១. កាមសុត្តំ

៧៧២. កាមំ កាមយមានស្ស, តស្ស ចេ តំ សមិជ្ឈតិ;

អទ្ធា បីតិមនោ ហោតិ, លទ្ធា មច្ចោ យទិច្ឆតិ.

៧៧៣. តស្ស ចេ កាមយានស្ស [កាមយមានស្ស (ក.)], ឆន្ទជាតស្ស ជន្តុនោ;

តេ កាមា បរិហាយន្តិ, សល្លវិទ្ធោវ រុប្បតិ.

៧៧៤. យោ កាមេ បរិវជ្ជេតិ, សប្បស្សេវ បទា សិរោ;

សោមំ [សោ ឥមំ (សី. បី.)] វិសត្តិកំ លោកេ, សតោ សមតិវត្តតិ.

៧៧៥. ខេត្តំ វត្ថុំ ហិរញ្ញំ វា, គវស្សំ [គវាស្សំ (សី. ស្យា. បី.)] ទាសបោរិសំ;

ថិយោ ពន្ធូ បុថុ កាមេ, យោ នរោ អនុគិជ្ឈតិ.

៧៧៦. អពលា នំ ពលីយន្តិ, មទ្ទន្តេនំ បរិស្សយា;

តតោ នំ ទុក្ខមន្វេតិ, នាវំ ភិន្នមិវោទកំ.

៧៧៧. តស្មា ជន្តុ សទា សតោ, កាមានិ បរិវជ្ជយេ;

តេ បហាយ តរេ ឱឃំ, នាវំ សិត្វាវ [សិញ្ចិត្វា (សី.)] បារគូតិ.

កាមសុត្តំ បឋមំ និដ្ឋិតំ.