១១. នាគបេតវត្ថុ

៧៣. ‘‘បុរតោវ [បុរតោ ច (ស្យា.)] សេតេន បលេតិ ហត្ថិនា, មជ្ឈេ បន អស្សតរីរថេន;

បច្ឆា ច កញ្ញា សិវិកាយ នីយតិ, ឱភាសយន្តី ទស សព្ពតោ [សព្ពតោ (ក.)] ទិសា.

៧៤. ‘‘តុម្ហេ បន មុគ្គរហត្ថបាណិនោ, រុទំមុខា ឆិន្នបភិន្នគត្តា;

មនុស្សភូតា កិមកត្ថ បាបំ, យេនញ្ញមញ្ញស្ស បិវាថ លោហិត’’ន្តិ.

៧៥. ‘‘បុរតោវ យោ គច្ឆតិ កុញ្ជរេន, សេតេន នាគេន ចតុក្កមេន;

អម្ហាក បុត្តោ អហុ ជេដ្ឋកោ សោ [សោវ ជេដ្ឋោ (ក.)], ទានានិ ទត្វាន សុខី បមោទតិ.

៧៦. ‘‘យោ សោ មជ្ឈេ អស្សតរីរថេន, ចតុព្ភិ យុត្តេន សុវគ្គិតេន;

អម្ហាក បុត្តោ អហុ មជ្ឈិមោ សោ, អមច្ឆរី ទានវតី វិរោចតិ.

៧៧. ‘‘យា សា ច បច្ឆា សិវិកាយ នីយតិ, នារី សបញ្ញា មិគមន្ទលោចនា;

អម្ហាក ធីតា អហុ សា កនិដ្ឋិកា, ភាគឌ្ឍភាគេន សុខី បមោទតិ.

៧៨. ‘‘ឯតេ ច ទានានិ អទំសុ បុព្ពេ, បសន្នចិត្តា សមណព្រាហ្មណានំ;

មយំ បន មច្ឆរិនោ អហុម្ហ, បរិភាសកា សមណព្រាហ្មណានំ;

ឯតេ ច ទត្វា បរិចារយន្តិ, មយញ្ច សុស្សាម នឡោវ ឆិន្នោ’’តិ [ខិត្តោតិ (សី.)].

៧៩. ‘‘កិំ តុម្ហាកំ ភោជនំ កិំ សយានំ, កថញ្ច យាបេថ សុបាបធម្មិនោ;

បហូតភោគេសុ អនប្បកេសុ, សុខំ វិរាធាយ [វិរាគាយ (ស្យា. ក.)] ទុក្ខជ្ជ បត្តា’’តិ.

៨០. ‘‘អញ្ញមញ្ញំ វធិត្វាន, បិវាម បុព្ពលោហិតំ;

ពហុំ បិត្វា ន ធាតា ហោម, នច្ឆាទិម្ហសេ [នរុច្ចាទិម្ហសេ (ក.)] មយំ.

៨១. ‘‘ឥច្ចេវ មច្ចា បរិទេវយន្តិ, អទាយកា បេច្ច [មច្ឆរិនោ (ក.)] យមស្ស ឋាយិនោ;

យេ តេ វិទិច្ច [វិទិត្វា (សី.)] អធិគម្ម ភោគេ, ន ភុញ្ជរេ នាបិ ករោន្តិ បុញ្ញំ.

៨២. ‘‘តេ ខុប្បិបាសូបគតា បរត្ថ, បច្ឆា [បេតា (សី.)] ចិរំ ឈាយរេ ឌយ្ហមានា;

កម្មានិ កត្វាន ទុខុទ្រានិ, អនុភោន្តិ ទុក្ខំ កដុកប្ផលានិ.

៨៣. ‘‘ឥត្តរំ ហិ ធនំ ធញ្ញំ, ឥត្តរំ ឥធ ជីវិតំ;

ឥត្តរំ ឥត្តរតោ ញត្វា, ទីបំ កយិរាថ បណ្ឌិតោ.

៨៤. ‘‘យេ តេ ឯវំ បជានន្តិ, នរា ធម្មស្ស កោវិទា;

តេ ទានេ នប្បមជ្ជន្តិ, សុត្វា អរហតំ វចោ’’តិ.

នាគបេតវត្ថុ ឯកាទសមំ.