១២. ឧរគបេតវត្ថុ

៨៥. ‘‘ឧរគោវ តចំ ជិណ្ណំ, ហិត្វា គច្ឆតិ សន្តនុំ;

ឯវំ សរីរេ និព្ភោគេ, បេតេ កាលង្កតេ សតិ.

៨៦. ‘‘ឌយ្ហមានោ ន ជានាតិ, ញាតីនំ បរិទេវិតំ;

តស្មា ឯតំ ន រោទាមិ, គតោ សោ តស្ស យា គតិ’’.

៨៧. ‘‘អនព្ភិតោ [អនវ្ហិតោ (សី.)] តតោ អាគា, នានុញ្ញាតោ ឥតោ គតោ;

យថាគតោ តថា គតោ, តត្ថ កា [កា តត្ថ (សី.)] បរិទេវនា.

៨៨. ‘‘ឌយ្ហមានោ ន ជានាតិ, ញាតីនំ បរិទេវិតំ;

តស្មា ឯតំ ន រោទាមិ, គតោ សោ តស្ស យា គតិ’’.

៨៩. ‘‘សចេ រោទេ កិសា អស្សំ, តត្ថ មេ កិំ ផលំ សិយា;

ញាតិមិត្តសុហជ្ជានំ, ភិយ្យោ នោ អរតី សិយា.

៩០. ‘‘ឌយ្ហមានោ ន ជានាតិ, ញាតីនំ បរិទេវិតំ;

តស្មា ឯតំ ន រោទាមិ, គតោ សោ តស្ស យា គតិ’’.

៩១. ‘‘យថាបិ ទារកោ ចន្ទំ, គច្ឆន្តមនុរោទតិ;

ឯវំ សម្បទមេវេតំ, យោ បេតមនុសោចតិ.

៩២. ‘‘ឌយ្ហមានោ ន ជានាតិ, ញាតីនំ បរិទេវិតំ;

តស្មា ឯតំ ន រោទាមិ, គតោ សោ តស្ស យា គតិ’’.

៩៣. ‘‘យថាបិ ព្រហ្មេ ឧទកុម្ភោ, ភិន្នោ អប្បដិសន្ធិយោ;

ឯវំ សម្បទមេវេតំ, យោ បេតមនុសោចតិ.

៩៤. ‘‘ឌយ្ហមានោ ន ជានាតិ, ញាតីនំ បរិទេវិតំ;

តស្មា ឯតំ ន រោទាមិ, គតោ សោ តស្ស យា គតី’’តិ.

ឧរគបេតវត្ថុ ទ្វាទសមំ.

ឧរគវគ្គោ បឋមោ និដ្ឋិតោ.