១០. ឧត្តរមាតុបេតិវត្ថុ

៣៣១. ទិវាវិហារគតំ ភិក្ខុំ, គង្គាតីរេ និសិន្នកំ;

តំ បេតី ឧបសង្កម្ម, ទុព្ពណ្ណា ភីរុទស្សនា.

៣៣២. កេសា ចស្សា អតិទីឃា [អហូ ទីឃា (ក.)], យាវភូមាវលម្ពរេ [យាវ ភូម្យា’វលម្ពរេ (?)];

កេសេហិ សា បដិច្ឆន្នា, សមណំ ឯតទព្រវិ.

៣៣៣. ‘‘បញ្ចបណ្ណាសវស្សានិ, យតោ កាលង្កតា អហំ;

នាភិជានាមិ ភុត្តំ វា, បីតំ វា បន បានិយំ;

ទេហិ ត្វំ បានិយំ ភន្តេ, តសិតា បានិយាយ មេ’’តិ.

៣៣៤. ‘‘អយំ សីតោទិកា គង្គា, ហិមវន្តតោ [ហិមវន្តាវ (ក.)] សន្ទតិ;

បិវ ឯត្តោ គហេត្វាន, កិំ មំ យាចសិ បានិយ’’ន្តិ.

៣៣៥. ‘‘សចាហំ ភន្តេ គង្គាយ, សយំ គណ្ហាមិ បានិយំ;

លោហិតំ មេ បរិវត្តតិ, តស្មា យាចាមិ បានិយ’’ន្តិ.

៣៣៦. ‘‘កិំ នុ កាយេន វាចាយ, មនសា ទុក្កដំ កតំ;

កិស្ស កម្មវិបាកេន, គង្គា តេ ហោតិ លោហិត’’ន្តិ.

៣៣៧. ‘‘បុត្តោ មេ ឧត្តរោ នាម [បុត្តោ មេ ភន្តេ ឧត្តរោ (ក.)], សទ្ធោ អាសិ ឧបាសកោ;

សោ ច មយ្ហំ អកាមាយ, សមណានំ បវេច្ឆតិ.

៣៣៨. ‘‘ចីវរំ បិណ្ឌបាតញ្ច, បច្ចយំ សយនាសនំ;

តមហំ បរិភាសាមិ, មច្ឆេរេន ឧបទ្ទុតា.

៣៣៩. ‘‘យំ ត្វំ មយ្ហំ អកាមាយ, សមណានំ បវេច្ឆសិ;

ចីវរំ បិណ្ឌបាតញ្ច, បច្ចយំ សយនាសនំ.

៣៤០. ‘‘ឯតំ តេ បរលោកស្មិំ, លោហិតំ ហោតុ ឧត្តរ;

តស្ស កម្មស្ស វិបាកេន, គង្គា មេ ហោតិ លោហិត’’ន្តិ.

ឧត្តរមាតុបេតិវត្ថុ ទសមំ.