៦. កណ្ហបេតវត្ថុ

២០៧. ‘‘ឧដ្ឋេហិ កណ្ហ កិំ សេសិ, កោ អត្ថោ សុបនេន តេ;

យោ ច តុយ្ហំ សកោ ភាតា, ហទយំ ចក្ខុ ច [ចក្ខុំវ (អដ្ឋ.)] ទក្ខិណំ;

តស្ស វាតា ពលីយន្តិ, សសំ ជប្បតិ [ឃដោ ជប្បតិ (ក.)] កេសវា’’តិ.

២០៨. ‘‘តស្ស តំ វចនំ សុត្វា, រោហិណេយ្យស្ស កេសវោ;

តរមានរូបោ វុដ្ឋាសិ, ភាតុសោកេន អដ្ដិតោ.

២០៩. ‘‘កិំ នុ ឧម្មត្តរូបោវ, កេវលំ ទ្វារកំ ឥមំ;

សសោ សសោតិ លបសិ, កីទិសំ សសមិច្ឆសិ.

២១០. ‘‘សោវណ្ណមយំ មណិមយំ, លោហមយំ អថ រូបិយមយំ;

សង្ខសិលាបវាឡមយំ, ការយិស្សាមិ តេ សសំ.

២១១. ‘‘សន្តិ អញ្ញេបិ សសកា, អរញ្ញវនគោចរា;

តេបិ តេ អានយិស្សាមិ, កីទិសំ សសមិច្ឆសី’’តិ.

២១២. ‘‘នាហមេតេ សសេ ឥច្ឆេ, យេ សសា បថវិស្សិតា;

ចន្ទតោ សសមិច្ឆាមិ, តំ មេ ឱហរ កេសវា’’តិ.

២១៣. ‘‘សោ នូន មធុរំ ញាតិ, ជីវិតំ វិជហិស្សសិ;

អបត្ថិយំ បត្ថយសិ, ចន្ទតោ សសមិច្ឆសី’’តិ.

២១៤. ‘‘ឯវំ ចេ កណ្ហ ជានាសិ, យថញ្ញមនុសាសសិ;

កស្មា បុរេ មតំ បុត្តំ, អជ្ជាបិ មនុសោចសិ.

២១៥. ‘‘ន យំ លព្ភា មនុស្សេន, អមនុស្សេន វា បន;

ជាតោ មេ មា មរិ បុត្តោ, កុតោ លព្ភា អលព្ភិយំ.

២១៦. ‘‘ន មន្តា មូលភេសជ្ជា, ឱសធេហិ ធនេន វា;

សក្កា អានយិតុំ កណ្ហ, យំ បេតមនុសោចសិ.

២១៧. ‘‘មហទ្ធនា មហាភោគា, រដ្ឋវន្តោបិ ខត្តិយា;

បហូតធនធញ្ញាសេ, តេបិ នោ [នត្ថេត្ថបាឋភេទោ] អជរាមរា.

២១៨. ‘‘ខត្តិយា ព្រាហ្មណា វេស្សា, សុទ្ទា ចណ្ឌាលបុក្កុសា;

ឯតេ ចញ្ញេ ច ជាតិយា, តេបិ នោ អជរាមរា.

២១៩. ‘‘យេ មន្តំ បរិវត្តេន្តិ, ឆឡង្គំ ព្រហ្មចិន្តិតំ;

ឯតេ ចញ្ញេ ច វិជ្ជាយ, តេបិ នោ អជរាមរា.

២២០. ‘‘ឥសយោ វាបិ [ឥសយោ ចាបិ (វិមានវត្ថុ ៩៩)] យេ សន្តា, សញ្ញតត្តា តបស្សិនោ;

សរីរំ តេបិ កាលេន, វិជហន្តិ តបស្សិនោ.

២២១. ‘‘ភាវិតត្តា អរហន្តោ, កតកិច្ចា អនាសវា;

និក្ខិបន្តិ ឥមំ ទេហំ, បុញ្ញបាបបរិក្ខយា’’តិ.

២២២. ‘‘អាទិត្តំ វត មំ សន្តំ, ឃតសិត្តំវ បាវកំ;

វារិនា វិយ ឱសិញ្ចំ, សព្ពំ និព្ពាបយេ ទរំ.

២២៣. ‘‘អព្ពហី វត មេ សល្លំ, សោកំ ហទយនិស្សិតំ;

យោ មេ សោកបរេតស្ស, បុត្តសោកំ អបានុទិ.

២២៤. ‘‘ស្វាហំ អព្ពូឡ្ហសល្លោស្មិ, សីតិភូតោស្មិ និព្ពុតោ;

ន សោចាមិ ន រោទាមិ, តវ សុត្វាន ភាតិក’’ [ភាសិតំ (ស្យា.)].

២២៥. ឯវំ ករោន្តិ សប្បញ្ញា, យេ ហោន្តិ អនុកម្បកា;

និវត្តយន្តិ សោកម្ហា, ឃដោ ជេដ្ឋំវ ភាតរំ.

២២៦. យស្ស ឯតាទិសា ហោន្តិ, អមច្ចា បរិចារកា;

សុភាសិតេន អន្វេន្តិ, ឃដោ ជេដ្ឋំវ ភាតរន្តិ.

កណ្ហបេតវត្ថុ ឆដ្ឋំ.