៦. សេរិណីបេតវត្ថុ

៤៦៤. ‘‘នគ្គា ទុព្ពណ្ណរូបាសិ, កិសា ធមនិសន្ថតា;

ឧប្ផាសុលិកេ កិសិកេ, កា នុ ត្វំ ឥធ តិដ្ឋសី’’តិ.

៤៦៥. ‘‘អហំ ភទន្តេ បេតីម្ហិ, ទុគ្គតា យមលោកិកា;

បាបកម្មំ ករិត្វាន, បេតលោកំ ឥតោ គតា’’តិ.

៤៦៦. ‘‘កិំ នុ កាយេន វាចាយ, មនសា កុក្កដំ កតំ;

កិស្ស កម្មវិបាកេន, បេតលោកំ ឥតោ គតា’’តិ.

៤៦៧. ‘‘អនាវដេសុ តិត្ថេសុ, វិចិនិំ អឌ្ឍមាសកំ;

សន្តេសុ ទេយ្យធម្មេសុ, ទីបំ នាកាសិមត្តនោ.

៤៦៨. ‘‘នទិំ ឧបេមិ តសិតា, រិត្តកា បរិវត្តតិ;

ឆាយំ ឧបេមិ ឧណ្ហេសុ, អាតបោ បរិវត្តតិ.

៤៦៩. ‘‘អគ្គិវណ្ណោ ច មេ វាតោ, ឌហន្តោ ឧបវាយតិ;

ឯតញ្ច ភន្តេ អរហាមិ, អញ្ញញ្ច បាបកំ តតោ.

៤៧០. ‘‘គន្ត្វាន ហត្ថិនិំ បុរំ, វជ្ជេសិ មយ្ហ មាតរំ;

‘ធីតា ច តេ មយា ទិដ្ឋា, ទុគ្គតា យមលោកិកា;

បាបកម្មំ ករិត្វាន, បេតលោកំ ឥតោ គតា’.

៤៧១. ‘‘អត្ថិ មេ ឯត្ថ និក្ខិត្តំ, អនក្ខាតញ្ច តំ មយា;

ចត្តារិសតសហស្សានិ, បល្លង្កស្ស ច ហេដ្ឋតោ.

៤៧២. ‘‘តតោ មេ ទានំ ទទតុ, តស្សា ច ហោតុ ជីវិកា;

ទានំ ទត្វា ច មេ មាតា, ទក្ខិណំ អនុទិច្ឆតុ [អនុទិស្សតុ (សី. បី.), អន្វាទិស្សតុ (ស្យា.)];

តទាហំ សុខិតា ហេស្សំ, សព្ពកាមសមិទ្ធិនី’’តិ.

៤៧៣. ‘‘សាធូ’’តិ សោ បដិស្សុត្វា, គន្ត្វាន ហត្ថិនិំ បុរំ;

អវោច តស្សា មាតរំ –

‘ធីតា ច តេ មយា ទិដ្ឋា, ទុគ្គតា យមលោកិកា;

បាបកម្មំ ករិត្វាន, បេតលោកំ ឥតោ គតា’.

៤៧៤. ‘‘សា មំ តត្ថ សមាទបេសិ, ( ) [(គន្ត្វាន ហត្ថិនិំ បុរំ) (ស្យា. ក.)] វជ្ជេសិ មយ្ហ មាតរំ;

‘ធីតា ច តេ មយា ទិដ្ឋា, ទុគ្គតា យមលោកិកា;

បាបកម្មំ ករិត្វាន, បេតលោកំ ឥតោ គតា’.

៤៧៥. ‘‘អត្ថិ ច មេ ឯត្ថ និក្ខិត្តំ, អនក្ខាតញ្ច តំ មយា;

ចត្តារិសតសហស្សានិ, បល្លង្កស្ស ច ហេដ្ឋតោ.

៤៧៦. ‘‘តតោ មេ ទានំ ទទតុ, តស្សា ច ហោតុ ជីវិកា;

ទានំ ទត្វា ច មេ មាតា, ទក្ខិណំ អនុទិច្ឆតុ ( ) [(តតោ តុវំ ទានំ ទេហិ, តស្សា ទក្ខិណមាទិសី) (ក.)];

‘តទា សា សុខិតា ហេស្សំ, សព្ពកាមសមិទ្ធិនី’’’តិ.

៤៧៧. តតោ ហិ សា ទានមទា, តស្សា ទក្ខិណមាទិសី;

បេតី ច សុខិតា អាសិ, តស្សា ចាសិ សុជីវិកាតិ.

សេរិណីបេតវត្ថុ ឆដ្ឋំ.