៦. បរាភវសុត្តំ

ឯវំ មេ សុតំ – ឯកំ សមយំ ភគវា សាវត្ថិយំ វិហរតិ ជេតវនេ អនាថបិណ្ឌិកស្ស អារាមេ. អថ ខោ អញ្ញតរា ទេវតា អភិក្កន្តាយ រត្តិយា អភិក្កន្តវណ្ណា កេវលកប្បំ ជេតវនំ ឱភាសេត្វា យេន ភគវា តេនុបសង្កមិ; ឧបសង្កមិត្វា ភគវន្តំ អភិវាទេត្វា ឯកមន្តំ អដ្ឋាសិ. ឯកមន្តំ ឋិតា ខោ សា ទេវតា ភគវន្តំ គាថាយ អជ្ឈភាសិ –

៩១. ‘‘បរាភវន្តំ បុរិសំ, មយំ បុច្ឆាម គោតម [គោតមំ (សី. ស្យា.)];

ភគវន្តំ [ភវន្តំ (ស្យា. ក.)] បុដ្ឋុមាគម្ម, កិំ បរាភវតោ មុខំ’’.

៩២. ‘‘សុវិជានោ ភវំ ហោតិ, សុវិជានោ [ទុវិជានោ (ស្យា. ក.)] បរាភវោ;

ធម្មកាមោ ភវំ ហោតិ, ធម្មទេស្សី បរាភវោ’’.

៩៣. ‘‘ឥតិ ហេតំ វិជានាម, បឋមោ សោ បរាភវោ;

ទុតិយំ ភគវា ព្រូហិ, កិំ បរាភវតោ មុខំ’’.

៩៤. ‘‘អសន្តស្ស បិយា ហោន្តិ, សន្តេ ន កុរុតេ បិយំ;

អសតំ ធម្មំ រោចេតិ, តំ បរាភវតោ មុខំ’’.

៩៥. ‘‘ឥតិ ហេតំ វិជានាម, ទុតិយោ សោ បរាភវោ;

តតិយំ ភគវា ព្រូហិ, កិំ បរាភវតោ មុខំ’’.

៩៦. ‘‘និទ្ទាសីលី សភាសីលី, អនុដ្ឋាតា ច យោ នរោ;

អលសោ កោធបញ្ញាណោ, តំ បរាភវតោ មុខំ’’.

៩៧. ‘‘ឥតិ ហេតំ វិជានាម, តតិយោ សោ បរាភវោ;

ចតុត្ថំ ភគវា ព្រូហិ, កិំ បរាភវតោ មុខំ’’.

៩៨. ‘‘យោ មាតរំ [យោ មាតរំ វា (សី. ស្យា. កំ. បី.)] បិតរំ វា, ជិណ្ណកំ គតយោព្ពនំ;

បហុ សន្តោ ន ភរតិ, តំ បរាភវតោ មុខំ’’.

៩៩. ‘‘ឥតិ ហេតំ វិជានាម, ចតុត្ថោ សោ បរាភវោ;

បញ្ចមំ ភគវា ព្រូហិ, កិំ បរាភវតោ មុខំ’’.

១០០. ‘‘យោ ព្រាហ្មណំ [យោ ព្រាហ្មណំ វា (សី. ស្យា. កំ. បី.)] សមណំ វា, អញ្ញំ វាបិ វនិព្ពកំ;

មុសាវាទេន វញ្ចេតិ, តំ បរាភវតោ មុខំ’’.

១០១. ‘‘ឥតិ ហេតំ វិជានាម, បញ្ចមោ សោ បរាភវោ;

ឆដ្ឋមំ ភគវា ព្រូហិ, កិំ បរាភវតោ មុខំ’’.

១០២. ‘‘បហូតវិត្តោ បុរិសោ, សហិរញ្ញោ សភោជនោ;

ឯកោ ភុញ្ជតិ សាទូនិ, តំ បរាភវតោ មុខំ’’.

១០៣. ‘‘ឥតិ ហេតំ វិជានាម, ឆដ្ឋមោ សោ បរាភវោ;

សត្តមំ ភគវា ព្រូហិ, កិំ បរាភវតោ មុខំ’’.

១០៤. ‘‘ជាតិត្ថទ្ធោ ធនត្ថទ្ធោ, គោត្តត្ថទ្ធោ ច យោ នរោ;

សញ្ញាតិំ អតិមញ្ញេតិ, តំ បរាភវតោ មុខំ’’.

១០៥. ‘‘ឥតិ ហេតំ វិជានាម, សត្តមោ សោ បរាភវោ;

អដ្ឋមំ ភគវា ព្រូហិ, កិំ បរាភវតោ មុខំ’’.

១០៦. ‘‘ឥត្ថិធុត្តោ សុរាធុត្តោ, អក្ខធុត្តោ ច យោ នរោ;

លទ្ធំ លទ្ធំ វិនាសេតិ, តំ បរាភវតោ មុខំ’’.

១០៧. ‘‘ឥតិ ហេតំ វិជានាម, អដ្ឋមោ សោ បរាភវោ;

នវមំ ភគវា ព្រូហិ, កិំ បរាភវតោ មុខំ’’.

១០៨. ‘‘សេហិ ទារេហិ អសន្តុដ្ឋោ [ទារេហ្យសន្តុដ្ឋោ (ក.)], វេសិយាសុ បទុស្សតិ [បទិស្សតិ (សី.)];

ទុស្សតិ [ទិស្សតិ (សី. បី.)] បរទារេសុ, តំ បរាភវតោ មុខំ’’.

១០៩. ‘‘ឥតិ ហេតំ វិជានាម, នវមោ សោ បរាភវោ;

ទសមំ ភគវា ព្រូហិ, កិំ បរាភវតោ មុខំ’’.

១១០. ‘‘អតីតយោព្ពនោ បោសោ, អានេតិ តិម្ពរុត្ថនិំ;

តស្សា ឥស្សា ន សុបតិ, តំ បរាភវតោ មុខំ’’.

១១១. ‘‘ឥតិ ហេតំ វិជានាម, ទសមោ សោ បរាភវោ;

ឯកាទសមំ ភគវា ព្រូហិ, កិំ បរាភវតោ មុខំ’’.

១១២. ‘‘ឥត្ថិំ សោណ្ឌិំ វិកិរណិំ, បុរិសំ វាបិ តាទិសំ;

ឥស្សរិយស្មិំ ឋបេតិ [ឋាបេតិ (សី. បី.), ថបេតិ (ក.)], តំ បរាភវតោ មុខំ’’.

១១៣. ‘‘ឥតិ ហេតំ វិជានាម, ឯកាទសមោ សោ បរាភវោ;

ទ្វាទសមំ ភគវា ព្រូហិ, កិំ បរាភវតោ មុខំ’’.

១១៤. ‘‘អប្បភោគោ មហាតណ្ហោ, ខត្តិយេ ជាយតេ កុលេ;

សោ ច រជ្ជំ បត្ថយតិ, តំ បរាភវតោ មុខំ’’.

១១៥. ‘‘ឯតេ បរាភវេ លោកេ, បណ្ឌិតោ សមវេក្ខិយ;

អរិយោ ទស្សនសម្បន្នោ, ស លោកំ ភជតេ សិវ’’ន្តិ.

បរាភវសុត្តំ ឆដ្ឋំ និដ្ឋិតំ.