៤. ភុសបេតវត្ថុ

៤៤៧. ‘‘ភុសានិ ឯកោ សាលិំ បុនាបរោ, អយញ្ច នារី សកមំសលោហិតំ;

តុវញ្ច គូថំ អសុចិំ អកន្តំ [អកន្តិកំ (សី. បី.)], បរិភុញ្ជសិ កិស្ស អយំ វិបាកោ’’តិ.

៤៤៨. ‘‘អយំ បុរេ មាតរំ ហិំសតិ, អយំ បន កូដវាណិជោ;

អយំ មំសានិ ខាទិត្វា, មុសាវាទេន វញ្ចេតិ.

៤៤៩. ‘‘អហំ មនុស្សេសុ មនុស្សភូតា, អគារិនី សព្ពកុលស្ស ឥស្សរា;

សន្តេសុ បរិគុហាមិ, មា ច កិញ្ចិ ឥតោ អទំ.

៤៥០. ‘‘មុសាវាទេន ឆាទេមិ, ‘នត្ថិ ឯតំ មម គេហេ;

សចេ សន្តំ និគុហាមិ, គូថោ មេ ហោតុ ភោជនំ’.

៤៥១. ‘‘តស្ស កម្មស្ស វិបាកេន, មុសាវាទស្ស ចូភយំ;

សុគន្ធំ សាលិនោ ភត្តំ, គូថំ មេ បរិវត្តតិ.

៤៥២. ‘‘អវញ្ឈានិ ច កម្មានិ, ន ហិ កម្មំ វិនស្សតិ;

ទុគ្គន្ធំ កិមិនំ [កិមិជំ (សី.)] មីឡំ, ភុញ្ជាមិ ច បិវាមិ ចា’’តិ.

ភុសបេតវត្ថុ ចតុត្ថំ.