៧. ធនបាលសេដ្ឋិបេតវត្ថុ

២២៧. ‘‘នគ្គោ ទុព្ពណ្ណរូបោសិ, កិសោ ធមនិសន្ថតោ;

ឧប្ផាសុលិកោ កិសិកោ, កោ នុ ត្វមសិ មារិស’’.

២២៨. ‘‘អហំ ភទន្តេ បេតោម្ហិ, ទុគ្គតោ យមលោកិកោ;

បាបកម្មំ ករិត្វាន, បេតលោកំ ឥតោ គតោ’’.

២២៩. ‘‘កិំ នុ កាយេន វាចាយ, មនសា ទុក្កដំ កតំ;

កិស្ស កម្មវិបាកេន, បេតលោកំ ឥតោ គតោ’’.

២៣០. ‘‘នគរំ អត្ថិ បណ្ណានំ [ទសន្នានំ (សី. ស្យា. បី.)], ឯរកច្ឆន្តិ វិស្សុតំ;

តត្ថ សេដ្ឋិ បុរេ អាសិំ, ធនបាលោតិ មំ វិទូ.

២៣១. ‘‘អសីតិ សកដវាហានំ, ហិរញ្ញស្ស អហោសិ មេ;

បហូតំ មេ ជាតរូបំ, មុត្តា វេឡុរិយា ពហូ.

២៣២. ‘‘តាវ មហទ្ធនស្សាបិ, ន មេ ទាតុំ បិយំ អហុ;

បិទហិត្វា ទ្វារំ ភុញ្ជិំ [ភុញ្ជាមិ (សី. ស្យា.)], មា មំ យាចនកាទ្ទសុំ.

២៣៣. ‘‘អស្សទ្ធោ មច្ឆរី ចាសិំ, កទរិយោ បរិភាសកោ;

ទទន្តានំ ករោន្តានំ, វារយិស្សំ ពហុ ជនេ [ពហុជ្ជនំ (សី. ស្យា.)].

២៣៤. ‘‘វិបាកោ នត្ថិ ទានស្ស, សំយមស្ស កុតោ ផលំ;

បោក្ខរញ្ញោទបានានិ, អារាមានិ ច រោបិតេ;

បបាយោ ច វិនាសេសិំ, ទុគ្គេ សង្កមនានិ ច.

២៣៥. ‘‘ស្វាហំ អកតកល្យាណោ, កតបាបោ តតោ ចុតោ;

ឧបបន្នោ បេត្តិវិសយំ, ខុប្បិបាសសមប្បិតោ.

២៣៦. ‘‘បញ្ចបណ្ណាសវស្សានិ, យតោ កាលង្កតោ អហំ;

នាភិជានាមិ ភុត្តំ វា, បីតំ វា បន បានិយំ.

២៣៧. ‘‘យោ សំយមោ សោ វិនាសោ,យោ វិនាសោ សោ សំយមោ;

បេតា ហិ កិរ ជានន្តិ, យោ សំយមោ សោ វិនាសោ.

២៣៨. ‘‘អហំ បុរេ សំយមិស្សំ, នាទាសិំ ពហុកេ ធនេ;

សន្តេសុ ទេយ្យធម្មេសុ, ទីបំ នាកាសិមត្តនោ;

ស្វាហំ បច្ឆានុតប្បាមិ, អត្តកម្មផលូបគោ.

២៣៩. [បេ. វ. ៦៩] ‘‘ឧទ្ធំ ចតូហិ មាសេហិ, កាលំកិរិយា ភវិស្សតិ;

ឯកន្តកដុកំ ឃោរំ, និរយំ បបតិស្សហំ.

២៤០. [បេ. វ. ៧០] ‘‘ចតុក្កណ្ណំ ចតុទ្វារំ, វិភត្តំ ភាគសោ មិតំ;

អយោបាការបរិយន្តំ, អយសា បដិកុជ្ជិតំ.

២៤១. [បេ. វ. ៧១] ‘‘តស្ស អយោមយា ភូមិ, ជលិតា តេជសា យុតា;

សមន្តា យោជនសតំ, ផរិត្វា តិដ្ឋតិ សព្ពទា.

២៤២. [បេ. វ. ៧២] ‘‘តត្ថាហំ ទីឃមទ្ធានំ, ទុក្ខំ វេទិស្ស វេទនំ;

ផលំ បាបស្ស កម្មស្ស, តស្មា សោចាមហំ ភុសំ.

២៤៣. ‘‘តំ វោ វទាមិ ភទ្ទំ វោ, យាវន្តេត្ថ សមាគតា;

មាកត្ថ បាបកំ កម្មំ, អាវិ វា យទិ វា រហោ.

២៤៤. ‘‘សចេ តំ បាបកំ កម្មំ, ករិស្សថ ករោថ វា;

ន វោ ទុក្ខា បមុត្យត្ថិ [បមុត្តត្ថិ (សព្ពត្ថ) ឧទា. ៤៤ បស្សិតព្ពំ], ឧប្បច្ចាបិ [ឧបេច្ចាបិ (ស្យា. ក.)] បលាយតំ.

២៤៥. ‘‘មត្តេយ្យា ហោថ បេត្តេយ្យា, កុលេ ជេដ្ឋាបចាយិកា;

សាមញ្ញា ហោថ ព្រហ្មញ្ញា, ឯវំ សគ្គំ គមិស្សថា’’តិ.

ធនបាលសេដ្ឋិបេតវត្ថុ សត្តមំ.