១៣. ឧព្ពរិបេតវត្ថុ

៣៦៨. អហុ រាជា ព្រហ្មទត្តោ, បញ្ចាលានំ រថេសភោ;

អហោរត្តានមច្ចយា, រាជា កាលមក្រុព្ពថ [រាជា កាលង្ករី តទា (សី.)].

៣៦៩. តស្ស អាឡាហនំ គន្ត្វា, ភរិយា កន្ទតិ ឧព្ពរី [ឧប្បរិ (ក.)];

ព្រហ្មទត្តំ អបស្សន្តី, ព្រហ្មទត្តាតិ កន្ទតិ.

៣៧០. ឥសិ ច តត្ថ អាគច្ឆិ, សម្បន្នចរណោ មុនិ;

សោ ច តត្ថ អបុច្ឆិត្ថ, យេ តត្ថ សុសមាគតា.

៣៧១. ‘‘កស្ស ឥទំ អាឡាហនំ, នានាគន្ធសមេរិតំ;

កស្សាយំ កន្ទតិ ភរិយា, ឥតោ ទូរគតំ បតិំ;

ព្រហ្មទត្តំ អបស្សន្តី, ‘ព្រហ្មទត្តា’តិ កន្ទតិ’’.

៣៧២. តេ ច តត្ថ វិយាកំសុ, យេ តត្ថ សុសមាគតា;

‘‘ព្រហ្មទត្តស្ស ភទន្តេ [ភទ្ទន្តេ (ក.)], ព្រហ្មទត្តស្ស មារិស.

៣៧៣. ‘‘តស្ស ឥទំ អាឡាហនំ, នានាគន្ធសមេរិតំ;

តស្សាយំ កន្ទតិ ភរិយា, ឥតោ ទូរគតំ បតិំ;

ព្រហ្មទត្តំ អបស្សន្តី, ‘ព្រហ្មទត្តា’តិ កន្ទតិ’’.

៣៧៤. ‘‘ឆឡាសីតិសហស្សានិ, ព្រហ្មទត្តស្សនាមកា;

ឥមស្មិំ អាឡាហនេ ទឌ្ឍា, តេសំ កមនុសោចសី’’តិ.

៣៧៥. ‘‘យោ រាជា ចូឡនីបុត្តោ, បញ្ចាលានំ រថេសភោ;

តំ ភន្តេ អនុសោចាមិ, ភត្តារំ សព្ពកាមទ’’ន្តិ.

៣៧៦. ‘‘សព្ពេ វាហេសុំ រាជានោ, ព្រហ្មទត្តស្សនាមកា;

សព្ពេវចូឡនីបុត្តា, បញ្ចាលានំ រថេសភា.

៣៧៧. ‘‘សព្ពេសំ អនុបុព្ពេន, មហេសិត្តមការយិ;

កស្មា បុរិមកេ ហិត្វា, បច្ឆិមំ អនុសោចសី’’តិ.

៣៧៨. ‘‘អាតុមេ ឥត្ថិភូតាយ, ទីឃរត្តាយ មារិស;

យស្សា មេ ឥត្ថិភូតាយ, សំសារេ ពហុភាសសី’’តិ.

៣៧៩. ‘‘អហុ ឥត្ថី អហុ បុរិសោ, បសុយោនិម្បិ អាគមា;

ឯវមេតំ អតីតានំ, បរិយន្តោ ន ទិស្សតី’’តិ.

៣៨០. ‘‘អាទិត្តំ វត មំ សន្តំ, ឃតសិត្តំវ បាវកំ;

វារិនា វិយ ឱសិញ្ចំ, សព្ពំ និព្ពាបយេ ទរំ.

៣៨១. ‘‘អព្ពហី វត មេ សល្លំ, សោកំ ហទយនិស្សិតំ;

យោ មេ សោកបរេតាយ, បតិសោកំ អបានុទិ.

៣៨២. ‘‘សាហំ អព្ពូឡ្ហសល្លាស្មិ, សីតិភូតាស្មិ និព្ពុតា;

ន សោចាមិ ន រោទាមិ, តវ សុត្វា មហាមុនី’’តិ.

៣៨៣. តស្ស តំ វចនំ សុត្វា, សមណស្ស សុភាសិតំ;

បត្តចីវរមាទាយ, បព្ពជិ អនគារិយំ.

៣៨៤. សា ច បព្ពជិតា សន្តា, អគារស្មា អនគារិយំ;

មេត្តាចិត្តំ អភាវេសិ, ព្រហ្មលោកូបបត្តិយា.

៣៨៥. គាមា គាមំ វិចរន្តី, និគមេ រាជធានិយោ;

ឧរុវេលា នាម សោ គាមោ, យត្ថ កាលមក្រុព្ពថ.

៣៨៦. មេត្តាចិត្តំ អាភាវេត្វា, ព្រហ្មលោកូបបត្តិយា;

ឥត្ថិចិត្តំ វិរាជេត្វា, ព្រហ្មលោកូបគា អហូតិ.

ឧព្ពរិបេតវត្ថុ តេរសមំ.

ឧព្ពរិវគ្គោ ទុតិយោ និដ្ឋិតោ.