៧. វសលសុត្តំ

ឯវំ មេ សុតំ – ឯកំ សមយំ ភគវា សាវត្ថិយំ វិហរតិ ជេតវនេ អនាថបិណ្ឌិកស្ស អារាមេ. អថ ខោ ភគវា បុព្ពណ្ហសមយំ និវាសេត្វា បត្តចីវរមាទាយ សាវត្ថិំ បិណ្ឌាយ បាវិសិ. តេន ខោ បន សមយេន អគ្គិកភារទ្វាជស្ស ព្រាហ្មណស្ស និវេសនេ អគ្គិ បជ្ជលិតោ ហោតិ អាហុតិ បគ្គហិតា. អថ ខោ ភគវា សាវត្ថិយំ សបទានំ បិណ្ឌាយ ចរមានោ យេន អគ្គិកភារទ្វាជស្ស ព្រាហ្មណស្ស និវេសនំ តេនុបសង្កមិ.

អទ្ទសា ខោ អគ្គិកភារទ្វាជោ ព្រាហ្មណោ ភគវន្តំ ទូរតោវ អាគច្ឆន្តំ. ទិស្វាន ភគវន្តំ ឯតទវោច – ‘‘តត្រេវ [អត្រេវ (ស្យា. ក.)], មុណ្ឌក; តត្រេវ, សមណក; តត្រេវ, វសលក តិដ្ឋាហី’’តិ.

ឯវំ វុត្តេ, ភគវា អគ្គិកភារទ្វាជំ ព្រាហ្មណំ ឯតទវោច – ‘‘ជានាសិ បន ត្វំ, ព្រាហ្មណ, វសលំ វា វសលករណេ វា ធម្មេ’’តិ? ‘‘ន ខ្វាហំ, ភោ គោតម, ជានាមិ វសលំ វា វសលករណេ វា ធម្មេ; សាធុ មេ ភវំ គោតមោ តថា ធម្មំ ទេសេតុ, យថាហំ ជានេយ្យំ វសលំ វា វសលករណេ វា ធម្មេ’’តិ. ‘‘តេន ហិ, ព្រាហ្មណ, សុណាហិ, សាធុកំ មនសិ ករោហិ; ភាសិស្សាមី’’តិ. ‘‘ឯវំ, ភោ’’តិ ខោ អគ្គិកភារទ្វាជោ ព្រាហ្មណោ ភគវតោ បច្ចស្សោសិ. ភគវា ឯតទវោច –

១១៦. ‘‘កោធនោ ឧបនាហី ច, បាបមក្ខី ច យោ នរោ;

វិបន្នទិដ្ឋិ មាយាវី, តំ ជញ្ញា វសលោ ឥតិ.

១១៧. ‘‘ឯកជំ វា ទ្វិជំ [ទិជំ (បី.)] វាបិ, យោធ បាណំ វិហិំសតិ;

យស្ស បាណេ ទយា នត្ថិ, តំ ជញ្ញា វសលោ ឥតិ.

១១៨. ‘‘យោ ហន្តិ បរិរុន្ធតិ [ឧបរុន្ធេតិ (ស្យា.), ឧបរុន្ធតិ (ក.)], គាមានិ និគមានិ ច;

និគ្គាហកោ [និគ្ឃាតកោ (?)] សមញ្ញាតោ, តំ ជញ្ញា វសលោ ឥតិ.

១១៩. ‘‘គាមេ វា យទិ វា រញ្ញេ, យំ បរេសំ មមាយិតំ;

ថេយ្យា អទិន្នមាទេតិ [អទិន្នំ អាទិយតិ (សី. បី.)], តំ ជញ្ញា វសលោ ឥតិ.

១២០. ‘‘យោ ហវេ ឥណមាទាយ, ចុជ្ជមានោ [ភុញ្ជមានោ (?)] បលាយតិ;

ន ហិ តេ ឥណមត្ថីតិ, តំ ជញ្ញា វសលោ ឥតិ.

១២១. ‘‘យោ វេ កិញ្ចិក្ខកម្យតា, បន្ថស្មិំ វជន្តំ ជនំ;

ហន្ត្វា កិញ្ចិក្ខមាទេតិ, តំ ជញ្ញា វសលោ ឥតិ.

១២២. ‘‘អត្តហេតុ បរហេតុ, ធនហេតុ ច [ធនហេតុ វ (ក.)] យោ នរោ;

សក្ខិបុដ្ឋោ មុសា ព្រូតិ, តំ ជញ្ញា វសលោ ឥតិ.

១២៣. ‘‘យោ ញាតីនំ សខីនំ វា, ទារេសុ បដិទិស្សតិ;

សាហសា [សហសា (សី. ស្យា.)] សម្បិយេន វា, តំ ជញ្ញា វសលោ ឥតិ.

១២៤. ‘‘យោ មាតរំ បិតរំ វា, ជិណ្ណកំ គតយោព្ពនំ;

បហុ សន្តោ ន ភរតិ, តំ ជញ្ញា វសលោ ឥតិ.

១២៥. ‘‘យោ មាតរំ បិតរំ វា, ភាតរំ ភគិនិំ សសុំ;

ហន្តិ រោសេតិ វាចាយ, តំ ជញ្ញា វសលោ ឥតិ.

១២៦. ‘‘យោ អត្ថំ បុច្ឆិតោ សន្តោ, អនត្ថមនុសាសតិ;

បដិច្ឆន្នេន មន្តេតិ, តំ ជញ្ញា វសលោ ឥតិ.

