១២. មុនិសុត្តំ

២០៩. សន្ថវាតោ [សន្ធវតោ (ក.)] ភយំ ជាតំ, និកេតា ជាយតេ រជោ;

អនិកេតមសន្ថវំ, ឯតំ វេ មុនិទស្សនំ.

២១០. យោ ជាតមុច្ឆិជ្ជ ន រោបយេយ្យ, ជាយន្តមស្ស នានុប្បវេច្ឆេ;

តមាហុ ឯកំ មុនិនំ ចរន្តំ, អទ្ទក្ខិ សោ សន្តិបទំ មហេសិ.

២១១. សង្ខាយ វត្ថូនិ បមាយ [បហាយ (ក. សី. ក.), សមាយ (ក.) ប + មី + ត្វា = បមាយ, យថា និស្សាយាតិបទំ] ពីជំ, សិនេហមស្ស នានុប្បវេច្ឆេ;

ស វេ មុនី ជាតិខយន្តទស្សី, តក្កំ បហាយ ន ឧបេតិ សង្ខំ.

២១២. អញ្ញាយ សព្ពានិ និវេសនានិ, អនិកាមយំ អញ្ញតរម្បិ តេសំ;

ស វេ មុនី វីតគេធោ អគិទ្ធោ, នាយូហតី បារគតោ ហិ ហោតិ.

២១៣. សព្ពាភិភុំ សព្ពវិទុំ សុមេធំ, សព្ពេសុ ធម្មេសុ អនូបលិត្តំ;

សព្ពញ្ជហំ តណ្ហក្ខយេ វិមុត្តំ, តំ វាបិ ធីរា មុនិ [មុនិំ (សី. បី.)] វេទយន្តិ.

២១៤. បញ្ញាពលំ សីលវតូបបន្នំ, សមាហិតំ ឈានរតំ សតីមំ;

សង្គា បមុត្តំ អខិលំ អនាសវំ, តំ វាបិ ធីរា មុនិ វេទយន្តិ.

២១៥. ឯកំ ចរន្តំ មុនិមប្បមត្តំ, និន្ទាបសំសាសុ អវេធមានំ;

សីហំវ សទ្ទេសុ អសន្តសន្តំ, វាតំវ ជាលម្ហិ អសជ្ជមានំ;

បទ្មំវ [បទុមំវ (សី. ស្យា. បី.)] តោយេន អលិប្បមានំ [អលិម្បមានំ (ស្យា. ក.)], នេតារមញ្ញេសមនញ្ញនេយ្យំ;

តំ វាបិ ធីរា មុនិ វេទយន្តិ.

២១៦. យោ ឱគហណេ ថម្ភោរិវាភិជាយតិ, យស្មិំ បរេ វាចាបរិយន្តំ [វាចំ បរិយន្តំ (ក.)] វទន្តិ;

តំ វីតរាគំ សុសមាហិតិន្ទ្រិយំ, តំ វាបិ ធីរា មុនិ វេទយន្តិ.

២១៧. យោ វេ ឋិតត្តោ តសរំវ ឧជ្ជុ, ជិគុច្ឆតិ កម្មេហិ បាបកេហិ;

វីមំសមានោ វិសមំ សមញ្ច, តំ វាបិ ធីរា មុនិ វេទយន្តិ.

២១៨. យោ សញ្ញតត្តោ ន ករោតិ បាបំ, ទហរោ មជ្ឈិមោ ច មុនិ [ទហរោ ច មជ្ឈោ ច មុនី (សី. ស្យា. កំ. បី.)] យតត្តោ;

អរោសនេយ្យោ ន សោ រោសេតិ កញ្ចិ [ន រោសេតិ (ស្យា.)], តំ វាបិ ធីរា មុនិ វេទយន្តិ.

២១៩. យទគ្គតោ មជ្ឈតោ សេសតោ វា, បិណ្ឌំ លភេថ បរទត្តូបជីវី;

នាលំ ថុតុំ នោបិ និបច្ចវាទី, តំ វាបិ ធីរា មុនិ វេទយន្តិ.

២២០. មុនិំ ចរន្តំ វិរតំ មេថុនស្មា, យោ យោព្ពនេ នោបនិពជ្ឈតេ ក្វចិ;

មទប្បមាទា វិរតំ វិប្បមុត្តំ, តំ វាបិ ធីរា មុនិ វេទយន្តិ.

២២១. អញ្ញាយ លោកំ បរមត្ថទស្សិំ, ឱឃំ សមុទ្ទំ អតិតរិយ តាទិំ;

តំ ឆិន្នគន្ថំ អសិតំ អនាសវំ, តំ វាបិ ធីរា មុនិ វេទយន្តិ.

២២២. អសមា ឧភោ ទូរវិហារវុត្តិនោ, គិហី [គិហិ (ក.)] ទារបោសី អមមោ ច សុព្ពតោ;

បរបាណរោធាយ គិហី អសញ្ញតោ, និច្ចំ មុនី រក្ខតិ បាណិនេ [បាណិនោ (សី.)] យតោ.

២២៣. សិខី យថា នីលគីវោ [នីលគិវោ (ស្យា.)] វិហង្គមោ, ហំសស្ស នោបេតិ ជវំ កុទាចនំ;

ឯវំ គិហី នានុករោតិ ភិក្ខុនោ, មុនិនោ វិវិត្តស្ស វនម្ហិ ឈាយតោតិ.

មុនិសុត្តំ ទ្វាទសមំ និដ្ឋិតំ.

ឧរគវគ្គោ បឋមោ និដ្ឋិតោ.