោ)

ឱឃេ ជាតេ មហព្ភយេ;

ជរាមច្ចុបរេតានំ, ទីបំ បព្រូហិ មារិស;

ត្វញ្ច មេ ទីបមក្ខាហិ, យថាយិទំ នាបរំ សិយា’’.

១០៩៩. ‘‘មជ្ឈេ សរស្មិំ តិដ្ឋតំ, (កប្បាតិ ភគវា)

ឱឃេ ជាតេ មហព្ភយេ;

ជរាមច្ចុបរេតានំ, ទីបំ បព្រូមិ កប្ប តេ.

១១០០. ‘‘អកិញ្ចនំ អនាទានំ, ឯតំ ទីបំ អនាបរំ;

និព្ពានំ ឥតិ [និព្ពានមីតិ (សី.)] នំ ព្រូមិ, ជរាមច្ចុបរិក្ខយំ.

១១០១. ‘‘ឯតទញ្ញាយ យេ សតា, ទិដ្ឋធម្មាភិនិព្ពុតា;

ន តេ មារវសានុគា, ន តេ មារស្ស បទ្ធគូ’’តិ [បដ្ឋគូតិ (ស្យា. ក.)].

កប្បមាណវបុច្ឆា ទសមា និដ្ឋិតា.