៥. កុមារបេតវត្ថុ

៤៥៣. អច្ឆេររូបំ សុគតស្ស ញាណំ, សត្ថា យថា បុគ្គលំ ព្យាកាសិ;

ឧស្សន្នបុញ្ញាបិ ភវន្តិ ហេកេ, បរិត្តបុញ្ញាបិ ភវន្តិ ហេកេ.

៤៥៤. អយំ កុមារោ សីវថិកាយ ឆឌ្ឌិតោ, អង្គុដ្ឋស្នេហេន យាបេតិ រត្តិំ;

ន យក្ខភូតា ន សរីសបា [សិរិំសបា (សី. ស្យា. បី.)] វា, វិហេឋយេយ្យុំ កតបុញ្ញំ កុមារំ.

៤៥៥. សុនខាបិមស្ស បលិហិំសុ បាទេ, ធង្កា សិង្គាលា [សិគាលា (សី. ស្យា. បី.)] បរិវត្តយន្តិ;

គព្ភាសយំ បក្ខិគណា ហរន្តិ, កាកា បន អក្ខិមលំ ហរន្តិ.

៤៥៦. នយិមស្ស [ន ឥមស្ស (ស្យា.), និមស្ស (ក.)] រក្ខំ វិទហិំសុ កេចិ, ន ឱសធំ សាសបធូបនំ វា;

នក្ខត្តយោគម្បិ ន អគ្គហេសុំ [ន ឧគ្គហេសុំ (ក.)], ន សព្ពធញ្ញានិបិ អាកិរិំសុ.

៤៥៧. ឯតាទិសំ ឧត្តមកិច្ឆបត្តំ, រត្តាភតំ សីវថិកាយ ឆឌ្ឌិតំ;

នោនីតបិណ្ឌំវ បវេធមានំ, សសំសយំ ជីវិតសាវសេសំ.

៤៥៨. តមទ្ទសា ទេវមនុស្សបូជិតោ, ទិស្វា ច តំ ព្យាករិ ភូរិបញ្ញោ;

‘‘អយំ កុមារោ នគរស្សិមស្ស, អគ្គកុលិកោ ភវិស្សតិ ភោគតោ ច’’ [ភោគវា ច (ស្យា. ក.)].

៤៥៩. ‘‘កិស្ស [កិំ’ស (?)] វតំ កិំ បន ព្រហ្មចរិយំ, កិស្ស សុចិណ្ណស្ស អយំ វិបាកោ;

ឯតាទិសំ ព្យសនំ បាបុណិត្វា, តំ តាទិសំ បច្ចនុភោស្សតិទ្ធិ’’ន្តិ.

៤៦០. ពុទ្ធបមុខស្ស ភិក្ខុសង្ឃស្ស, បូជំ អកាសិ ជនតា ឧឡារំ;

តត្រស្ស ចិត្តស្សហុ អញ្ញថត្តំ, វាចំ អភាសិ ផរុសំ អសព្ភំ.

៤៦១. សោ តំ វិតក្កំ បវិនោទយិត្វា, បីតិំ បសាទំ បដិលទ្ធា បច្ឆា;

តថាគតំ ជេតវនេ វសន្តំ, យាគុយា ឧបដ្ឋាសិ សត្តរត្តំ.

៤៦២. តស្ស [តំ’ស (?)] វតំ តំ បន ព្រហ្មចរិយំ, តស្ស សុចិណ្ណស្ស អយំ វិបាកោ;

ឯតាទិសំ ព្យសនំ បាបុណិត្វា, តំ តាទិសំ បច្ចនុភោស្សតិទ្ធិំ.

៤៦៣. ឋត្វាន សោ វស្សសតំ ឥធេវ, សព្ពេហិ កាមេហិ សមង្គិភូតោ;

កាយស្ស ភេទា អភិសម្បរាយំ, សហព្យតំ គច្ឆតិ វាសវស្សាតិ.

កុមារបេតវត្ថុ បញ្ចមំ.