៧. មិគលុទ្ទកបេតវត្ថុ

៤៧៨. ‘‘នរនារិបុរក្ខតោ យុវា, រជនីយេហិ កាមគុណេហិ [កាមេហិ (ក.)] សោភសិ;

ទិវសំ អនុភោសិ ការណំ, កិមកាសិ បុរិមាយ ជាតិយា’’តិ.

៤៧៩. ‘‘អហំ រាជគហេ រម្មេ, រមណីយេ គិរិព្ពជេ;

មិគលុទ្ទោ បុរេ អាសិំ, លោហិតបាណិ ទារុណោ.

៤៨០. ‘‘អវិរោធករេសុ បាណិសុ, បុថុសត្តេសុ បទុដ្ឋមានសោ;

វិចរិំ អតិទារុណោ សទា [តទា (សី.)], បរហិំសាយ រតោ អសញ្ញតោ.

៤៨១. ‘‘តស្ស មេ សហាយោ សុហទយោ [សុហទោ (សី.)], សទ្ធោ អាសិ ឧបាសកោ;

សោបិ [សោ ហិ (ស្យា.)] មំ អនុកម្បន្តោ, និវារេសិ បុនប្បុនំ.

៤៨២. ‘‘‘មាកាសិ បាបកំ កម្មំ, មា តាត ទុគ្គតិំ អគា;

សចេ ឥច្ឆសិ បេច្ច សុខំ, វិរម បាណវធា អសំយមា’.

៤៨៣. ‘‘តស្សាហំ វចនំ សុត្វា, សុខកាមស្ស ហិតានុកម្បិនោ;

នាកាសិំ សកលានុសាសនិំ, ចិរបាបាភិរតោ អពុទ្ធិមា.

៤៨៤. ‘‘សោ មំ បុន ភូរិសុមេធសោ, អនុកម្បាយ សំយមេ និវេសយិ;

‘សចេ ទិវា ហនសិ បាណិនោ, អថ តេ រត្តិំ ភវតុ សំយមោ’.

៤៨៥. ‘‘ស្វាហំ ទិវា ហនិត្វា បាណិនោ, វិរតោ រត្តិមហោសិ សញ្ញតោ;

រត្តាហំ បរិចារេមិ, ទិវា ខជ្ជាមិ ទុគ្គតោ.

៤៨៦. ‘‘តស្ស កម្មស្ស កុសលស្ស, អនុភោមិ រត្តិំ អមានុសិំ;

ទិវា បដិហតាវ [បដិហតា ច (ក.)] កុក្កុរា, ឧបធាវន្តិ សមន្តា ខាទិតុំ.

៤៨៧. ‘‘យេ ច តេ សតតានុយោគិនោ, ធុវំ បយុត្តា សុគតស្ស សាសនេ;

មញ្ញាមិ តេ អមតមេវ កេវលំ, អធិគច្ឆន្តិ បទំ អសង្ខត’’ន្តិ.

មិគលុទ្ទកបេតវត្ថុ សត្តមំ.