១២៧. ‘‘យោ កត្វា បាបកំ កម្មំ, មា មំ ជញ្ញាតិ ឥច្ឆតិ [វិភ. ៨៩៤ បស្សិតព្ពំ];

យោ បដិច្ឆន្នកម្មន្តោ, តំ ជញ្ញា វសលោ ឥតិ.

១២៨. ‘‘យោ វេ បរកុលំ គន្ត្វា, ភុត្វាន [សុត្វា ច (ស្យា. ក.)] សុចិភោជនំ;

អាគតំ នប្បដិបូជេតិ, តំ ជញ្ញា វសលោ ឥតិ.

១២៩. ‘‘យោ ព្រាហ្មណំ សមណំ វា, អញ្ញំ វាបិ វនិព្ពកំ;

មុសាវាទេន វញ្ចេតិ, តំ ជញ្ញា វសលោ ឥតិ.

១៣០. ‘‘យោ ព្រាហ្មណំ សមណំ វា, ភត្តកាលេ ឧបដ្ឋិតេ;

រោសេតិ វាចា ន ច ទេតិ, តំ ជញ្ញា វសលោ ឥតិ.

១៣១. ‘‘អសតំ យោធ បព្រូតិ, មោហេន បលិគុណ្ឋិតោ;

កិញ្ចិក្ខំ និជិគីសានោ [និជិគិំសានោ (សី. ស្យា. កំ. បី.)], តំ ជញ្ញា វសលោ ឥតិ.

១៣២. ‘‘យោ ចត្តានំ សមុក្កំសេ, បរេ ច មវជានាតិ [មវជានតិ (សី. ស្យា. បី.)];

និហីនោ សេន មានេន, តំ ជញ្ញា វសលោ ឥតិ.

១៣៣. ‘‘រោសកោ កទរិយោ ច, បាបិច្ឆោ មច្ឆរី សឋោ;

អហិរិកោ អនោត្តប្បី, តំ ជញ្ញា វសលោ ឥតិ.

១៣៤. ‘‘យោ ពុទ្ធំ បរិភាសតិ, អថ វា តស្ស សាវកំ;

បរិព្ពាជំ [បរិព្ពជំ (ក.), បរិព្ពាជកំ (ស្យា. កំ.)] គហដ្ឋំ វា, តំ ជញ្ញា វសលោ ឥតិ.

១៣៥. ‘‘យោ វេ អនរហំ [អនរហា (សី. បី.)] សន្តោ, អរហំ បដិជានាតិ [បដិជានតិ (សី. ស្យា. បី.)];

ចោរោ សព្រហ្មកេ លោកេ, ឯសោ ខោ វសលាធមោ.

១៣៦. ‘‘ឯតេ ខោ វសលា វុត្តា, មយា យេតេ បកាសិតា;

ន ជច្ចា វសលោ ហោតិ, ន ជច្ចា ហោតិ ព្រាហ្មណោ;

កម្មុនា [កម្មនា (សី. បី.)] វសលោ ហោតិ, កម្មុនា ហោតិ ព្រាហ្មណោ.

១៣៧. ‘‘តទមិនាបិ ជានាថ, យថាមេទំ [យថាបេទំ (ក.)] និទស្សនំ;

ចណ្ឌាលបុត្តោ សោបាកោ [សបាកោ (?)], មាតង្គោ ឥតិ វិស្សុតោ.

១៣៨. ‘‘សោ យសំ បរមំ បត្តោ [សោ យសប្បរមប្បត្តោ (ស្យា. ក.)], មាតង្គោ យំ សុទុល្លភំ;

អាគច្ឆុំ តស្សុបដ្ឋានំ, ខត្តិយា ព្រាហ្មណា ពហូ.

១៣៩. ‘‘ទេវយានំ អភិរុយ្ហ, វិរជំ សោ មហាបថំ;

កាមរាគំ វិរាជេត្វា, ព្រហ្មលោកូបគោ អហុ;

ន នំ ជាតិ និវារេសិ, ព្រហ្មលោកូបបត្តិយា.

១៤០. ‘‘អជ្ឈាយកកុលេ ជាតា, ព្រាហ្មណា មន្តពន្ធវា;

តេ ច បាបេសុ កម្មេសុ, អភិណ្ហមុបទិស្សរេ.

១៤១. ‘‘ទិដ្ឋេវ ធម្មេ គារយ្ហា, សម្បរាយេ ច ទុគ្គតិ;

ន នេ ជាតិ និវារេតិ, ទុគ្គត្យា [ទុគ្គច្ចា (សី. ស្យា. កំ. បី.)] គរហាយ វា.

១៤២. ‘‘ន ជច្ចា វសលោ ហោតិ, ន ជច្ចា ហោតិ ព្រាហ្មណោ;

កម្មុនា វសលោ ហោតិ, កម្មុនា ហោតិ ព្រាហ្មណោ’’តិ.

ឯវំ វុត្តេ, អគ្គិកភារទ្វាជោ ព្រាហ្មណោ ភគវន្តំ ឯតទវោច – ‘‘អភិក្កន្តំ, ភោ គោតម…បេ… ឧបាសកំ មំ ភវំ គោតមោ ធារេតុ អជ្ជតគ្គេ បាណុបេតំ សរណំ គត’’ន្តិ.

វសលសុត្តំ សត្តមំ និដ្ឋិតំ.