៩. ហេមវតសុត្តំ

១៥៣. ‘‘អជ្ជ បន្នរសោ ឧបោសថោ, (ឥតិ សាតាគិរោ យក្ខោ)

ទិព្ពា [ទិព្យា (សី. ស្យា. កំ. បី.)] រត្តិ ឧបដ្ឋិតា;

អនោមនាមំ សត្ថារំ, ហន្ទ បស្សាម គោតមំ’’.

១៥៤. ‘‘កច្ចិ មនោ សុបណិហិតោ, (ឥតិ ហេមវតោ យក្ខោ)

សព្ពភូតេសុ តាទិនោ;

កច្ចិ ឥដ្ឋេ អនិដ្ឋេ ច, សង្កប្បស្ស វសីកតា’’.

១៥៥. ‘‘មនោ ចស្ស សុបណិហិតោ, (ឥតិ សាតាគិរោ យក្ខោ)

សព្ពភូតេសុ តាទិនោ;

អថោ ឥដ្ឋេ អនិដ្ឋេ ច, សង្កប្បស្ស វសីកតា’’.

១៥៦. ‘‘កច្ចិ អទិន្នំ នាទិយតិ, (ឥតិ ហេមវតោ យក្ខោ)

កច្ចិ បាណេសុ សញ្ញតោ;

កច្ចិ អារា បមាទម្ហា, កច្ចិ ឈានំ ន រិញ្ចតិ’’.

១៥៧. ‘‘ន សោ អទិន្នំ អាទិយតិ, (ឥតិ សាតាគិរោ យក្ខោ)

អថោ បាណេសុ សញ្ញតោ;

អថោ អារា បមាទម្ហា, ពុទ្ធោ ឈានំ ន រិញ្ចតិ’’.

១៥៨. ‘‘កច្ចិ មុសា ន ភណតិ, (ឥតិ ហេមវតោ យក្ខោ)

កច្ចិ ន ខីណព្យប្បថោ;

កច្ចិ វេភូតិយំ នាហ, កច្ចិ សម្ផំ ន ភាសតិ’’.

១៥៩. ‘‘មុសា ច សោ ន ភណតិ, (ឥតិ សាតាគិរោ យក្ខោ)

អថោ ន ខីណព្យប្បថោ;

អថោ វេភូតិយំ នាហ, មន្តា អត្ថំ ច [អត្ថំ សោ (សី. បី. ក.)] ភាសតិ’’.

១៦០. ‘‘កច្ចិ ន រជ្ជតិ កាមេសុ, (ឥតិ ហេមវតោ យក្ខោ)

កច្ចិ ចិត្តំ អនាវិលំ;

កច្ចិ មោហំ អតិក្កន្តោ, កច្ចិ ធម្មេសុ ចក្ខុមា’’.

១៦១. ‘‘ន សោ រជ្ជតិ កាមេសុ, (ឥតិ សាតាគិរោ យក្ខោ)

អថោ ចិត្តំ អនាវិលំ;

សព្ពមោហំ អតិក្កន្តោ, ពុទ្ធោ ធម្មេសុ ចក្ខុមា’’.

១៦២. ‘‘កច្ចិ វិជ្ជាយ សម្បន្នោ, (ឥតិ ហេមវតោ យក្ខោ )

កច្ចិ សំសុទ្ធចារណោ;

កច្ចិស្ស អាសវា ខីណា, កច្ចិ នត្ថិ បុនព្ភវោ’’.

១៦៣. ‘‘វិជ្ជាយ ចេវ សម្បន្នោ, (ឥតិ សាតាគិរោ យក្ខោ)

អថោ សំសុទ្ធចារណោ;

សព្ពស្ស អាសវា ខីណា, នត្ថិ តស្ស បុនព្ភវោ’’.

១៦៤. ‘‘សម្បន្នំ មុនិនោ ចិត្តំ, កម្មុនា ព្យប្បថេន ច;

វិជ្ជាចរណសម្បន្នំ, ធម្មតោ នំ បសំសតិ’’.

១៦៥. ‘‘សម្បន្នំ មុនិនោ ចិត្តំ, កម្មុនា ព្យប្បថេន ច;

វិជ្ជាចរណសម្បន្នំ, ធម្មតោ អនុមោទសិ’’.

១៦៦. ‘‘សម្បន្នំ មុនិនោ ចិត្តំ, កម្មុនា ព្យប្បថេន ច;

វិជ្ជាចរណសម្បន្នំ, ហន្ទ បស្សាម គោតមំ.

