១១. សុត្តបេតវត្ថុ

៣៤១. ‘‘អហំ បុរេ បព្ពជិតស្ស ភិក្ខុនោ, សុត្តំ អទាសិំ ឧបសង្កម្ម យាចិតា;

តស្ស វិបាកោ វិបុលផលូបលព្ភតិ, ពហុកា ច មេ ឧប្បជ្ជរេ [ពហូ ច មេ ឧបបជ្ជរេ (សី.)] វត្ថកោដិយោ.

៣៤២. ‘‘បុប្ផាភិកិណ្ណំ រមិតំ [រម្មមិទំ (ក.)] វិមានំ, អនេកចិត្តំ នរនារិសេវិតំ;

សាហំ ភុញ្ជាមិ ច បារុបាមិ ច, បហូតវិត្តា ន ច តាវ ខីយតិ.

៣៤៣. ‘‘តស្សេវ កម្មស្ស វិបាកមន្វយា, សុខញ្ច សាតញ្ច ឥធូបលព្ភតិ;

សាហំ គន្ត្វា បុនទេវ មានុសំ, កាហាមិ បុញ្ញានិ នយយ្យបុត្ត ម’’ន្តិ.

៣៤៤. ‘‘សត្ត តុវំ វស្សសតា ឥធាគតា,

ជិណ្ណា ច វុឌ្ឍា ច តហិំ ភវិស្សសិ;

សព្ពេវ តេ កាលកតា ច ញាតកា,

កិំ តត្ថ គន្ត្វាន ឥតោ ករិស្សសី’’តិ.

៣៤៥. ‘‘សត្តេវ វស្សានិ ឥធាគតាយ មេ, ទិព្ពញ្ច សុខញ្ច សមប្បិតាយ;

សាហំ គន្ត្វាន បុនទេវ មានុសំ, កាហាមិ បុញ្ញានិ នយយ្យបុត្ត ម’’ន្តិ.

៣៤៦. សោ តំ គហេត្វាន បសយ្ហ ពាហាយំ, បច្ចានយិត្វាន ថេរិំ សុទុព្ពលំ;

‘‘វជ្ជេសិ អញ្ញម្បិ ជនំ ឥធាគតំ, ‘ករោថ បុញ្ញានិ សុខូបលព្ភតិ’’.

៣៤៧. ‘‘ទិដ្ឋា មយា អកតេន សាធុនា, បេតា វិហញ្ញន្តិ តថេវ មនុស្សា;

កម្មញ្ច កត្វា សុខវេទនីយំ, ទេវា មនុស្សា ច សុខេ ឋិតា បជា’’តិ.

សុត្តបេតវត្ថុ ឯកាទសមំ.