៣. រថការបេតិវត្ថុ

៤៣៩. ‘‘វេឡុរិយថម្ភំ រុចិរំ បភស្សរំ, វិមានមារុយ្ហ អនេកចិត្តំ;

តត្ថច្ឆសិ ទេវិ មហានុភាវេ, បថទ្ធនិ [សមន្តតោ (ក.)] បន្នរសេវ ចន្ទោ.

៤៤០. ‘‘វណ្ណោ ច តេ កនកស្ស សន្និភោ, ឧត្តត្តរូបោ ភុស ទស្សនេយ្យោ;

បល្លង្កសេដ្ឋេ អតុលេ និសិន្នា, ឯកា តុវំ នត្ថិ ច តុយ្ហ សាមិកោ.

៤៤១. ‘‘ឥមា ច តេ បោក្ខរណី សមន្តា, បហូតមល្យា [បហូតមាលា (សី. ស្យា.)] ពហុបុណ្ឌរីកា;

សុវណ្ណចុណ្ណេហិ សមន្តមោត្ថតា, ន តត្ថ បង្កោ បណកោ ច វិជ្ជតិ.

៤៤២. ‘‘ហំសា ចិមេ ទស្សនីយា មនោរមា, ឧទកស្មិមនុបរិយន្តិ សព្ពទា;

សមយ្យ វគ្គូបនទន្តិ សព្ពេ, ពិន្ទុស្សរា ទុន្ទុភីនំវ ឃោសោ.

៤៤៣. ‘‘ទទ្ទល្លមានា យសសា យសស្សិនី, នាវាយ ច ត្វំ អវលម្ព តិដ្ឋសិ;

អាឡារបម្ហេ ហសិតេ បិយំវទេ, សព្ពង្គកល្យាណិ ភុសំ វិរោចសិ.

៤៤៤. ‘‘ឥទំ វិមានំ វិរជំ សមេ ឋិតំ, ឧយ្យានវន្តំ [ឧយ្យានវនំ (ក.)] រតិនន្ទិវឌ្ឍនំ;

ឥច្ឆាមហំ នារិ អនោមទស្សនេ, តយា សហ នន្ទនេ ឥធ មោទិតុ’’ន្តិ.

៤៤៥. ‘‘ករោហិ កម្មំ ឥធ វេទនីយំ, ចិត្តញ្ច តេ ឥធ និហិតំ ភវតុ [នតញ្ច ហោតុ (ក.), និតញ្ច ហោតុ (ស្យា.)];

កត្វាន កម្មំ ឥធ វេទនីយំ, ឯវំ មមំ លច្ឆសិ កាមកាមិនិ’’ន្តិ.

៤៤៦. ‘‘សាធូ’’តិ សោ តស្សា បដិស្សុណិត្វា, អកាសិ កម្មំ តហិំ វេទនីយំ;

កត្វាន កម្មំ តហិំ វេទនីយំ, ឧបបជ្ជិ សោ មាណវោ តស្សា សហព្យតន្តិ.

រថការបេតិវត្ថុ តតិយំ.

ភាណវារំ ទុតិយំ និដ្ឋិតំ.