១២. កណ្ណមុណ្ឌបេតិវត្ថុ

៣៤៨. ‘‘សោណ្ណសោបានផលកា, សោណ្ណវាលុកសន្ថតា;

តត្ថ សោគន្ធិយា វគ្គូ, សុចិគន្ធា មនោរមា.

៣៤៩. ‘‘នានារុក្ខេហិ សញ្ឆន្នា, នានាគន្ធសមេរិតា;

នានាបទុមសញ្ឆន្នា, បុណ្ឌរីកសមោតតា [សមោហតា (ក.)].

៣៥០. ‘‘សុរភិំ សម្បវាយន្តិ, មនុញ្ញា មាលុតេរិតា;

ហំសកោញ្ចាភិរុទា ច, ចក្កវក្កាភិកូជិតា.

៣៥១. ‘‘នានាទិជគណាកិណ្ណា, នានាសរគណាយុតា;

នានាផលធរា រុក្ខា, នានាបុប្ផធរា វនា.

៣៥២. ‘‘ន មនុស្សេសុ ឦទិសំ, នគរំ យាទិសំ ឥទំ;

បាសាទា ពហុកា តុយ្ហំ, សោវណ្ណរូបិយាមយា;

ទទ្ទល្លមានា អាភេន្តិ [អាភន្តិ (ក.)], សមន្តា ចតុរោ ទិសា.

៣៥៣. ‘‘បញ្ច ទាសិសតា តុយ្ហំ, យា តេមា បរិចារិកា;

តា [កា (ក.)] កម្ពុកាយូរធរា [កម្ពុកេយូរធរា (សី.)], កញ្ចនាវេឡភូសិតា.

៣៥៤. ‘‘បល្លង្កា ពហុកា តុយ្ហំ, សោវណ្ណរូបិយាមយា;

កទលិមិគសញ្ឆន្នា [កាទលិមិគសញ្ឆន្នា (សី.)], សជ្ជា គោនកសន្ថតា.

៣៥៥. ‘‘យត្ថ ត្វំ វាសូបគតា, សព្ពកាមសមិទ្ធិនី;

សម្បត្តាយឌ្ឍរត្តាយ [… រត្តិយា (ក.)], តតោ ឧដ្ឋាយ គច្ឆសិ.

៣៥៦. ‘‘ឧយ្យានភូមិំ គន្ត្វាន, បោក្ខរញ្ញា សមន្តតោ;

តស្សា តីរេ តុវំ ឋាសិ, ហរិតេ សទ្ទលេ សុភេ.

៣៥៧. ‘‘តតោ តេ កណ្ណមុណ្ឌោ សុនខោ, អង្គមង្គានិ ខាទតិ;

យទា ច ខាយិតា អាសិ, អដ្ឋិសង្ខលិកា កតា;

ឱគាហសិ បោក្ខរណិំ, ហោតិ កាយោ យថា បុរេ.

៣៥៨. ‘‘តតោ ត្វំ អង្គបច្ចង្គី [អង្គបច្ចង្គា (ក.)], សុចារុ បិយទស្សនា;

វត្ថេន បារុបិត្វាន, អាយាសិ មម សន្តិកំ.

៣៥៩. ‘‘កិំ នុ កាយេន វាចាយ, មនសា ទុក្កដំ កតំ;

កិស្ស កម្មវិបាកេន, កណ្ណមុណ្ឌោ សុនខោ តវអង្គមង្គានិ ខាទតី’’តិ.

៣៦០. ‘‘កិមិលាយំ [កិម្ពិលាយំ (សី. ស្យា.)] គហបតិ, សទ្ធោ អាសិ ឧបាសកោ;

តស្សាហំ ភរិយា អាសិំ, ទុស្សីលា អតិចារិនី.

៣៦១. ‘‘សោ មំ អតិចរមានាយ [ឯវមាតិចរមានាយ (ស្យា. បី.)], សាមិកោ ឯតទព្រវិ;

‘នេតំ ឆន្នំ [នេតំ ឆន្នំ ន (សី.), នេតំ ឆន្នំ នេតំ (ក.)] បតិរូបំ, យំ ត្វំ អតិចរាសិ មំ’.

៣៦២. ‘‘សាហំ ឃោរញ្ច សបថំ, មុសាវាទញ្ច ភាសិសំ;

‘នាហំ តំ អតិចរាមិ, កាយេន ឧទ ចេតសា.

៣៦៣. ‘‘‘សចាហំ តំ អតិចរាមិ, កាយេន ឧទ ចេតសា;

កណ្ណមុណ្ឌោ យំ សុនខោ, អង្គមង្គានិ ខាទតុ’.

៣៦៤. ‘‘តស្ស កម្មស្ស វិបាកំ, មុសាវាទស្ស ចូភយំ;

សត្តេវ វស្សសតានិ, អនុភូតំ យតោ ហិ មេ;

កណ្ណមុណ្ឌោ ច សុនខោ, អង្គមង្គានិ ខាទតិ.

៣៦៥. ‘‘ត្វញ្ច ទេវ ពហុការោ, អត្ថាយ មេ ឥធាគតោ;

សុមុត្តាហំ កណ្ណមុណ្ឌស្ស, អសោកា អកុតោភយា.

៣៦៦. ‘‘តាហំ ទេវ នមស្សាមិ, យាចាមិ បញ្ជលីកតា;

ភុញ្ជ អមានុសេ កាមេ, រម ទេវ មយា សហា’’តិ.

៣៦៧. ‘‘ភុត្តា អមានុសា កាមា, រមិតោម្ហិ តយា សហ;

តាហំ សុភគេ យាចាមិ, ខិប្បំ បដិនយាហិ ម’’ន្តិ.

កណ្ណមុណ្ឌបេតិវត្ថុ ទ្វាទសមំ.