៨. ទុតិយមិគលុទ្ទកបេតវត្ថុ

៤៨៨. ‘‘កូដាគារេ ច បាសាទេ, បល្លង្កេ គោនកត្ថតេ;

បញ្ចង្គិកេន តុរិយេន, រមសិ សុប្បវាទិតេ.

៤៨៩. ‘‘តតោ រត្យា វិវសានេ [វ្យវសានេ (សី.)], សូរិយុគ្គមនំ បតិ;

អបវិទ្ធោ សុសានស្មិំ, ពហុទុក្ខំ និគច្ឆសិ.

៤៩០. ‘‘កិំ នុ កាយេន វាចាយ, មនសា ទុក្កដំ កតំ;

កិស្ស កម្មវិបាកេន, ឥទំ ទុក្ខំ និគច្ឆសិ’’.

៤៩១. ‘‘អហំ រាជគហេ រម្មេ, រមណីយេ គិរិព្ពជេ;

មិគលុទ្ទោ បុរេ អាសិំ, លុទ្ទោ ចាសិមសញ្ញតោ.

៤៩២. ‘‘តស្ស មេ សហាយោ សុហទយោ, សទ្ធោ អាសិ ឧបាសកោ;

តស្ស កុលុបកោ ភិក្ខុ, អាសិ គោតមសាវកោ;

សោបិ មំ អនុកម្បន្តោ, និវារេសិ បុនប្បុនំ.

៤៩៣. ‘‘‘មាកាសិ បាបកំ កម្មំ, មា តាត ទុគ្គតិំ អគា;

សចេ ឥច្ឆសិ បេច្ច សុខំ, វិរម បាណវធា អសំយមា’.

៤៩៤. ‘‘តស្សាហំ វចនំ សុត្វា, សុខកាមស្ស ហិតានុកម្បិនោ;

នាកាសិំ សកលានុសាសនិំ, ចិរបាបាភិរតោ អពុទ្ធិមា.

៤៩៥. ‘‘សោ មំ បុន ភូរិសុមេធសោ, អនុកម្បាយ សំយមេ និវេសយិ;

‘សចេ ទិវា ហនសិ បាណិនោ, អថ តេ រត្តិំ ភវតុ សំយមោ’.

៤៩៦. ‘‘ស្វាហំ ទិវា ហនិត្វា បាណិនោ, វិរតោ រត្តិមហោសិ សញ្ញតោ;

រត្តាហំ បរិចារេមិ, ទិវា ខជ្ជាមិ ទុគ្គតោ.

៤៩៧. ‘‘តស្ស កម្មស្ស កុសលស្ស, អនុភោមិ រត្តិំ អមានុសិំ;

ទិវា បដិហតាវ កុក្កុរា, ឧបធាវន្តិ សមន្តា ខាទិតុំ.

៤៩៨. ‘‘យេ ច តេ សតតានុយោគិនោ, ធុវំ បយុត្តា [ធុវយុត្តា (សី.)] សុគតស្ស សាសនេ;

មញ្ញាមិ តេ អមតមេវ កេវលំ, អធិគច្ឆន្តិ បទំ អសង្ខត’’ន្តិ.

ទុតិយមិគលុទ្ទកបេតវត្ថុ អដ្ឋមំ.