១០. អាឡវកសុត្តំ

ឯវំ មេ សុតំ – ឯកំ សមយំ ភគវា អាឡវិយំ វិហរតិ អាឡវកស្ស យក្ខស្ស ភវនេ. អថ ខោ អាឡវកោ យក្ខោ យេន ភគវា តេនុបសង្កមិ; ឧបសង្កមិត្វា ភគវន្តំ ឯតទវោច – ‘‘និក្ខម, សមណា’’តិ. ‘‘សាធាវុសោ’’តិ ភគវា និក្ខមិ. ‘‘បវិស, សមណា’’តិ. ‘‘សាធាវុសោ’’តិ ភគវា បាវិសិ.

ទុតិយម្បិ ខោ…បេ… តតិយម្បិ ខោ អាឡវកោ យក្ខោ ភគវន្តំ ឯតទវោច – ‘‘និក្ខម, សមណា’’តិ. ‘‘សាធាវុសោ’’តិ ភគវា និក្ខមិ. ‘‘បវិស, សមណា’’តិ. ‘‘សាធាវុសោ’’តិ ភគវា បាវិសិ.

ចតុត្ថម្បិ ខោ អាឡវកោ យក្ខោ ភគវន្តំ ឯតទវោច – ‘‘និក្ខម, សមណា’’តិ. ‘‘ន ខ្វាហំ តំ, អាវុសោ, និក្ខមិស្សាមិ. យំ តេ ករណីយំ, តំ ករោហី’’តិ.

‘‘បញ្ហំ តំ, សមណ, បុច្ឆិស្សាមិ. សចេ មេ ន ព្យាករិស្សសិ, ចិត្តំ វា តេ ខិបិស្សាមិ, ហទយំ វា តេ ផាលេស្សាមិ, បាទេសុ វា គហេត្វា បារគង្គាយ ខិបិស្សាមី’’តិ.

‘‘ន ខ្វាហំ តំ, អាវុសោ, បស្សាមិ សទេវកេ លោកេ សមារកេ សព្រហ្មកេ សស្សមណព្រាហ្មណិយា បជាយ សទេវមនុស្សាយ យោ មេ ចិត្តំ វា ខិបេយ្យ ហទយំ វា ផាលេយ្យ បាទេសុ វា គហេត្វា បារគង្គាយ ខិបេយ្យ. អបិ ច ត្វំ, អាវុសោ, បុច្ឆ យទាកង្ខសី’’តិ. អថ ខោ អាឡវកោ យក្ខោ ភគវន្តំ គាថាយ អជ្ឈភាសិ –

១៨៣. ‘‘កិំ សូធ វិត្តំ បុរិសស្ស សេដ្ឋំ, កិំ សុ សុចិណ្ណំ សុខមាវហាតិ;

កិំ សុ [កិំ សូ (សី.)] ហវេ សាទុតរំ រសានំ, កថំ ជីវិំ ជីវិតមាហុ សេដ្ឋំ’’.

១៨៤. ‘‘សទ្ធីធ វិត្តំ បុរិសស្ស សេដ្ឋំ, ធម្មោ សុចិណ្ណោ សុខមាវហាតិ;

សច្ចំ ហវេ សាទុតរំ រសានំ, បញ្ញាជីវិំ ជីវិតមាហុ សេដ្ឋំ’’.

១៨៥. ‘‘កថំ សុ តរតិ ឱឃំ, កថំ សុ តរតិ អណ្ណវំ;

កថំ សុ ទុក្ខមច្ចេតិ, កថំ សុ បរិសុជ្ឈតិ’’.

១៨៦. ‘‘សទ្ធា តរតិ ឱឃំ, អប្បមាទេន អណ្ណវំ;

វីរិយេន [វិរិយេន (សី. ស្យា. កំ. បី.)] ទុក្ខមច្ចេតិ, បញ្ញាយ បរិសុជ្ឈតិ’’.

១៨៧. ‘‘កថំ សុ លភតេ បញ្ញំ, កថំ សុ វិន្ទតេ ធនំ;

កថំ សុ កិត្តិំ បប្បោតិ, កថំ មិត្តានិ គន្ថតិ;

អស្មា លោកា បរំ លោកំ, កថំ បេច្ច ន សោចតិ’’.

១៨៨. ‘‘សទ្ទហានោ អរហតំ, ធម្មំ និព្ពានបត្តិយា;

សុស្សូសំ [សុស្សូសា (សី. បី.)] លភតេ បញ្ញំ, អប្បមត្តោ វិចក្ខណោ.

១៨៩. ‘‘បតិរូបការី ធុរវា, ឧដ្ឋាតា វិន្ទតេ ធនំ;

សច្ចេន កិត្តិំ បប្បោតិ, ទទំ មិត្តានិ គន្ថតិ.

១៩០. ‘‘យស្សេតេ ចតុរោ ធម្មា, សទ្ធស្ស ឃរមេសិនោ;

សច្ចំ ធម្មោ [ទមោ (?)] ធិតិ ចាគោ, ស វេ បេច្ច ន សោចតិ.

១៩១. ‘‘ឥង្ឃ អញ្ញេបិ បុច្ឆស្សុ, បុថូ សមណព្រាហ្មណេ;

យទិ សច្ចា ទមា ចាគា, ខន្ត្យា ភិយ្យោធ វិជ្ជតិ’’.

១៩២. ‘‘កថំ នុ ទានិ បុច្ឆេយ្យំ, បុថូ សមណព្រាហ្មណេ;

យោហំ [សោហំ (សី. បី.)] អជ្ជ បជានាមិ, យោ អត្ថោ សម្បរាយិកោ.

១៩៣. ‘‘អត្ថាយ វត មេ ពុទ្ធោ, វាសាយាឡវិមាគមា;

យោហំ [អដ្ឋិន្ហារូហិ សំយុត្តោ (ស្យា. ក.)] អជ្ជ បជានាមិ, យត្ថ ទិន្នំ មហប្ផលំ.

១៩៤. ‘‘សោ អហំ វិចរិស្សាមិ, គាមា គាមំ បុរា បុរំ;

នមស្សមានោ សម្ពុទ្ធំ, ធម្មស្ស ច សុធម្មត’’ន្តិ.

អាឡវកសុត្តំ ទសមំ និដ្ឋិតំ.