១៦៧. ‘‘ឯណិជង្ឃំ កិសំ វីរំ [ធីរំ (ស្យា.)], អប្បាហារំ អលោលុបំ;

មុនិំ វនស្មិំ ឈាយន្តំ, ឯហិ បស្សាម គោតមំ.

១៦៨. ‘‘សីហំវេកចរំ នាគំ, កាមេសុ អនបេក្ខិនំ;

ឧបសង្កម្ម បុច្ឆាម, មច្ចុបាសប្បមោចនំ.

១៦៩. ‘‘អក្ខាតារំ បវត្តារំ, សព្ពធម្មាន បារគុំ;

ពុទ្ធំ វេរភយាតីតំ, មយំ បុច្ឆាម គោតមំ’’.

១៧០. ‘‘កិស្មិំ លោកោ សមុប្បន្នោ, (ឥតិ ហេមវតោ យក្ខោ)

កិស្មិំ កុព្ពតិ សន្ថវំ [សន្ធវំ (ក.)];

កិស្ស លោកោ ឧបាទាយ, កិស្មិំ លោកោ វិហញ្ញតិ’’.

១៧១. ‘‘ឆសុ [ឆស្សុ (សី. បី.)] លោកោ សមុប្បន្នោ, (ហេមវតាតិ ភគវា)

ឆសុ កុព្ពតិ សន្ថវំ;

ឆន្នមេវ ឧបាទាយ, ឆសុ លោកោ វិហញ្ញតិ’’.

១៧២. ‘‘កតមំ តំ ឧបាទានំ, យត្ថ លោកោ វិហញ្ញតិ;

និយ្យានំ បុច្ឆិតោ ព្រូហិ, កថំ ទុក្ខា បមុច្ចតិ’’ [បមុញ្ចតិ (ស្យា.)].

១៧៣. ‘‘បញ្ច កាមគុណា លោកេ, មនោឆដ្ឋា បវេទិតា;

ឯត្ថ ឆន្ទំ វិរាជេត្វា, ឯវំ ទុក្ខា បមុច្ចតិ.

១៧៤. ‘‘ឯតំ លោកស្ស និយ្យានំ, អក្ខាតំ វោ យថាតថំ;

ឯតំ វោ អហមក្ខាមិ, ឯវំ ទុក្ខា បមុច្ចតិ’’.

១៧៥. ‘‘កោ សូធ តរតិ ឱឃំ, កោធ តរតិ អណ្ណវំ;

អប្បតិដ្ឋេ អនាលម្ពេ, កោ គម្ភីរេ ន សីទតិ’’.

១៧៦. ‘‘សព្ពទា សីលសម្បន្នោ, បញ្ញវា សុសមាហិតោ;

អជ្ឈត្តចិន្តី [អជ្ឈត្តសញ្ញី (ស្យា. កំ. ក.)] សតិមា, ឱឃំ តរតិ ទុត្តរំ.

១៧៧. ‘‘វិរតោ កាមសញ្ញាយ, សព្ពសំយោជនាតិគោ;

នន្ទីភវបរិក្ខីណោ, សោ គម្ភីរេ ន សីទតិ’’.

១៧៨. ‘‘គព្ភីរបញ្ញំ និបុណត្ថទស្សិំ, អកិញ្ចនំ កាមភវេ អសត្តំ;

តំ បស្សថ សព្ពធិ វិប្បមុត្តំ, ទិព្ពេ បថេ កមមានំ មហេសិំ.

១៧៩. ‘‘អនោមនាមំ និបុណត្ថទស្សិំ, បញ្ញាទទំ កាមាលយេ អសត្តំ;

តំ បស្សថ សព្ពវិទុំ សុមេធំ, អរិយេ បថេ កមមានំ មហេសិំ.

១៨០. ‘‘សុទិដ្ឋំ វត នោ អជ្ជ, សុប្បភាតំ សុហុដ្ឋិតំ;

យំ អទ្ទសាម សម្ពុទ្ធំ, ឱឃតិណ្ណមនាសវំ.

១៨១. ‘‘ឥមេ ទសសតា យក្ខា, ឥទ្ធិមន្តោ យសស្សិនោ;

សព្ពេ តំ សរណំ យន្តិ, ត្វំ នោ សត្ថា អនុត្តរោ.

១៨២. ‘‘តេ មយំ វិចរិស្សាម, គាមា គាមំ នគា នគំ;

នមស្សមានា សម្ពុទ្ធំ, ធម្មស្ស ច សុធម្មត’’ន្តិ.

ហេមវតសុត្តំ នវមំ និដ្ឋិតំ.