៥. ចុន្ទសុត្តំ

៨៣. ‘‘បុច្ឆាមិ មុនិំ បហូតបញ្ញំ, (ឥតិ ចុន្ទោ កម្មារបុត្តោ)

ពុទ្ធំ ធម្មស្សាមិំ វីតតណ្ហំ;

ទ្វិបទុត្តមំ [ទិបទុត្តមំ (សី. ស្យា. កំ. បី.)] សារថីនំ បវរំ, កតិ លោកេ សមណា តទិង្ឃ ព្រូហិ’’.

៨៤. ‘‘ចតុរោ សមណា ន បញ្ចមត្ថិ, (ចុន្ទាតិ ភគវា)

តេ តេ អាវិករោមិ សក្ខិបុដ្ឋោ;

មគ្គជិនោ មគ្គទេសកោ ច, មគ្គេ ជីវតិ យោ ច មគ្គទូសី’’.

៨៥. ‘‘កំ មគ្គជិនំ វទន្តិ ពុទ្ធា, (ឥតិ ចុន្ទោ កម្មារបុត្តោ)

មគ្គក្ខាយី កថំ អតុល្យោ ហោតិ;

មគ្គេ ជីវតិ មេ ព្រូហិ បុដ្ឋោ, អថ មេ អាវិករោហិ មគ្គទូសិំ’’ [មគ្គទូសី (ក.)].

៨៦. ‘‘យោ តិណ្ណកថំកថោ វិសល្លោ, និព្ពានាភិរតោ អនានុគិទ្ធោ;

លោកស្ស សទេវកស្ស នេតា, តាទិំ មគ្គជិនំ វទន្តិ ពុទ្ធា.

៨៧. ‘‘បរមំ បរមន្តិ យោធ ញត្វា, អក្ខាតិ វិភជតេ ឥធេវ ធម្មំ;

តំ កង្ខឆិទំ មុនិំ អនេជំ, ទុតិយំ ភិក្ខុនមាហុ មគ្គទេសិំ.

៨៨. ‘‘យោ ធម្មបទេ សុទេសិតេ, មគ្គេ ជីវតិ សញ្ញតោ សតីមា;

អនវជ្ជបទានិ សេវមានោ, តតិយំ ភិក្ខុនមាហុ មគ្គជីវិំ.

៨៩. ‘‘ឆទនំ កត្វាន សុព្ពតានំ, បក្ខន្ទី កុលទូសកោ បគព្ភោ;

មាយាវី អសញ្ញតោ បលាបោ, បតិរូបេន ចរំ ស មគ្គទូសី.

៩០. ‘‘ឯតេ ច បដិវិជ្ឈិ យោ គហដ្ឋោ, សុតវា អរិយសាវកោ សបញ្ញោ;

សព្ពេ នេតាទិសាតិ [សព្ពេ នេ តាទិសាតិ (សី. ស្យា. បី.)] ញត្វា, ឥតិ ទិស្វា ន ហាបេតិ តស្ស សទ្ធា;

កថំ ហិ ទុដ្ឋេន អសម្បទុដ្ឋំ, សុទ្ធំ អសុទ្ធេន សមំ ករេយ្យា’’តិ.

ចុន្ទសុត្តំ បញ្ចមំ និដ្ឋិតំ.