៨. មេត្តសុត្តំ

១៤៣. ករណីយមត្ថកុសលេន, យន្ត សន្តំ បទំ អភិសមេច្ច;

សក្កោ ឧជូ ច សុហុជូ [សូជូ (សី.)] ច, សូវចោ ចស្ស មុទុ អនតិមានី.

១៤៤. សន្តុស្សកោ ច សុភរោ ច, អប្បកិច្ចោ ច សល្លហុកវុត្តិ;

សន្តិន្ទ្រិយោ ច និបកោ ច, អប្បគព្ភោ កុលេស្វននុគិទ្ធោ.

១៤៥. ន ច ខុទ្ទមាចរេ កិញ្ចិ, យេន វិញ្ញូ បរេ ឧបវទេយ្យុំ;

សុខិនោ វ ខេមិនោ ហោន្តុ, សព្ពសត្តា [សព្ពេ សត្តា (សី. ស្យា.)] ភវន្តុ សុខិតត្តា.

១៤៦. យេ កេចិ បាណភូតត្ថិ, តសា វា ថាវរា វនវសេសា;

ទីឃា វា យេ វ មហន្តា [មហន្ត (?)], មជ្ឈិមា រស្សកា អណុកថូលា.

១៤៧. ទិដ្ឋា វា យេ វ អទិដ្ឋា [អទិដ្ឋ (?)], យេ វ [យេ ច (សី. ស្យា. កំ. បី.)] ទូរេ វសន្តិ អវិទូរេ;

ភូតា វ សម្ភវេសី វ [ភូតា វា សម្ភវេសី វា (ស្យា. កំ. បី. ក.)], សព្ពសត្តា ភវន្តុ សុខិតត្តា.

១៤៨. ន បរោ បរំ និកុព្ពេថ, នាតិមញ្ញេថ កត្ថចិ ន កញ្ចិ [នំ កញ្ចិ (សី. បី.), នំ កិញ្ចិ (ស្យា.), ន កិញ្ចិ (ក.)];

ព្យារោសនា បដិឃសញ្ញា, នាញ្ញមញ្ញស្ស ទុក្ខមិច្ឆេយ្យ.

១៤៩. មាតា យថា និយំ បុត្តមាយុសា ឯកបុត្តមនុរក្ខេ;

ឯវម្បិ សព្ពភូតេសុ, មានសំ ភាវយេ អបរិមាណំ.

១៥០. មេត្តញ្ច សព្ពលោកស្មិ, មានសំ ភាវយេ អបរិមាណំ;

ឧទ្ធំ អធោ ច តិរិយញ្ច, អសម្ពាធំ អវេរមសបត្តំ.

១៥១. តិដ្ឋំ ចរំ និសិន្នោ វ [វា (សី. ស្យា. កំ. បី.)], សយានោ យាវតាស្ស វិតមិទ្ធោ [វិគតមិទ្ធោ (ពហូសុ)];

ឯតំ សតិំ អធិដ្ឋេយ្យ, ព្រហ្មមេតំ វិហារមិធមាហុ.

១៥២. ទិដ្ឋិញ្ច អនុបគ្គម្ម, សីលវា ទស្សនេន សម្បន្នោ;

កាមេសុ វិនយ [វិនេយ្យ (សី. ស្យា. បី.)] គេធំ, ន ហិ ជាតុគ្គព្ភសេយ្យ បុនរេតីតិ.

មេត្តសុត្តំ អដ្ឋមំ និដ្ឋិតំ.