៨. ចូឡសេដ្ឋិបេតវត្ថុ

២៤៦. ‘‘នគ្គោ កិសោ បព្ពជិតោសិ ភន្តេ, រត្តិំ កុហិំ គច្ឆសិ កិស្ស ហេតុ;

អាចិក្ខ មេ តំ អបិ សក្កុណេមុ, សព្ពេន វិត្តំ បដិបាទយេ តុវ’’ន្តិ.

២៤៧. ‘‘ពារាណសី នគរំ ទូរឃុដ្ឋំ, តត្ថាហំ គហបតិ អឌ្ឍកោ អហុ ទីនោ;

អទាតា គេធិតមនោ អាមិសស្មិំ, ទុស្សីល្យេន យមវិសយម្ហិ បត្តោ.

២៤៨. ‘‘សោ សូចិកាយ កិលមិតោ តេហិ,

តេនេវ ញាតីសុ យាមិ អាមិសកិញ្ចិក្ខហេតុ;

អទានសីលា ន ច សទ្ទហន្តិ,

ទានផលំ ហោតិ បរម្ហិ លោកេ.

២៤៩. ‘‘ធីតា ច មយ្ហំ លបតេ អភិក្ខណំ, ‘ទស្សាមិ ទានំ បិតូនំ បិតាមហានំ’;

តមុបក្ខដំ បរិវិសយន្តិ ព្រាហ្មណា [ព្រាហ្មណេ (សី.)], ‘យាមិ អហំ អន្ធកវិន្ទំ ភោត្តុ’’’ន្តិ.

២៥០. តមវោច រាជា ‘‘អនុភវិយាន តម្បិ,

ឯយ្យាសិ ខិប្បំ អហមបិ កស្សំ បូជំ;

អាចិក្ខ មេ តំ យទិ អត្ថិ ហេតុ,

សទ្ធាយិតំ ហេតុវចោ សុណោមា’’តិ.

២៥១. ‘តថា’តិ វត្វា អគមាសិ តត្ថ, ភុញ្ជិំសុ ភត្តំ ន ច ទក្ខិណារហា;

បច្ចាគមិ រាជគហំ បុនាបរំ, បាតុរហោសិ បុរតោ ជនាធិបស្ស.

២៥២. ទិស្វាន បេតំ បុនទេវ អាគតំ, រាជា អវោច ‘‘អហមបិ កិំ ទទាមិ;

អាចិក្ខ មេ តំ យទិ អត្ថិ ហេតុ, យេន តុវំ ចិរតរំ បីណិតោ សិយា’’តិ.

២៥៣. ‘‘ពុទ្ធញ្ច សង្ឃំ បរិវិសិយាន រាជ, អន្នេន បានេន ច ចីវរេន;

តំ ទក្ខិណំ អាទិស មេ ហិតាយ, ឯវំ អហំ ចិរតរំ បីណិតោ សិយា’’តិ.

២៥៤. តតោ ច រាជា និបតិត្វា តាវទេ [តាវទេវ (ស្យា.), តទេវ (ក.)], ទានំ សហត្ថា អតុលំ ទទិត្វា [អតុលញ្ច ទត្វា (ស្យា. ក.)] សង្ឃេ;

អារោចេសិ បកតំ [អារោចយី បកតិំ (សី. ស្យា.)] តថាគតស្ស, តស្ស ច បេតស្ស ទក្ខិណំ អាទិសិត្ថ.

២៥៥. សោ បូជិតោ អតិវិយ សោភមានោ, បាតុរហោសិ បុរតោ ជនាធិបស្ស;

‘‘យក្ខោហមស្មិ បរមិទ្ធិបត្តោ, ន មយ្ហមត្ថិ សមា សទិសា [មយ្ហមិទ្ធិសមសទិសា (សី. ស្យា.)] មានុសា.

២៥៦. ‘‘បស្សានុភាវំ អបរិមិតំ មមយិទំ, តយានុទិដ្ឋំ អតុលំ ទត្វា សង្ឃេ;

សន្តប្បិតោ សតតំ សទា ពហូហិ, យាមិ អហំ សុខិតោ មនុស្សទេវា’’តិ.

ចូឡសេដ្ឋិបេតវត្ថុ អដ្ឋមំ និដ្ឋិតំ.

ភាណវារំ បឋមំ និដ្ឋិតំ.