១១. វិជយសុត្តំ

១៩៥. ចរំ វា យទិ វា តិដ្ឋំ, និសិន្នោ ឧទ វា សយំ;

សមិញ្ជេតិ បសារេតិ, ឯសា កាយស្ស ឥញ្ជនា.

១៩៦. អដ្ឋិនហារុសំយុត្តោ, តចមំសាវលេបនោ;

ឆវិយា កាយោ បដិច្ឆន្នោ, យថាភូតំ ន ទិស្សតិ.

១៩៧. អន្តបូរោ ឧទរបូរោ, យកនបេឡស្ស [យកបេឡស្ស (សី. ស្យា.)] វត្ថិនោ;

ហទយស្ស បប្ផាសស្ស, វក្កស្ស បិហកស្ស ច.

១៩៨. សិង្ឃាណិកាយ ខេឡស្ស, សេទស្ស ច មេទស្ស ច;

លោហិតស្ស លសិកាយ, បិត្តស្ស ច វសាយ ច.

១៩៩. អថស្ស នវហិ សោតេហិ, អសុចី សវតិ សព្ពទា;

អក្ខិម្ហា អក្ខិគូថកោ, កណ្ណម្ហា កណ្ណគូថកោ.

២០០. សិង្ឃាណិកា ច នាសតោ, មុខេន វមតេកទា;

បិត្តំ សេម្ហញ្ច វមតិ, កាយម្ហា សេទជល្លិកា.

២០១. អថស្ស សុសិរំ សីសំ, មត្ថលុង្គស្ស បូរិតំ;

សុភតោ នំ មញ្ញតិ, ពាលោ អវិជ្ជាយ បុរក្ខតោ.

២០២. យទា ច សោ មតោ សេតិ, ឧទ្ធុមាតោ វិនីលកោ;

អបវិទ្ធោ សុសានស្មិំ, អនបេក្ខា ហោន្តិ ញាតយោ.

២០៣. ខាទន្តិ នំ សុវានា [សុបាណា (បី.)] ច, សិង្គាលា [សិគាលា (សី. ស្យា. កំ. បី.)] វកា កិមី;

កាកា គិជ្ឈា ច ខាទន្តិ, យេ ចញ្ញេ សន្តិ បាណិនោ.

២០៤. សុត្វាន ពុទ្ធវចនំ, ភិក្ខុ បញ្ញាណវា ឥធ;

សោ ខោ នំ បរិជានាតិ, យថាភូតញ្ហិ បស្សតិ.

២០៥. យថា ឥទំ តថា ឯតំ, យថា ឯតំ តថា ឥទំ;

អជ្ឈត្តញ្ច ពហិទ្ធា ច, កាយេ ឆន្ទំ វិរាជយេ.

២០៦. ឆន្ទរាគវិរត្តោ សោ, ភិក្ខុ បញ្ញាណវា ឥធ;

អជ្ឈគា អមតំ សន្តិំ, និព្ពានំ បទមច្ចុតំ.

២០៧. ទ្វិបាទកោយំ [ទិបាទកោយំ (សី. ស្យា. កំ. បី.)] អសុចិ, ទុគ្គន្ធោ បរិហារតិ [បរិហីរតិ (សី. ស្យា. កំ. បី.)];

នានាកុណបបរិបូរោ, វិស្សវន្តោ តតោ តតោ.

២០៨. ឯតាទិសេន កាយេន, យោ មញ្ញេ ឧណ្ណមេតវេ [ឧន្នមេតវេ (?)];

បរំ វា អវជានេយ្យ, កិមញ្ញត្រ អទស្សនាតិ.

វិជយសុត្តំ ឯកាទសមំ និដ្ឋិតំ.